کوردی           عربی

په‌یڕه‌وی ناوخۆی ئه‌نجومه‌نی هه‌رێمی راپه‌ڕین‌

10/01/2016

Tuesday‌



بۆ كۆنفرانسی هه‌رێمی راپه‌ڕین

به‌ڕێز دیوانی كۆنفرانس:
به‌ڕێزان ئه‌ندامانی كۆنفرانس:
سڵاوی كاروخه‌باتان لێ بێ:
له‌سه‌ر بنه‌مای په‌یماننامه‌ی ته‌ڤگه‌ری ئازادی كۆمه‌ڵگای كوردستان بۆ پێكهاته‌ و ته‌واو كردنی په‌یكه‌ری رێكخستنی، هه‌مانكات ئه‌وبارودۆخه‌ی كه‌ ئه‌مڕۆ باشووری كوردستان له‌و گێژاو قه‌یرانه‌ی پێیدا تێپه‌ڕده‌بێت، له‌ تێكچوونی سیسته‌می سیاسی، گه‌نده‌ڵی ئیداری و خراپبوونی بژێوی هاوڵاتیان، هه‌روه‌ها ئه‌وه‌ش سه‌لمێنراوه‌ كه‌ سیسته‌می حیزبگه‌رای تاكڕه‌و و خۆسه‌پێن و نادیموكرات و دوور له‌پێوانه‌كانی ئازادی و پێوانه‌كانی مافی مرۆڤ و مافه‌ گه‌ردوونیه‌كان، به‌تایبه‌ت له‌ كوشتنی ژنان و بێ رۆڵكردن و گرنگی نه‌دان به‌ژیانی گه‌نجان، هه‌مانكات قه‌یرانی سیسته‌می پاراستنی له‌به‌ر به‌حیزبی كردنی، بۆیه‌ داڕشتنه‌وه‌و رێكخستنه‌وه‌ی له‌سه‌ر بنه‌مای پاراستنی ره‌واو پاراستنی جه‌وهه‌ری پێویسته‌ به‌ڕێكخستن بكرێته‌وه‌. هه‌مانكات به‌دامه‌زراوه‌نه‌كردنی سیسته‌می سیاسی له‌ هه‌رێمی كوردستان، ئه‌وه‌ش وای كردوه‌ كه‌ سیسته‌می سیاسی رووبه‌ڕووی هه‌ڵوه‌شانه‌وه‌ بێته‌وه‌. له‌سه‌ر ئه‌و بنه‌مایه‌ ئێمه‌ گه‌یشتوینه‌ته‌ ئه‌و باوه‌ڕیه‌یی كه‌ پێویسته‌ گۆڕانكاریه‌كان له‌ ره‌گ و ریشه‌وه‌ بكرێت واتا پێویسته‌ سیسته‌می به‌ڕێوه‌چوون بگۆڕدرێت، تاكو ئیراده‌ی كۆمه‌ڵگا خۆی بڕیار له‌سه‌ر خۆی بدات، هه‌مانكات هه‌موو چین و توێژه‌كانی كۆمه‌ڵگه‌ به‌پێشه‌نگایه‌تی ژنان و گه‌نجان له‌ هه‌رێمه‌كه‌مان له‌سه‌ر پێوه‌ره‌كانی سیسته‌می كۆنفیدرالیزمی دیموكراتی به‌ڕێكخستن بكه‌ین. 
ئێمه‌ له‌ هه‌رێمی راپه‌ڕین له‌گه‌ڵ هه‌موو ئه‌و كێشه‌و قه‌یرانه‌ی له‌باشوردا هه‌یه‌، هه‌مانكات رووبه‌ڕووی هێرشه‌ به‌رده‌وامه‌كانی فرۆكه‌ جه‌نگیه‌كانی ده‌وڵه‌تی داگیركه‌ری تورك ده‌بێته‌وه،‌ وه‌ك ده‌زانرێت له‌گوندی زارگه‌ڵی هه‌شت هاوڵاتی شه‌هیدبوون‌، هه‌روه‌ها له‌ڕا‌بردووشدا چه‌ندین هاوڵاتی تر شه‌هید و برینداربوونه‌، هه‌مانكات گرتنه‌وه‌ی سه‌رچاوه‌ی ئاوی زێی بچوك له‌لایه‌ن ده‌وڵه‌تی داگیركه‌ری ئێرانه‌وه، ئه‌مه‌ش ده‌بێته‌ وشك بوونی به‌نداوی دوكان و زیانێكی گه‌وره‌ ده‌گێنێ به‌ به‌رهه‌می ماسی و كشتوكاڵ هه‌وه‌ها به‌شێك له‌ ناوچه‌ كوێسانه‌كانی داگیركردوه‌ له‌ هه‌رێمه‌كه‌مان. له‌لایه‌كی تر به‌هۆی هاوسنوری له‌گه‌ڵ ده‌وڵه‌تی ئێران له‌لایه‌ك خه‌ڵكی بێ تاوان و كاروانچی ده‌بێته‌ قوربانی زوڵم و سته‌می رژێمی ئێران، هه‌مانكات هه‌ر له‌و رێگایه‌وه‌ ماده‌ی هۆشبه‌ر ئه‌گێنرێته‌وه‌ باشور و به‌شێكیش له‌قوربانیه‌كان خه‌ڵكی ئه‌م ده‌ڤه‌ره‌ن.  
له‌سه‌ر ئه‌و بنه‌مایه‌ ده‌ستبه‌كاربوونی سیسته‌می ته‌ڤگه‌ری ئازادی له‌ هه‌رێمه‌كه‌مان یه‌كێكه‌‌ له‌ ستونه‌ سه‌ره‌كیه‌كانی پێشخستنی خه‌بات، له‌پێناو به‌ڕێكخستن كردنی كۆمه‌ڵگه‌ و چالاك كردن و شۆڕبوونه‌وه‌ بۆ ناو كێشه‌و پرسه‌ جڤاكیه‌كان، هه‌مانكات ئاوا كردن و چالاك بوونی ئه‌نجومه‌ن و كۆمیته‌و كۆمیسیۆنه‌كان به‌ردی بناخه‌ی كوردستانێكی ئازاد و خۆبه‌ڕێوه‌به‌رو دیموكراته‌.

یه‌كه‌م: پره‌نسیپه‌ بنچینه‌ییه‌كانی ئه‌نجومه‌ن:
1ـ له‌قۆناخی راگوزاریدا تاگه‌یشتنی جڤاك به‌ سیسته‌می دیموكراتی خۆی؛ فۆرمیله‌ی (ده‌وڵه‌ت+دیموكراتی) پره‌نسیپی تێكۆشانی به‌ده‌زگابوونی دیموكراتیی و سنوورداركردنی هه‌ژموونی ده‌سه‌ڵاتدارێتییه‌. بۆیه‌ رووخانی سیسته‌می ده‌سه‌ڵاتدارێتی(ده‌وڵه‌تگه‌رایی) یان ته‌سلیمبوون به‌و سیسته‌مه‌ به‌ئامانج وه‌رناگیرێت؛ به‌ڵكو له‌سه‌ر بنه‌مای پره‌نسیپی ئاوێته‌بوونی (په‌یوه‌ندی ـ ناكۆكی) نێوان (ده‌وڵه‌ت+دیموكراتی)دا ئاستی په‌سندكردن و رێزگرتنیان به‌رامبه‌ر به‌یه‌كتری ده‌ستنیشان ده‌كات.
2ـ بوونی هه‌مه‌ڕه‌نگی و هه‌مه‌چه‌شنه‌یی چانده‌كان سروشتی جڤاكێكی پێشكه‌وتنخوازه‌. بۆیه‌ له‌ئاستی ئه‌قڵییه‌ت و چه‌مكدا، ژیان و كاردا، ماف و ئازادییه‌كاندا؛ دژی هه‌موو جیاكارییه‌كی نه‌رێنییه‌ كه‌ له‌سه‌ر بنه‌مای ره‌گه‌ز و ره‌نگ، زمان و شێوه‌زار، چین و توێژ، نه‌ته‌وه‌ و نه‌ژاد، ئایین و ئایینزا بسه‌پێنرێت و په‌یڕه‌وبكرێت.
3ـ دژی هه‌موو جۆره‌ داگیركاری و پاوانخوازییه‌كه‌، كه‌ به‌شێوازه‌كانی قڕكردن، نكۆڵیكردن، تواندنه‌وه‌، برسیكردن، بێكاركردن...هتد) خۆی ده‌سه‌پێنێت.
4ـ جاڕنامه‌ی گه‌ردوونی مافه‌كانی مرۆڤ، نۆڕمی سێ نه‌وه‌ی مافه‌كانی مرۆڤ(مافه‌كانی مه‌ده‌نی و سیاسی، ئابووری و كۆمه‌ڵایه‌تی و رۆشنبیری، ژینگه‌ و گشه‌پێدانی مرۆیی) و سه‌رجه‌م پێوانه‌ پێشكه‌وتووه‌كانی ماف و ئازادی مرۆڤ و جڤاكه‌كان په‌سند ده‌كات و خاوه‌ندارێتی لێده‌كات.
5ـ بۆ هه‌موو تاك و جڤاكێك مافی خۆپاراستنی گه‌وهه‌ری بنچینه‌ی هه‌موو مافه‌كانه‌، گه‌وره‌ترین پێشێلكاری مافه‌كان خۆنه‌پاراستنه‌.
6ـ له‌ده‌ره‌وه‌ی مافی پاراستنی ره‌وا دژی هه‌موو جۆر و شێواز و ئامرازه‌كانی توندوتیژییه‌.
دووه‌م: ئه‌رك و ئامانجی ئه‌نجومه‌ن:
 ئه‌ركی ئه‌نجومه‌نی هه‌رێمه‌كه‌مانه‌‌ له‌گه‌ڵ به‌یه‌كه‌وه‌ به‌ستنه‌وه‌ی ته‌واوی ئه‌و كاروخه‌باتانه‌ی له‌ هه‌رێمه‌كه‌ ئه‌نجامده‌درێن، هه‌مانكات پرۆژه‌و پلان به‌هاوكاری له‌گه‌ڵ كۆمیسیۆن و كۆمیته‌كان ده‌رده‌خات و له‌جێبه‌جێ كردنیشیاندا خۆی به‌رپرسیار ده‌بینێ. هه‌وڵده‌دات خۆی بگێنیته‌ هه‌موو چین و توێژ و ئاین و ره‌نگه‌ جیاوازه‌كانی ده‌ڤه‌ره‌كه‌ی، له‌سه‌ر ئه‌و بنه‌مایه‌ش ده‌بێته‌ جێگای كۆكردنه‌وه‌ی ده‌نگه‌ چالاكوان و ناڕازی و دیموكرات و ئازادیخوازه‌كان.
 پرسه‌كانی كۆمه‌ڵگا له‌ كێشه‌ كۆمه‌ڵایه‌تیه‌كان، تێكۆشان بۆ ئازادی ره‌گه‌زی و هاوسه‌نگ بوونی ئازادی تاك و كۆمه‌ڵ، رووبه‌ڕوو بوونه‌وه‌ی گه‌نده‌ڵی، یه‌كێتی و پێكه‌وه‌ ژیانی دیموكراتیانه‌ی ئاین و ئاینزا و گه‌ل و نه‌ته‌وه‌ جیاوازه‌كان، بۆ ئه‌و مه‌به‌سته‌ش ده‌نگی خۆی له‌ رێگای كۆڕ و كۆبوونه‌وه‌و سیمینار و گردبوونه‌وه‌و بایكۆت كردن و خۆپیشاندان نیشانده‌دات، له‌پێناو خاوه‌نده‌ركه‌وتن له‌ نرخ و مافه‌كانی كۆمه‌ڵگا هه‌موو هێز و توانای ده‌خاته‌ گه‌ڕ.
1ـ تێكۆشانی دیموكراتی و به‌رگری خۆیی(جه‌وهه‌ری) به‌بنه‌ما وه‌رده‌گرێت و له‌نێو جڤاكدا دیموكراتی ده‌گه‌یه‌نێته‌ ئاستی به‌ده‌زگابوون و سیسته‌می كۆنفیدراڵی دیموكراتی جڤاك و خۆبه‌ڕێوه‌به‌رێتی دیموكراتی به‌بنچینه‌ وه‌رده‌گرێت.
2ـ له‌پێناو بونیادنانی جڤاكێكی ئازاد و دیموكرات و ژینگه‌پارێزدا دیموكراتیزه‌بوونی تاك و كۆمه‌ڵگا و هاوسه‌نگی نێوان مرۆڤ و ژینگه‌ به‌بنچینه‌ وه‌رده‌گرێت. 
3ـ له‌پێناو به‌رگریكردن له‌ سه‌رجه‌م ماف و ئازادییه‌ تاكه‌كه‌سی و جڤاكییه‌كاندا تێده‌كۆشێت.
4ـ له‌پێناو یه‌كسانی و دادپه‌روه‌ری جڤاكیدا پێشه‌نگایه‌تی تێكۆشانی یه‌كسانیخواز و دادپه‌روه‌ریخوازانه‌ی چین و توێژه‌ ره‌نجده‌ر و كرێكار و چه‌وساوه‌كان ده‌كات.
5ـ له‌ تێكۆشانی خۆیدا ئه‌قڵییه‌تی هاوسه‌نگی ره‌گه‌زی و رێبازی ئازادی ژن به‌بنه‌ما وه‌رده‌گرێت. له‌پێناوی ئه‌وه‌ی ژن ناسنامه‌ و ئیراده‌ی خۆی به‌ده‌ست بێنێته‌وه‌ و پێشه‌نگایه‌تی بونیادنانی جڤاكێكی ئازاد و یه‌كسان و دادپه‌روه‌ر بكات پێشخستنی ته‌ڤگه‌ری ئازادی ژن به‌ ئه‌رك و ئامانجی خۆی ده‌بینێت.
6ـ له‌ تێكۆشانی خۆیدا و له‌ وه‌رگرتنی هه‌موو بڕیاره‌كانیدا یه‌كێتی نه‌ته‌وه‌یی دیموكراتی و به‌رژه‌وه‌ندی باڵای سه‌رتاسه‌ری كوردستان به‌ بنچینه‌ وه‌رده‌گرێت.
7ـ له‌پێناو ئه‌وه‌ی گه‌نجان ببنه‌ خاوه‌ن كه‌سێتییه‌كی ئازاد و به‌ ئیراده‌ و ده‌ستپێشخه‌ری و پێشه‌نگی ئاواكردنی جڤاكێكی سیاسیـ ئه‌خلاقی پێشخستنی ته‌ڤگه‌ری دیموكراتی گه‌نجان به‌ ئامانجی خۆی ده‌بینێت.
8ـ له‌پێناو دابینكردنی ژیانێكی ئاسووده‌ و ئارام بۆ پیر و په‌ككه‌وته‌، منداڵ و خاوه‌ن پێداویستییه‌ تایبه‌ته‌كان تێده‌كۆشێت.
سێیه‌م: پێكهاته‌و ئه‌ركه‌كانی كۆنفرانس:
1- له‌سه‌ر بنه‌مای په‌یماننامه‌ی ته‌ڤگه‌ری ئازادی ساڵانه‌ كۆنفرانسی هه‌رێمی ئه‌نجامده‌درێت، هه‌ڵسه‌نگاندن بۆ دۆخی هونوكه‌یی ده‌كات و ده‌گاته‌ بڕیاری پێویست، هه‌روه‌ها هه‌ڵبژاردن بۆ ئه‌نجومه‌ن و هاوسه‌رۆك و ده‌سته‌ی دسپلین ده‌كات.
2- به‌شداربووانی كۆنفرانس پێویسته‌، ئه‌ندامانی ته‌ڤگه‌ری ئازادی، خه‌باتكارانی ژنان و گه‌نجان، هه‌مانكات هه‌موو ئه‌وانه‌ی به‌شداری كۆبوونه‌وه‌كانی جڤاتی گشتی بوونه‌، له‌گه‌ڵ رێژه‌یه‌ك له‌و وڵاتپارێزه‌ نزیكانه‌ی كه‌ به‌شدارن له‌چالاكیه‌كانمان و په‌یماننامه‌ی ته‌ڤگه‌ر گونجاو ده‌بینن.
3- بۆ ئه‌نجامدانی كۆنفرانس كۆمیته‌ی ئاماده‌كار دیوانێك بۆ به‌ڕێوه‌بردنی كۆنفرانس له‌ ئه‌ندامانی كۆنفرانس به‌هه‌ڵبژاردنی راسته‌وخۆ دیاری ده‌كات.
4- هه‌رێمه‌كه‌مان راپۆرتی ساڵێكی كاروخه‌باتی ئه‌نجومه‌نی كاتی پێشكه‌شی كۆنفرانس ده‌كات.
5- په‌یڕه‌وی ناوخۆ دوای خوێندنه‌وه‌و گفتوگۆكردنی پێویسته‌ به‌ده‌نگدانی زۆرینه‌ كۆنفرانس په‌سندی بكات.
6- له‌ كۆنفرانس كۆمیسیۆنێك هه‌ڵده‌بژێردرێت بۆ ئه‌نجامدانی هه‌ڵبژاردنه‌كانی ئه‌نجومه‌ن. ده‌نگدان به‌نهێنیه‌ و ژماردن به‌ئاشكرایه‌.
چواره‌م: په‌یكه‌ری ئه‌نجومه‌ن و ئه‌ركه‌كانی:
1- ئه‌نجومه‌ن له‌ كۆنفرانس هه‌ڵده‌بژێردرێ و هه‌ر له‌وێش به‌ڵێن ده‌دات.
2- ژماره‌ی ئه‌ندامانی ئه‌نجومه‌ن له‌ 21 كه‌سه‌، پێك دێت له‌ رێكخستنی ژنان و گه‌نجان و به‌ڕێوه‌به‌ری كۆمیته‌كان، هه‌روه‌ها ئه‌و كۆمیتانه‌ی له‌داهاتوو زیاده‌ببن به‌ڕێوه‌به‌ره‌كانیان ده‌بنه‌ ئه‌ندامی ئه‌نجومه‌ن. ئه‌ندامانی ئه‌نجومه‌ن دابه‌ش ده‌كرێنه‌ سه‌ر كۆمیسیۆنه‌كان.
3- كۆتای ره‌گه‌زی به‌شێوه‌یه‌كی یه‌كسان ره‌چاوده‌كرێت، له‌گه‌ڵ رێژه‌ی 25% بۆ گه‌نجان له‌ ئه‌نجومه‌ن و كۆمیسیۆنه‌كان.
4- ئه‌نجومه‌ن دوو مانگ جارێك كۆبوونه‌وه‌ی خۆی ده‌كات و له‌ رێگای هاوسه‌رۆكه‌وه‌ راپۆرت پێشكه‌شی ناوه‌ندی رێكخستن ده‌كات. هه‌مانكات چاودێری كاره‌كانی ته‌واوی دامه‌زراوه‌ رێكخستنیه‌كان ده‌كات له‌ هه‌رێمه‌كه‌ی.
5- ئه‌نجومه‌ن به‌رپرسیاره‌ له‌ پلانكردنی كاروخه‌بات و رێكخستنكردنی و سه‌رخستنی، هه‌موو كۆسپ و ته‌گه‌ره‌كان به‌شێوازی رێكخستنی رووبه‌ڕووده‌بێته‌وه‌. جێبه‌جێكاری بڕیاره‌كانی جڤاتی گشتی و كۆنفرانسه‌‌.
پێنجه‌م: پێكهاته‌ و ئه‌ركه‌كانی ده‌سته‌ی كارگێڕی:
1- ده‌سته‌ی كارگێڕی له‌ناو ئه‌نجومه‌ن هه‌ڵده‌بژێردرێت، ژماره‌یان له‌"5"كه‌سه‌ و به‌به‌شداری نوێنه‌ری ژنان و گه‌نجان. له‌ناو خۆیدا ئه‌رك دابه‌شده‌كا و سه‌رپه‌رشتی هه‌موو كاروخه‌بات ده‌كات، له‌گه‌ڵ ئه‌نجومه‌ن به‌هه‌م ئاهه‌نگی كارده‌كات و جێبه‌جێكاری بڕیاره‌كانی ئه‌نجومه‌نه‌.
2- مانگانه‌ به‌هاوبه‌شی له‌گه‌ڵ به‌رپرسیاری كۆمسیۆن و كۆمیته‌كان كۆبوونه‌وه‌ ده‌كات، و راپۆرتی خۆی پێشكه‌شی ئه‌نجومه‌ن ده‌كات.
3- هه‌ركاتێك ده‌سته‌ی كارگێڕی یان هه‌ر ئه‌ندامێكی كه‌مته‌رخه‌م بوو، یان كاره‌كانی جێبه‌جێ نه‌كرد، له‌ ئه‌ركی لێ ده‌سندرێته‌وه‌  و ئه‌نجومه‌ن له‌ناو خۆیدا هه‌ڵبژاردنی تر ئه‌نجامده‌دات.
شه‌شه‌م: هاوسه‌رۆك، ئه‌رك و به‌رپرسیاریه‌تیه‌كانی:
1- له‌ كۆنفرانس هه‌ڵده‌بژێردرێن و به‌هاوبه‌شی له‌گه‌ڵ ئه‌نجومه‌ن و ده‌سته‌ی كارگێڕی كارده‌كه‌ن و هه‌مانكات سه‌رپه‌رشتی كاروخه‌باتی ئه‌نجومه‌ن و كۆمیسیۆن و كۆمیته‌كان ده‌كه‌ن.
2- ئه‌ركداره‌ له‌ جێبه‌جێكردنی بڕیارو پلانه‌كانی ئه‌نجومه‌ن و ده‌سته‌ی كارگێڕی، هه‌مانكات پره‌نسیبی كاری هه‌ره‌وه‌زی به‌بنه‌ما وه‌رده‌گرێت.
3- كاتی كۆبوونه‌وه‌كانی ئه‌نجومه‌ن و ده‌سته‌ی كارگێڕی به‌هاوبه‌شی له‌گه‌ڵ ده‌سته‌ی كارگێڕی دیاری ده‌كه‌ن و سه‌رپه‌رشتی كۆبوونه‌وه‌كانی ئه‌نجومه‌ن و ده‌سته‌ی كارگێڕی ده‌كه‌ن.
4- دوو مانگ جارێك به‌ڕاپۆرت به‌شداری كۆبوونه‌وه‌ی ناوه‌ندی رێكخستن ده‌بن.
حه‌وته‌م: ده‌سته‌ی دسپلین، ئه‌رك و به‌رپرسیاریه‌تی:
1- ده‌سته‌ی دسپلین له‌ 3 كه‌س پێك دێ و له‌ كۆنفرانس هه‌ڵده‌بژێردرێت.
2- به‌ هاوبه‌شی له‌گه‌ڵ ده‌سته‌ی دسپلینی گشتی كارده‌كات و به‌دواداچوون بۆ دۆسیه‌كان ده‌كات.
3- ئه‌نجامی كاره‌كانی وه‌ك زانیاری ئه‌داته‌ ئه‌نجومه‌ن و راپۆتیش ده‌داته‌ ده‌سته‌ی دسپلینی گشتی.  
هه‌شته‌م: كۆمیسیۆن و كۆمیته‌، ئه‌رك و به‌رپرسیاریه‌تی:
1- ئه‌نجومه‌ن بۆ رێكخستنی كاروباره‌كانی، پێویسته‌ له‌ ئه‌نجومه‌ن ئه‌ندامانی كۆمیسیۆنه‌كان هه‌ڵبژێردرێت، به‌گوێره‌ی تواناو بواری كاركردنیان.
2- له‌ده‌ره‌وه‌ی كۆمیسیۆنه‌ گشتیه‌كان ده‌توانرێت كۆمیسیۆنی تایبه‌تمه‌ند پێكبهێنرێ كه‌ پێویست بكات.
3- كۆمیسیۆنه‌كان له‌ پێشكه‌شكردنی پرۆژه‌ له‌ بواره‌كانی خۆیاندا و هه‌مانكات جێبه‌جێكردنیشیدا به‌رپرسیارن.
4- مانگانه‌ كۆبوونه‌وه‌ی خۆیان ده‌كه‌ن و راپۆرتی خۆشیان مانگی جارێك پێشكه‌ش ده‌سته‌ی كارگێڕی و دوو مانگ جارێك پێشكه‌ش به‌ ئه‌نجومه‌ن و ناوه‌ند و كۆمیته‌ی تایبه‌تمه‌ند به‌خۆیان ده‌كه‌ن.
5- ئه‌و كۆمیسیۆنانه‌ی پێویسته‌ پێكبهێنرێن: په‌یوه‌ندیه‌ سیاسیه‌كان، كۆمه‌ڵایه‌تی + ئه‌تنیك و باوه‌ڕیه‌كان، په‌روه‌رده‌ و لێكۆڵینه‌وه‌ی فیكری، ژنان، گه‌نجان، راگه‌یاندنی ئازاد + چاند و هونه‌ر، دارای و ئابووری.
6- كۆمیته‌ له‌ گه‌ڕه‌ك و كۆڵان و شارۆچكه‌و ناوچه‌كان ئاواده‌كرێن و ئه‌ركیان به‌رێكخستن كردن و خاوه‌نده‌ركه‌وتنه‌ له‌ كێشه‌ و داواكاریه‌كانی خه‌ڵك. 
نۆیه‌م: له‌سه‌ر ئه‌و بنه‌مایانه‌، تایبه‌تمه‌ندی و ئه‌ركی هه‌ر كۆمسیۆنێك ده‌توانین به‌وشێوه‌یه‌ دیاری بكه‌ین:
1- كۆمیسیۆنی په‌یوه‌ندیه‌ سیاسیه‌كان:
أ‌- له‌سه‌ر بنه‌مای سیاسه‌ت ئاكاری كۆمه‌ڵگایه‌ و كۆمه‌ڵگایه‌كی بێ سیاسه‌ت ناتوانێ گوزاره‌ له‌خۆی بكات په‌یوه‌ندیه‌كانی دروست ده‌كات تاكو په‌یامی ته‌ڤگه‌ری ئازادی بگێنێت، له‌گه‌ڵ هه‌موو لایه‌نه‌ سیاسیه‌ كوردستانیه‌كان، رێكخراوه‌كانی كۆمه‌ڵگای مه‌ده‌نی، كه‌سایه‌تی و داموده‌زگا حكومیه‌كان. 
ب‌- هیچ كه‌سێك له‌هه‌ر ئاستێك بێ به‌ته‌نها ناچێته‌ دیدار و چاوپێكه‌وتنی فه‌رمی.
ت‌- كۆنوسی هه‌موو دیداره‌كانی له‌گه‌ڵ راپۆرتی مانگانه‌ی ده‌نێرێته‌وه‌ بۆ ناوه‌ندی سیاسه‌تی دیموكراتی.
2- كۆمیسیۆنی كۆمه‌ڵایه‌تی+ ئه‌تنیك و باوه‌ڕی:
أ‌- له‌سه‌ربنه‌مای چاره‌سه‌ر كردنی كێشه‌كانی هاوڵاتیان له‌ ده‌ره‌وه‌ی ده‌سه‌ڵات و به‌ رێباز و شێوازی دیموكراتیانه‌ كه‌ پێوه‌ره‌ سه‌ره‌كیه‌كانی په‌یماننامه‌ی ته‌ڤگه‌ری ئازادی به‌بنه‌ما بگرێت، كێشه‌كان چاره‌سه‌ر ده‌كات.
ب‌- له‌چاره‌سه‌ری هه‌ر كێشه‌یه‌كدا ئه‌نجامه‌كه‌ی به‌ راپۆرت ده‌داته‌ ناوه‌ندی جڤاكی ئازاد و ژینگه‌ پارێزی.
ت‌- ناڕه‌زایی به‌رامبه‌ر بڕیاره‌كانی كۆمیسیۆنی كۆمه‌ڵایه‌تی پێشكه‌شی ده‌سته‌ی دسپلین ده‌كرێت، ماوه‌ی سه‌رلێدان بۆ ناڕه‌زایی ده‌ربڕین 15 رۆژه‌.
پ‌- به‌ئازادانه‌ جێبه‌جێكردنی پێویستی باوه‌ڕی و په‌رستن بۆ هه‌موو ئاین و ئاینزا و باوه‌ڕیه‌ جیاكانی گه‌لی كورد و گه‌لانی تر ده‌ئافرێنێت. هه‌مانكات پێكه‌وه‌ ژیانی نه‌ته‌وه‌و گه‌لانی جیاوازیش به‌ ده‌وڵه‌مه‌ندی كۆمه‌ڵگا ده‌بینێ و پێكه‌وه‌ كار و پێكه‌وه‌ ژیان ده‌كاته‌ پره‌نسیبی تێكۆشان.
ج‌- هێرش و چه‌واشه‌كاریه‌كانی به‌ناوی ئاین بۆسه‌ر بزاڤی ئازادیخوازی گه‌لی كوردستان راست ده‌كاته‌وه‌، هه‌روه‌ها پشت ئه‌ستور به‌گه‌وهه‌ری بنه‌ڕه‌تی ئایین و به‌گوێره‌ی بنه‌ماكانی دیموكراتی و ناسنامه‌ی نیشتیمان په‌روه‌ری پره‌نسیبی لایه‌نگری چه‌وساوه‌كان به‌ بناخه‌ وه‌رده‌گرێ.
3- په‌روه‌رده‌و لێكۆڵینه‌وه‌ی فیكری:
أ‌- كۆمیسیۆنی په‌روه‌ده‌و لێكۆڵینه‌وه‌ی فكری، بۆ پێگه‌یاندنی ئه‌ندامانی ته‌ڤگه‌ری ئازادی و خه‌ڵكی هه‌رێمه‌كه‌ی خۆی و قاڵبوونه‌وه‌یان بۆ تێكۆشان و ئاگاداربوونیان له‌ قۆناخ، پێش هه‌موو شتێك سیسته‌م و پرۆگرامێكی په‌روه‌رده‌یی وه‌گه‌ڕده‌خات.
ب‌- له‌كات و شوێنی خۆیدا بێ بڕوایی، بێ هیوای، نادیاری و هێرشه‌ ئایدیۆلۆژیه‌كانی دژ به‌ نرخه‌ جڤاكیه‌كان و تێكۆشانی شۆرشگێڕی ده‌ستنیشان ده‌كات و له‌به‌رامبه‌ریدا تێكۆشانێكی ئایدیۆلۆژی و سیاسی به‌بنه‌ما ده‌گرێت.
ت‌- له‌سه‌ر بنه‌مای په‌روه‌رده‌ كردنی كۆمه‌ڵگا به‌شێوه‌ی تاك یان گرووپ و كۆمه‌ڵ له‌ چوارچێوه‌ی شار و شارۆچكه‌ و گه‌ڕه‌ك و شوێنه‌ دووره‌ ده‌سته‌كان، كۆبوونه‌وه‌ی جه‌ماوه‌ری و سیمینار و پانێل  و گفتو گۆی كراوه‌ سازده‌كات.
پ‌- راوه‌سته‌كردن له‌سه‌ر ده‌رخستن و بڵاوكردنه‌وه‌ی ئه‌ده‌بیات و  نامیلكه‌كانی رێكخستن، هه‌روه‌ها به‌ره‌وپێشبردنی لێكۆلینه‌وه‌ی هزری سیاسی و جڤاكی.
4- كۆمیسیۆنی ژنان:
أ‌- له‌سه‌ر بنه‌مای جیهانبینی كۆمه‌ڵگه‌ی ژینگه‌پارێز و دیموكرات و ئازادی ره‌گه‌زی و ئایدیۆلۆژیای رزگاری ژن تێكۆشان ده‌كات، له‌پێناو ده‌سته‌به‌ركردنی مافه‌كانی ئازادی و یه‌كسانی ژنان، له‌سیاسه‌تدا كاروباره‌كانی رێكخستنی ژن و به‌ده‌زگاكردنی له‌هه‌موو بواره‌كانی كۆمه‌ڵگادا به‌ڕێوه‌ده‌بات.
ب‌- په‌روه‌رده‌كردن و رێكخستنی كۆمه‌ڵگا به‌بناخه‌ وه‌رده‌گرێت.
ت‌- كاروباره‌كانیان ته‌نها به‌ژنی كورده‌وه‌ سنوردار ناكات و دانانی په‌یوه‌ندی له‌گه‌ڵ ژنانی گه‌لانی دیكه‌ش ده‌كاته‌ ئامانج.
پ‌- هه‌ر ژه‌نێك له‌ كۆمسیۆن و رێكخستنی هه‌رێمی ئه‌ندامی كۆنفیدراسیۆنی ژنانه‌، بۆیه‌ به‌هاوته‌ریبی پێكه‌وه‌ كارده‌كه‌ن.
5- كۆمیسیۆنی گه‌نجان:
أ‌- كۆمیسیۆنی گه‌نجان به‌رپرسیاره‌ له‌ به‌ڕێكخستنكردنی گه‌نجان له‌ بواره‌كانی سیاسی، كۆمه‌ڵایه‌تی، كلتوری و وه‌رزشیدا، چونكه‌ گه‌نج پێشه‌نگی كۆمه‌ڵگان بۆ ئه‌وه‌ی كۆمه‌ڵگا له‌سه‌ر بنه‌مای دیموكراتی خۆی به‌ڕێكخستن ده‌كات و  پێشه‌نگایه‌تی بۆ ناڕه‌زایه‌تیه‌ جه‌ماوه‌ریه‌كان ده‌كات.
ب‌- كۆمیسیۆن گه‌نجان له‌سه‌ر رێبازی نه‌ته‌وه‌یی دیموكراتی گه‌نجان په‌روه‌رده‌ ده‌كات، هه‌روه‌ها به‌ ئامانجی پابه‌ندبوون به‌ به‌ها نه‌ته‌وه‌یی و وڵاتپارێزیه‌كان، هه‌روه‌ها كارده‌كات بۆ نه‌هێشتنی شاڵاوی‌ كۆچی گه‌نجانی به‌كۆمه‌ڵ بۆ ده‌ره‌وه‌ی وڵات، بۆ ئه‌و مه‌به‌سته‌ش پرۆژه‌ی تایبه‌ت و جیاجیا بۆ گه‌نجانی خوێندكار، كرێكار و بێكار ئاماده‌ ده‌كرێت، هه‌مانكات پشتگیری گه‌نجانی داهێنه‌ر ده‌كات.
ت‌- كاركردن له‌گه‌ڵ رێكخراوه‌كانی گه‌نجان و لاوان به‌هاوبه‌شی، هه‌روه‌ها خۆگه‌یاندنه‌ گه‌نجانی نه‌ته‌وه‌كانی تر و پێكه‌وه‌ كار كردن.
پ‌- هه‌موو ئه‌ندامی كۆمیسیۆنی گه‌نجان و كۆمیته‌كانیان، هه‌مانكات ئه‌ندامن له‌ كۆنفیدراسیۆنی گه‌نجان و به‌هاوبه‌شی پێكه‌وه‌ كارده‌كه‌ن.
6- كۆمیسیۆنی راگه‌یاندنی ئازاد + چاند و هونه‌ر:
أ‌- كۆمیسیۆنی راگه‌یاندنی ئازاد، له‌سه‌ر بنه‌مای راگه‌یاندن پێگه‌یه‌كی سه‌ره‌كی خه‌باتی دیموكراتیه‌ و كۆمه‌ڵگا پێویسته‌ به‌ زانیاری راست ئاراسته‌  و ئاگادار بكرێته‌وه‌.
ب‌- كۆمیسیۆنی راگه‌یاندنی ئازاد كارده‌كات تاكو هه‌موو چالاكیه‌كانی ته‌ڤگه‌ری ئازادی له‌ هه‌رێمی خۆی بگوازێته‌وه‌ بۆ ماڵپه‌ڕ و تۆڕه‌ كۆمه‌ڵایه‌تیه‌كانی ته‌ڤگه‌ر. هه‌روه‌ها دروست كردنی پردی په‌یوه‌ندی له‌گه‌ڵ راگه‌یاندنه‌كانی تر.
ت‌- كۆمیسیۆنی چاند و هونه‌ر، له‌هه‌موو كاروخه‌باتیدا په‌رپێدان به‌ چاندی نه‌ته‌وه‌یی دیموكراتی و كردنی به‌ موڵكی كۆمه‌ڵگا ده‌كاته‌ ئامانج و چه‌مكی هونه‌ری شۆرشگێڕی و به‌رخودان به‌بنه‌ما وه‌رده‌گرێت.
پ‌-  كۆمیسیۆن به‌رپرسیاره‌ له‌ به‌رێكخستنكردنی كاروباری هونه‌ری له‌ هه‌رێمه‌كه‌ی، هه‌روه‌ها هانده‌ر ده‌بێت بۆ پێشخستن و پاراستنی گیانی هونه‌ری نه‌ته‌وه‌یی و جڤاكی. هه‌موو چالاكیه‌ هونه‌ریه‌كانی هه‌رێمه‌كه‌ی رێكده‌خات و به‌ڕێوه‌ی ده‌بات.
7- كۆمیسیۆنی دارای و ئابووری:
أ‌- پره‌نسیبی خۆتێری"فینانس" ده‌كاته‌ بنه‌مای به‌ڕێوه‌بردن، هه‌مانكات زۆری داهات و كه‌می خه‌رجی په‌یڕه‌و ده‌كات.
ب‌- ئه‌ندامانی كۆمیسیۆن به‌هاوبه‌شی له‌گه‌ڵ ئه‌نجومه‌ن و ئه‌ندامانی كۆمیسیۆنه‌كانی تر كار ده‌كه‌ن بۆ كۆكردنه‌وه‌ی هاوكاری و پێویستیه‌ ماددیه‌كان. هه‌موو داهات و خه‌رجی لای كۆمیسیۆنی دارای كۆده‌بێته‌وه‌.
ت‌- پێشخستنی ئابووری هاوبه‌ش و جڤاكی، تاكو هاوڵاتیان بتوانن پشت به‌خۆیان ببستن.
پ‌- هاندانی كۆمه‌ڵگا بۆ به‌بنه‌ماگرتنی پرۆژه‌ی ئابووری هاوبه‌ش"كۆپه‌راتیف" ، گرنگیدان به‌ ره‌نجدان و به‌رهه‌می خۆماڵی.

په‌سندكراوی یه‌كه‌مین كۆنفرانسی هه‌رێمی راپه‌ڕین
ته‌ڤگه‌ری ئازادی كۆمه‌ڵگای كوردستان
8/1/2016

---------------------------------------------------------------------------------------------------------------------------------------------------------------------------.

بڕیاره‌كانی یه‌كه‌مین کۆنفرانسی تەڤگەری ئازادی كۆمه‌ڵگای كوردستان
                                     له‌ هەرێمی راپەڕین

بەهۆی ئەو گێژاوه ‌و کێشە سیاسی و ئابووری و کۆمەڵایەتییەی کە باشووری کوردستان بەگشتی و هەرێمەکەمان بەتایبەتی پیایدا دەگوزەرێت، به‌هۆكاری درێژەدان بەسیاسەتی چەوت و نادیموکراتیانە و حیزبیانەی هێزە دەسەڵاتدارەکان کە لەماوەی ٢٥ ساڵی حوکمڕانیان لەسەربنەمای بێ ئیرادەکردن و بەحیزبی کردنی کۆمەڵگا سەرچاوەی گرتووە و تارۆژی ئەمڕۆش بەردەوامە، لەسه‌ربنه‌مای خۆدووبارەکردنەوە و حیساب نەکردن بۆ مافی هاوڵاتیان و سیاسەتی برسیکردن و نەدانی مووچە و کپکردنی دەنگە ناڕازییەکان و سنووردارکردنی ئازادی بیروڕا و پێوەر و بنەماکانی مافی مرۆڤ، سەرەڕای  ئەوەی کە هەرێمی ڕاپەڕین زۆرترین قوربانی لەشەڕی دژ بە داگیرکەران داوە و لەراپەڕینی ئازاری ١٩٩١ دا پێشەنگایەتی کردووە و لەئێستاشدا زۆرترین شەهید و برینداری بەخشیوە لەشەڕی دژ بەداعش، تائێستا ژیانێکی شایستە بۆ بنەماڵە و خێزانی شەهیدەکان دابین نەکراوە، هه‌مانكات خزمەتگوزاری سەرەتایی، ئاو، کارەبا، تەندروستی و پەروه‌ردە تادێت خراپتر دەبێت، دیاردەی توندوتیژی دژ بەژنان لەهەڵکشان دایە، گەنجان لەبەربێکاری و هەژاری و بێ هیوا بوونیان وڵات بەجێدێڵن، لەرووی ئیداری و بەڕێوەبردنەوە گەندەڵی و ڕۆتین دامودەزگا فەرمیەکانی تائاستی ئیفلجبوون بردووە، سەرەڕای سەرچاوەی ئاوی زۆر و زەوی کشتوکاڵی، به‌ڵام بەرهەمی ناوەخۆ لەئاستی هەرە نزمی دایە و پوکاوەتەوە، بازاڕ و بازرگانی بەهۆی قۆرخکارییەوە دەستی بەسەرداگیراوە و یاری بەگیرفانی بەتاڵی هاوڵاتیان دەکات، ئەمەو دەیان کێشەی کەڵەکەبووی دیکە بەرهەمی ئەو سیاسەت و سیستەمە شکستخواردووەی دەسەڵاتدارانی باشووری کوردستانە کە گەلەکەمانی تووشی بێ هیوایی و بێچارەیی کردۆتەوە. 
هەربۆیە ئێمە وەک كۆنفرانسی تەڤگەری ئازادی لە هەرێمی ڕاپەرین لەسەر بنەمای بەڕێکخستن کردنی گەل و چارەسەری پرسە دیموکراتی و جڤاکی و ژینگه‌یی و باشتركردنی بژێوی هاوڵاتیان و كلتوری و کێشە هەنووکەیەکان لە هەرێمەکە،له‌ یەکەمین کۆنفرانسی تەڤگەری ئازادی لەهەرێمی ڕاپەڕین گه‌یشته‌ ئه‌م بڕیارانه‌ی خواره‌وه‌:

1- له‌پێناو به‌ره‌و پێشبردنی سیسته‌می خۆبه‌ڕێوه‌بردنی دیموكراتی و به‌جێكردنی، هه‌روه‌ها ته‌وژمدان به‌ هێڵی سێیه‌م له‌ سیاسه‌تی دیموكراتیدا، بۆ ئه‌مه‌ش به‌ڕێكخستن كردن و خۆبه‌ڕێوه‌بردن ده‌كه‌ینه‌ بنه‌مای سه‌ره‌كی تێكۆشانی داهاتوومان.
2- له‌پێناو چاره‌سه‌ركردنی كێشه‌كانی كۆمه‌ڵگا و به‌ڕێكخستن كردنی ناڕه‌زایه‌تیه‌كان، ئامانجمان ئاواكردنی ئه‌نجوومه‌نی خۆبه‌ڕێوه‌به‌رێتی و كۆمیته‌ی رێكخستنی جه‌ماوه‌ری له‌ گوند و شارۆچكه‌ و شاره‌دێ و گه‌ڕه‌ك و كۆڵانه‌كان و هه‌موو ئه‌و شوێنانه‌ی تا ئێستا ده‌ستمان پێنه‌گه‌یشتووه‌. هه‌روه‌ها رێكخسته‌بوونی سه‌رجه‌م چین و توێژه‌كان؛ به‌تایبه‌تی مامۆستایان و ته‌ندروستكاران كه‌ دوو توێژی چالاكی كۆمه‌ڵگان.
3- له‌به‌رامبه‌ر بۆشایی هزری و ئایدیۆلۆژیدا په‌ره‌پێدان به‌خه‌باتی په‌روه‌رده‌یی و رۆشنبیری و راگه‌یاندنی و چاندی له‌ هه‌رێمه‌كه‌ماندا، بۆ ئه‌مه‌ش هه‌موو ئه‌ندامان ده‌بێ ساڵانه‌ په‌روهر‌ده ببینن‌.
4- له‌به‌رامبه‌ر نه‌بوونی خزمه‌تگوزاری و نه‌بوونی مووچه‌ و كێشه‌ كۆمه‌ڵایه‌تییه‌ قووڵه‌كان، پێشه‌نگایه‌تی ناڕه‌زایه‌تییه‌ جه‌ماوه‌رییه‌كان ده‌كه‌ین، له‌ رێگه‌ی ئاواكردنی ئه‌نجوومه‌نه‌كانی گه‌ل.
5- له‌به‌رامبه‌ر هێرشه‌ ئاسمانییه‌كانی ده‌وڵه‌ته‌ داگیركه‌ره‌كانی توركیا و ئێران، كه‌ بۆته‌ هۆكاری ده‌یان شه‌هید و بریندار و خراپبوونی ژینگه‌ و وێرانكردنی سه‌رچاوه‌كانی بژێوی ژیانی ده‌یان گوند و كوێستانه‌كان له‌باشووری كوردستان به‌گشتی و به‌تایبه‌تی له‌ هه‌رێمه‌كه‌مان، تێكۆشان و ناڕه‌زایه‌تییه‌ نه‌ته‌وه‌ییه‌كانمان به‌رفرا‌وان ده‌كه‌ین.
6- خاوه‌نده‌ركه‌وتن له‌ شه‌هیدانی كۆمه‌ڵكوژی گوندی بۆتێ و كورته‌ك و زارگه‌لی و ته‌واوی شه‌هیدانی ده‌ستی داگیركه‌ران له‌ هه‌رێمه‌كه‌مان، هه‌وڵدان بۆ رێزگرتن و به‌رده‌وامكردنی رێبازی تێكۆشانیان و دروستكردنی په‌یكه‌ری یادگاری بۆیان.
7- له‌سه‌ر بنه‌مای پره‌نسیبی پێكه‌وه‌ كاركردنی سیاسی و جڤاكی له‌گه‌ڵ ته‌واوی لایه‌نه‌ سیاسی و رێكخراوه‌ مه‌ده‌نییه‌كان، كه‌سایه‌تییه‌ دیموكرات و ده‌نگه‌ ناڕازییه‌كان خاوه‌نداریه‌تی له‌ پرسه‌كانی كۆمه‌ڵگا ده‌كه‌ین.
8- له‌به‌رامبه‌ر ئه‌و توندوتیژییه‌ی كه‌ له‌به‌رامبه‌ر ژنان ده‌كرێ له‌ هه‌رێمه‌كه‌مان، به‌هه‌موو هێز و توانامانه‌وه‌ رووبه‌ڕووی ده‌بینه‌وه‌ و بۆ ئه‌وه‌ی ژن خۆی بگه‌یه‌نێته‌ ئاستی پێشه‌نگایه‌تی و خۆبه‌ڕێكخستن كردن، به‌هه‌موو شێوه‌یه‌ك پشتگیری ده‌كه‌ین.
9- له‌به‌رامبه‌ر ئه‌و په‌راوێزخستن و بێكاری و بێهیوایی و كۆچی به‌كۆمه‌ڵه‌ی گه‌نجان له‌ هه‌رێمه‌كه‌ماندا، هۆشیاركردنه‌وه ‌و په‌روه‌رده كردن ‌و به‌رێكخستن كردنیان ده‌كه‌ینه‌ ئامانجی سه‌ره‌كی خۆمان.
 10- تێكۆشان ده‌كه‌ین له‌پێناو پاراستنی سامانه‌ سروشتییه‌كان به‌گشتی و به‌تایبه‌ت سامانی ئاوی و شوێنه‌واره‌ مێژووییه‌كان له‌هه‌رێمه‌كه‌مان و هاندانی هاوڵاتیان بۆ زیاتر ئاوه‌دان كردنه‌وه‌ی گونده‌كان و پێشخستنی به‌روبوومی خۆماڵی. 

په‌سندكراوی یه‌كه‌مین كۆنفرانسی
 ته‌ڤگه‌ری ئازادی كۆمه‌ڵگای كوردستان
هه‌رێمی راپه‌ڕین
8/1/2016

------------------------------------------------------------------------------------------------------------------------------------------------------------------

راپۆرتی ئه‌نجومه‌نی كاتی
پێشكه‌شه‌به ‌كۆنفرانسی هه‌رێمی راپه‌ڕینی ته‌ڤگه‌ری ئازادی كۆمه‌ڵگای كوردستان

بەدروشمی:
بەرۆحی تیکۆشانی نەتەوەیی دیموکراتی له‌ راپه‌ڕینه‌وه‌ به‌ره‌و ڕێکخستن كردنی كۆمه‌ڵگا.

بەرێزان: ئەندامانی دیوانی کۆنفرانس، ئەندامانی دەستەی سەرۆکایەتی، ئۆرگانەکان و دەستەکان بەشداربوانی کۆنفرانس.
 سڵاوی کاروخەبات و تێکۆشانتان لێبێت.
بەپشت بەستن بە پەیماننامەی  تەڤگەری ئازادی پەسندکراو لەیەکەمین کۆنگرەی دامەزراندن لە ١٧/١٠/٢٠١٤ و بڕیارەکانی کۆبوونەوەی جڤاتی گشتی ناوبەر لە ٢٨/٨/ ٢٠١٥ بڕیاردراوه‌ بۆ ئه‌وه‌ی هەرهەرێمێک کۆنفرانسی ساڵانەی خۆی سازدەکات، کەتیایدا ئەنجومەن و هاوسەرۆک و دەستە دسپلینی تێدا هەڵدەبژێردرێت، هەروەها پەیڕەوی ناوخۆ و پرۆژەی کار بە گفتووگۆ و دەنگ لەسەردان پەسند دەکرێت بۆ ماوەی ساڵێک بە مەبەستی بەڕێوەبردنی کاروخەباتی رێکخستنی، له‌ هه‌رێمی راپەڕین کۆمیتەی ئامادەکاری بۆ یەکەمین کۆنفرانسی هەرێمی لە ٨/١٢/٢٠١٥ پێکهات، بەهاوکاری و هه‌م ئاهەنگی کۆمیتەی گشتی ئامادەکاری کۆنفرانسی هەرێمەکان ده‌ستی به‌كاره‌كانی كرد.
ئەمڕۆش دوای خەباتێکی چڕووپڕ بەهیمەتی هەڤاڵانی تەڤگەری ئازادی لەسەرجەم ناوەندەکانی کاروخەبات و رێکخستنەکانی گەنجان و ژنان و دۆستانی وڵاتپارێز و سەرجەم ئەو تێکۆشەرانەی پەیماننامەی تەڤگەری ئازادی بەگونجاو دەبیین بۆ خەبات و تێکۆشان دە ست بە ئەنجامدانی یەکەمین کۆنفرانسی هەریمی راپەرین بکەین.
  لەم کۆنفرانسەدا بەرۆحیەتی راپەڕینەوە هاتووین بەدڵ نزمییەوە لەبەرامبەر شەهیدان و کەسوکارە سەربەرزەکانیاندا بەڵینیان بۆ دووپات بکەینەوە کە درێژەپێدەری رێباز و کاروانەکەی ئەوانبین و دەست بەرداری ئامانجەکانیان نابین، ئامادەبوونتان و گەرم و گوڕیتان مانای بەبڕیاربوونە لەسەر ئەوەی کۆنفرانسەکەمان بکەینە وەرچەرخانێکی رێکخستنی لەسەربنەمای خۆبەڕیوەبەری دیموکراتی کە بگاتە هەموو گوندو شارو شارەدێیەکی هەرێمی راپەڕین و ببینە وەڵام لەبەرامبەر زوڵم و ستەمکاری و ئه‌و بێ هیوای و  بێچارەیه‌یی لەناو گەلە ستەم دیدەکەماندا كه‌ چەندین ساڵە خەڵکی باشوری کوردستان پێوەی دەناڵێنێ.
ئەندامان و بەشداربووانی کۆنفرانسی هەرێمی راپەڕین، ته‌وه‌ره‌ سه‌ركیه‌كانی راپۆرته‌كه‌مان بریتین له:‌
1- بارودۆخی سیاسی باشوری کوردستان و هەرێمی دەڤەری راپەرین.
2- بارودۆخی کۆمەڵایەتی وئابوری و ئاسایش و خۆپاراستن.
3- کارو خەباتی ساڵی رابردوو بەگشتی و ئەنجومەنی کاتی بەتایبەتی و رەخنەو رەخنەدان. 
4- چارەسەری و ئەنجام وچۆنیەتی پێشخستنی کارو خەبات.
یه‌كه‌م: بارودۆخی سیاسی باشوری کوردستان: 
کێشەو قەیرانە ئاڵۆزەکانی ناوچەکە  بەگشتی و باشوری کوردستان بەتایبەتی زنجیرەیەکی لێکدانەبڕاوە لەو گێژاوەی کە رۆژهەڵاتی ناوین تیایدادەژی کەسەرچاوەی دەگەڕێتەوە بۆ بەبنبەست گەیشتنی سیسته‌می باڵادەستی سەرمایەی جیهانی لەبەرامبەر کێشە زهنی و سیاسی و ئابوری و چاندی و کۆمەڵایەتیەکان، ئەو قەیران و گێژاوەی رۆژ لەدوای رۆژ کۆمەڵگای مرۆڤایەتی بەرەو شەڕ و ئاژاوە و کۆمەڵکوژی و قاتوقڕی و کۆچبەری و برسێتی زیاتر دەبات، ئەوە نیشاندەدات کەئەو سیستەمە ستەمکار و زاڵمە چیدیکە توانای چارەسەری کێشەو قەیرانەکانی نەماوەو لە گەڵ خۆیدا دەیەوێت لەرێگای توندوتیژی و وێرانکاریەوە سەرزەمین و ژیان وێرانبکات. ئەو شەڕو ئاشوبەی کە ماوەی نیو سەدەیە گەلانی ناوچەکە لەرۆژهەڵاتی ناوین دەهاڕێت و ماوە ی چەند ساڵێکیشە  زیاتر خەست بۆتەوە ئاکامێکی روونی  سیستەمی مۆدێرنێتەی سەرمایەدارییە کە لەپێناو بەرژەوەندیەکانی خۆیان پەنایان بۆ توندوتیژی و دروست کردنی ناکۆکی نەتەویی ئتنیكی و مەزهەبی بردوەو ئاکامەکەشی ئەوەیە کە کۆمەڵکوژی و کۆچبەری و برسیەتی نادادی کۆمەڵایەتی پێشیلکاری ئازادی مافەکانی مرۆڤ لەهەرکات و زەمانێک زیاتر بەرۆکی گەلانی دنیا بگرێت.
ئێراق وباشوری کوردستان و رۆژهەڵاتی ناوین کێشەی هەرە ئاڵۆزو تێکهەڵکێشی هەرێمەکەن و لەرووی سیاسی سەربازی ئابورییەوە شوێنگەیەکی ستراتیژی گرنگیان هەیە، هەربۆیە هێزە باڵادەستەکان بەدرێژایی مێژوو هەوڵێانداوە دەسه‌ڵاتداری خۆیانی تیادا بسەپێنن و لەوێشەوە هەژموونی خۆیان بەرسەر تەواوی رۆژهەڵاتی ناوەڕاستی پر لەنەوت و سامانی سروشتی زاڵبکەن، سنوری دەوڵه‌تی ئێراق بە باشوری کوردستانیشەوە کە وەک ئاکامێکی شەڕی یەکەمی جیهانی لە سەربنەمای دابەشکردنی بەرژەوەندی دەوڵەتە زڵهێزەکانی براوەی شەڕ دامەزراوە تادەگات بەرۆژگاری ئەمڕۆ ئارامی جێگیری بەخۆوە نەدیوە، لەسۆسیالیزمی بونیادنراوە وە تادەگاتە هێزە دەرەکیەکانی دیکەی کۆلۆنیالیست و دەوڵەتی ئێرانی و عوسمانی لەسەربنەمای رەتکردنەوەی ئیرادەی گەلان دەسەڵاتداری خۆیان سەپاندووە، لەناو دەوڵەتی عێراقیشدا هێزە نەتەوەپەرست و شۆڤێنستەکانی عەرەب بەستەمکاری شەڕ خواستویانە گەلی کورد و گەلانی دیکە وەک ئاشوری و تورکمان و ئاین و باوه‌ڕیه‌كانی وەک ئێزدی و كاكه‌یی و شه‌به‌ك و ... هتد. ملکەچ پێبکەین و لەدەروەی ئیرادەی گەلان دەسەڵاتداری خۆیان بسەپێنن لە بەرامبەریشدا هێزی میللیگەرای کورد وەک ئەڵقەیەکی دانەبڕاو لەو زهنیەتە هەڵسوکەوتی کردووەو سەرچاوەی هێزی لە پاشکەوتووی کۆمەڵگا وەرگرتووە لە سیاستکردنی دا ئەقڵیەتی خێڵ و ناوچەگەری تێپەڕ نەکرددوەو هەوڵیداوە ئیرادەی خۆیی گەل لاوازبکات بەم جۆرە مێژوویەکی دووبارەی پڕتراژیدیایی بەسەر گەلدا سەپاندووە، بەورەفتارانە کەدرێژە پێدەری سیاسەتی داگیرکەرانەیە بووەتە کۆسپی گەرورە لەبەرامبەر دروست بوونی ئیرادەی یەکگرتووی نەتەوایەتی و پشت بەستن بەهێز و توانایی خۆیی کە پەرەسەندنی سروشتی کۆمەڵگای کوردستانە، بەم جۆرە خۆیان سەپاندووەو هیچ کات نەیانتوانیوە خۆ لەقەرەی چارەسەری کێشەکانی کۆمەڵگابدەن، بەڵکو لەبازنەی ملکەچبوون بۆ داگیرکەران و ئاغایەتی شەڕ و بازرگانی کردن پێیەوە وەک کارتێکی نێو هاوسەنگیە سیاسی و سەربازیەکانی هێز لەناوچەکە خۆیان خستۆتە بازاڕی مامەڵەکردنەوەو  قەیران لەدوای قه‌یران و بێچارەیی و بێ هیوایی لەباشوری کوردستاندا کردۆتە قەدەر. ئاکامی ئەو سیاسەتە شکستخواردووەیە کەماوەی ٢٥ ساڵە لەباشوری خۆی دووبارەدەکاتەوە لەشەری ناوەخۆ وە بگرە تا دەگاتە بەتاڵانبردنی سامانی سەرزەوەی ژێر زەوی و بەحیزبی کردنی کۆمەڵگاو بنپێکردنی مافی هاوڵاتیان و پێوەر وپێوانە دێموکراتی یە کان و ئازادی بیروڕاو ..هتد. دوائاکامی ئەو ملهوڕییە لە سیاسیەت کردنەش ئەنجام خۆسه‌پاندن بوو بەسەر پەرلەمان و ئیفلیج کردنی و درێژەدان بە تاکڕەوی دەسەڵاتە ناشەرعی یە بەسەرچووەکان نمونه‌ی "سه‌رۆكایه‌تی هه‌رێم"و هاوپەیمانیە ئابوری وسیاسیەکانیان کە بێجگە لە خزمەت بەداگیرکەرانی کوردو نەهامەتی و  زیان بۆ ژیان و ئابوری خەڵکی کوردستان وەک بێ مووچەیی و کەمی ئاستی خزمەتگوزاری و كه‌بۆته‌ هۆكاری چۆڵکردنی وەڵات لەلایەن گەنجان و سەرجەم چین وتوێژەکان و دەیان دەردەسەری تر. هەربۆیە لە باشوری کوردستان بۆ ئەوەی وەک رابردوو بۆ چەندین جار مێژوو هاوشێوه‌ نه‌بێته‌وه‌، گەلەکەمان بگاتە ئامانجەکانی کە دەریایەک خۆینی بۆ رشتووە گومانی تێدانییە کەدەبێت ئەقڵیەتی سەره‌تایی وابەستە بەداگیرکەران و خولانەوە لە بازنەی بێ سیستەمی و بێچارەیی دەربازبکرێت، ئیدی هێزو توانستی شاراوەی ئەم گەلە سەبری نەماوە و هیچی تر رێگا بەدووبارەبوونەوەی ستەمکاری خۆیی و دەرکی نادات و بە پشت بەستن بە دەوڵەمەندی ئەم خاکە و مێژووی بەرخودانی ئەو گەلانەی لەسەری دەژین رێگە بەوەنادا لەسەر بنەمای خۆبەدەستەوەدان و ملکەچبوون بژیین.
دووه‌م: بارودۆخی كۆمه‌ڵایه‌تی و ئابووری و ئاسایش و خۆپاراستن:
هه‌رێمی راپه‌ڕین له‌ رووی جوگرافیه‌وه‌ ده‌كه‌وێته‌ باكوری رۆژهه‌ڵاتی پارێزگای سلێمانی و له‌ رووی كارگێڕیه‌وه‌ سه‌ربه‌و پارێزگایه‌‌ وه‌ك ئیداره‌یه‌كی سه‌ربه‌خۆ، به‌ دووری 130 – 140 كم له‌ هه‌ردوو پارێزگای هه‌ولێر و سلیمانیه‌وه‌ دووره‌، هه‌روه‌ها له‌ناو خۆی دابه‌شده‌بێته‌ سه‌ر دوو شارۆچكه‌ی قه‌ڵادزێ و رانیه‌، قه‌ڵادزێ پێكهاتووه‌ له‌ شاردێكانی هێرۆ، هه‌ڵشۆ، ژاراوه‌، سه‌نگه‌سه‌ر و ئیسێوه‌، هه‌مانكات 282 گوندیش له‌خۆ ده‌گرێ. رانیه‌ش پێك دێت له‌ شاره‌دێكانی چوارقوڕنه‌، حاجیاوه‌، سه‌ركه‌پكان و سه‌روچاوه، هه‌مانكات 127 گوندیش له‌خۆ ده‌گرێت. ژماره‌ی دانیشتوانی به‌گشتی به‌ نیوملیۆن كه‌س مه‌زنده‌ ده‌كرێت. هه‌رێمی راپه‌ڕین له‌ %10 ده‌شتایی پارێزگای سلێمانی پێكدێنێت و خاوه‌نی سه‌روه‌ت و سامانێكی زۆری كشتوكاڵی و ئاژه‌ڵداریه‌ و به‌هۆی هه‌بوونی ئاوی زێی بچوك و ده‌ریاچه‌یی دوكان خاوه‌نی سامانێكی زۆری ماسیه‌، هه‌روه‌ها ناوچه‌یه‌كی گرنگی گه‌شتیاریه‌و خاوه‌ن چه‌ندین شوێنه‌واری مێژوویی و كۆنه‌ كه‌ بۆ سه‌رده‌می ئاشوری و ئۆركا كان ده‌گه‌ڕێته‌وه‌.
ئه‌م هه‌رێمه‌ جگه‌ له‌وه‌ی خاوه‌ن ئه‌و تایبه‌تمه‌ندیانه‌ی سه‌ره‌وه‌یه‌ له‌ رووی سیاسی و خۆپاراستنیشه‌وه‌ به‌هۆی بوونی زینجیره‌ چیا سه‌ركه‌شه‌كانی قه‌ندیل كه‌ هه‌میشه‌ قه‌ڵایه‌كی له‌شكان نه‌هاتووی گه‌لی كوردبووه‌، هه‌مانكات ناوچه‌یه‌كی ستراتیژی و گرنگه‌ و له‌به‌ر ئه‌وه‌شه‌ به‌رده‌وام بۆته‌ مه‌نزڵگای شۆرش و شۆرگێڕانی هه‌رچوارپارچه‌ی كورستان، ئه‌مه‌ش ‌ هۆكارێكی تره‌ بۆ گه‌شه‌كردنی هه‌ست و سۆزی نه‌ته‌وه‌یی و نیشمانی خه‌ڵكی ئه‌م ده‌ڤه‌ره‌. بۆیه‌ له‌ 24/4/1974 قه‌ڵادزێ كه‌وته‌ به‌ر شاڵاوی فرۆكه‌ جه‌نگیه‌كانی به‌عس و به‌و هۆیه‌وه‌ سه‌دان كه‌س بوونه‌ قوربانی، هه‌روه‌ها له‌ ساڵانی 1982 پێشه‌نگایه‌تی بۆ ناڕه‌زایه‌تیه‌كانی گه‌ل كرد به‌رامبه‌ر رژێمی به‌عسی فاشیست، هه‌ر له‌به‌ر ئه‌وه‌ به‌گشتی ده‌ڤه‌ری پشده‌ر له‌ ساڵی 1989 به‌ته‌واوی خاپوركراو خه‌ڵكه‌كه‌‌شی له‌ كۆمه‌ڵگا زۆره‌ملێكان نیشته‌جێكران. 
به‌ڵام رۆحیه‌تی به‌رخودان و سه‌رهڵدان نه‌وه‌ك هه‌ر كپ نه‌بوو، زۆری نه‌برد دوای گۆڕانكاریه‌كانی ناوچه‌كه‌، كه‌به‌شه‌ڕی داگیركردنی كوێت له‌لایه‌ن به‌عسه‌وه‌ ده‌ستی پێكرد، له‌ 5ی ئازاری 1991 دا له‌ رانیه‌ به‌ڕاپه‌ڕینێكی جه‌ماوه‌ری جارێكیتر گه‌لی ئه‌م هه‌رێمه‌ پێشه‌نگایه‌تی بۆ قۆناخێكی نوێی تێكۆشانی رزگاری كرد، توانی ببێته‌ سه‌ره‌تای سه‌ركه‌وتنێكی گه‌وره‌ بۆ گه‌له‌كه‌مان، ئه‌مه‌ش بووه‌ هۆكار كه‌ دووباره‌ خه‌ڵكی ناوچه‌ی پشده‌ر بگه‌ڕێنه‌وه‌ سه‌ر زێدی خۆیان.
ئێستاش كه‌ 25 ساڵ تێده‌په‌ڕێت به‌سه‌ر راپه‌ڕین و ئیداره‌ و حوكمڕانی ناوخۆیی، كه‌به‌رهه‌می راپه‌ڕین و خوێنی هه‌زاران شه‌هیده‌، تائێستا ئه‌و ده‌سه‌ڵاته‌ وه‌ك پێویست نه‌بۆته‌ وه‌ڵام، به‌ڵكو له‌زۆر كاتدا بۆته‌ بارگرانی و هۆكاری قه‌یران و گێژاو ئه‌وه‌ چ له‌ساڵانی نۆوه‌ت له‌سه‌رده‌می شه‌ڕی ناوخۆدا چ له‌ دوای رووخانی رژێمی به‌عس له‌ 2003 وه‌ به‌خراپی به‌ڕێوه‌بردن و  گه‌نده‌ڵی ئیداری و پاوه‌نخوازی ده‌سه‌ڵات و قۆرخكاری ئابوری و سه‌روه‌ت و سامانی هاوڵاتیان. به‌ڵام خه‌ڵكی ئه‌م هه‌رێمه‌ به‌رده‌وام ده‌نگی ناڕه‌زایی و هه‌قخوازانه‌ی به‌رزكردۆته‌وه‌و به‌شێوازی دیموكراتیانه‌ گوزاره‌ی له‌ بیروڕاكانی كردوه‌، هه‌رچه‌نده‌ هه‌ندێك جار كه‌سانێك نابه‌رپرسیارانه‌ش هه‌ڵسوكه‌وتیان كردبێ به‌ نانه‌وه‌ی توندو تیژی و په‌شێوی، به‌ڵام ئه‌مه‌ راستینه‌ی ئه‌و هه‌رێمه‌ نییه‌ و ده‌خوازرێ داواكاره‌ ره‌واكانی خه‌ڵك بشێوێنن، ئه‌مه‌ش له‌ دواین ناڕه‌زایه‌تیه‌كانی پایزی رابردوو ده‌ركه‌وتنه‌ پێش و چه‌ند كه‌سێك بوونه‌ قوربانی.
له‌به‌ر نه‌ڕخسانی هه‌لی كار و نه‌بوونی ده‌رفه‌تی گوزران بۆ هاوڵاتیان، سه‌ره‌ڕای ده‌وڵه‌مه‌ندی ناوچه‌كه‌ له‌ رووی ئابووری و كشتوكاڵ و بازرگانیه‌وه، به‌ڵام زۆر له‌ ناوچه‌ كشتوكالیه‌كان ده‌كرێنه‌ شوێنی نیشتجێبوون‌، هه‌مانكات به‌هۆی سیاسه‌تی حیزبگه‌رایی و په‌رپێنه‌دان به‌ بوژانه‌وه‌ پێشخستنی گونده‌كان بۆیه‌ تائێستا زۆرێك له‌كێشه‌ی زه‌وی و زار بێچاره‌سه‌ر ماوه‌ته‌وه‌ به‌پرسانی ده‌سه‌ڵات خستویانه‌ته‌ خزمه‌ت خۆیان، هه‌مانكات هه‌موو بسته‌ زه‌ویه‌كی بۆش ته‌ڵبه‌ندكراوه‌و بێ ئه‌وه‌ی هیچ سود و به‌رهه‌مێكی هه‌بێ. بێگومان تا ده‌چێت بێكاریه‌كی قوڵ روو له‌ هه‌رێمه‌كه‌ ده‌كات‌، ئه‌وه‌ش بۆته‌ هۆكار به‌سه‌دان له‌ گه‌نجان و توێژه‌ جیاوازه‌كان روو له‌ده‌ره‌وه‌ی و‌ڵات بكه‌ن، هه‌روه‌ها به‌هۆی بازرگانی سه‌رسنوره‌كانی چه‌ندین رووداوی نه‌خوازراو قوربانی جۆراوجۆری لێده‌كه‌وێته‌وه‌، هه‌روه‌ها به‌هۆكاری هێرشه‌ ئاسمانیه‌كانی هه‌ردوو ده‌وڵه‌تی داگیركه‌ری توركیاو ئێران ساڵانه‌ به‌سه‌دان خێزان ئاواره‌ده‌بن و به‌ده‌یانیش ده‌بنه‌ قوربانی و زیانێكی زۆر ده‌گێنن به‌ ره‌زو باخ و ئاژه‌ڵداری كوێستانه‌كانی قه‌ندیل و ناوچه‌ سنوریه‌كان و ژینگه‌ی هه‌رێمه‌كه‌.
له‌به‌رئه‌وه‌شه‌‌ تاده‌چێت به‌هۆی ئه‌و سیاسه‌ته‌ شكستخواردوه‌ی ده‌سه‌ڵات، خه‌ڵك رۆژبه‌ڕۆژ له‌گه‌ڵ ئه‌وه‌ی باری گوزه‌ران و بژێوی ژیانی خراپترده‌بێ له‌به‌ر نه‌بوونی مووچه‌ و زۆربوونی بێكاری و له‌ولاشه‌وه‌ نه‌بوونی بازاڕ و گرانبوونی پێداویستیه‌كانی ژیانی رۆژانه ‌ ‌ئه‌وه‌نده‌ی تر گێژاوه‌كه‌ی قوڵتركردۆته‌وه‌، ئه‌وه‌ش بۆته‌ هۆكاری كێشه‌ی كۆمه‌ڵایه‌تی و رووداوی نه‌خوازراو دیاریده‌ی توندوتیژی. هه‌روه‌ها گه‌نجان له‌گه‌ڵ ئه‌وه‌ی بێ به‌شكراون له‌ دامه‌زراندن و به‌رهه‌مهێنان، له‌ولاشه‌وه‌ كۆمه‌ڵێك دیارده‌ نامۆ پێشده‌خرێن بۆ سه‌رقاڵكردنی گه‌نجان.
سه‌ڕه‌ڕای ئه‌وه‌ی ئه‌و ناوچه‌یه‌ خاوه‌ن زۆرترین شه‌هید و قوربانیه‌ له‌ تێكۆشانی نه‌ته‌وه‌یی و نیشتمانیدا ، له‌ئێستاشدا رۆڵی گرنگی ده‌بینێت له‌ رووبه‌ڕووبونه‌وه‌ی داگیركه‌ران و چه‌ته‌كانی داعشدا له‌كه‌ركوكه‌وه‌ تا ده‌گاته‌ كوبانێ تائێستاش ده‌یان قوربانی له‌و پێناوه‌دا به‌خشیوه‌، به‌ڵام گوزه‌رانی ژیانی پێشمه‌رگه‌ و خێزانه‌كانیان له‌ئاستێكی خراپدایه،هه‌مانكات له‌ژێرناوی ئاینی پیرۆزی ئیسلامه‌وه‌ په‌رپێدانی رێكخستنی ئاینی توندڕه‌و په‌ڕگیر و تا بگه‌نه‌ ئه‌و ئاسته‌ی هه‌ندێك له‌گانجانمان فریوبدرێن و بكرێنه‌ خۆراكی گروپه‌ توندڕه‌وه‌كان، ئه‌وه‌ جگه‌ له‌شكستی پرۆژه‌و كه‌می خزمه‌تگوزاری و خراپی رێگاوبانه‌كان كه‌ له‌گه‌ڵ خۆی چه‌ندین قوربانی تری به‌دوای خۆیدا هێناوه‌و خه‌ڵكی به‌ته‌وای خستۆته‌ ناو نائومێدی و بێزاری. هه‌رچه‌نده‌ ئه‌م هه‌رێمه‌ ده‌وڵه‌مه‌نده‌ به‌هونه‌ر و كلتور و شوێنه‌وار و دابونه‌ریته‌ ره‌سه‌نه‌ مێژوویه‌كان، به‌ڵام ئێستا خه‌ڵك نامۆ كراوه‌ و چالاكیه‌ هونه‌ریه‌كان گه‌یشتۆته‌ ئاستی نه‌بوون. بۆیه‌ ئێمه‌ وه‌ك خه‌ڵكی ئه‌م هه‌رێمه‌ ده‌مانه‌وێ بۆ خاوه‌نده‌ركه‌وتن له‌خۆمان و له‌ ده‌سكه‌وته‌كانی گه‌له‌كه‌مان و خوێنی شه‌هیدان، قۆناخێكی نوێ له‌ خه‌بات و تێكۆشان ده‌ستپێبكه‌ین و هیواو ئومێد جارێكیتر بگه‌ڕێنینه‌وه‌ بۆ گه‌له‌كه‌مان.
بێگومان له‌و قوربانی و سه‌خستی بارودۆخه‌دا ژنان به‌شی هه‌ره‌ زۆریان له‌ چه‌وسانه‌وه‌ توندوتیژی و له‌ئاستی خێزان و كۆمه‌ڵگا به‌ركه‌وتوه‌، مامۆستا ساكار نمونه‌ی هه‌ره‌ به‌رچاوی ئه‌و توندوتیژیه‌ ناڕه‌وایه‌ییه‌ خێزانیه‌یه‌‌ كه‌ ژنان رووبه‌ڕووی ده‌بنه‌وه،‌ ئه‌مه‌ش زه‌نگێكی مه‌ترسیدارتره‌ له‌ تێكچوتی شیرازه‌ی كۆمه‌ڵگا و نه‌مانی نرخ و به‌ها مرۆیه‌ سه‌ره‌تایه‌كان، بۆیه‌ ئێمه‌ له‌لای خۆمانه‌وه‌ سه‌ره‌تایه‌كی نوێمان له‌ خه‌باتی یه‌كسانی ژن و پیاو ده‌ستپێكردوه‌و پرۆسه‌ی هاوسه‌رۆكایه‌تیش وه‌كو جوانترین دیاری پێشكه‌شی هه‌رێمه‌كه‌مانی ده‌كه‌ین. 
سێیه‌م: کاروخەباتی ساڵی رابردووی ئەنجومەنی کاتی هه‌رێمی راپەڕین:
دوای دامەزراندنی تەڤگەری ئازادی کۆمەڵگای کوردستان به‌ بەشداری بەرچاوی خەباتکارانی ئەو دەڤەرە و سەرجەم شار و شارۆچکەکانی باشوری کوردستان، لەسەرەتای مانگی ١١ی هەمان ساڵدا ئەنجومەنی کاتی تەڤگەری ئازادی لە هه‌رێمی راپەرین پێکهات، لە خەباتکارانی بیتوێن و پشدەر بۆ سەرپەرشتی کاروخەباتی رێکخستن. سەرەتایی کار بریتی بوو لەسەر لەنوێ خۆرێکخستنەوەو شیواز و سیستەمی تەڤگەری ئازادی بۆ بەگه‌رخستنی کۆمەڵگا ، لەو رانگەیەوە دەستکرا بە سازدانی چەندین کۆبوونەوە لەسەر  پەیماننامەی تەڤگەری ئازادی و چۆنیەتی جێبەجێ کردنی پرۆژە و بڕیارەکانی کۆنگرەی دامەزراندن. 
هاوکات لە سەرئاستی لایەنە سیاسیەکان و کەسیاتیەکان دەستکرا بەسەردان و خۆناساندن و پێویستی دامەزراندنی سیستەمی تەڤگەری ئازادی بەو شێوازە جڤاکی و سیاسیە بۆ کۆمەڵگای باشوری کوردستان، جێگای ئاماژەیە ئەنجومەنی کاتی دەڤەری راپەڕین لە کۆمیتەی پەیوەندیەکان و راگەیاندن و پەروەردەو کۆمەڵایەتی پێکهاتوەو  بێجگە لە نوێنەرایەتی رێکخستنی گەنجان و ژنان بەپێی سنوری دەڤەرەکە و شارو و شارۆچکەکان ئەندامانی رێکخستن جێگایان تیاداگرتووە، مانگانە بەشێوەی رێکوپێک کۆبوونەوەی خۆی ئەنجامداوە و پلان و کاری بۆ داهاتوو داڕشتووە و راپۆرتی کاروخەبات و چالاکیەکانی پێشکەش بەدەستەی بەڕێوەبەرایەتی و دواتریش ناوەندی رێکخستن کردووە، هەروەها لەکۆبوونەوەی جڤاتی گشتی ناوبەردا ئەندامانی ئەو هەرێمە بەشداری بەرچاویان هەبووە لە هەڵبژاردنی دەستەی سەرۆکایەتی دەستەی بەڕێوەبەرایەتی و دەستەی دسپلین و هەڵبژاردنەکان جێگایان گرتووە، ئەوەش گووڕوتینێکی زیاتری بەخشیوە بەکاری رێکخستنی لە دەڤەرەکەماندا. بەهۆکاری ئەوەی هەرێمی راپەرین ناوچەیەکی ستراتیژی و بەرفراوانە و لەمێژووی کۆن ونوێدا شوێنگەیەکی گرنگ بووە بۆ خەبات  و تێکۆشانی نەتەوەیی و دیموکراتی بەهۆی هەڵکەوتەی ئەو دەڤەرە لەدامێنی چیایی قەندیل کە هەمیشە وەک قەڵایەکی شۆرشگێڕی خۆڕاگر بووە بۆ گەلی کورد و بەردەوام ناوەندێکی کارو چالاکی سیاسی و دیموکراتی و سەربازی بووە چ لەبەرامبەر داگیرکەرانی کوردستان بووبێت بەشێوەیەکی بەردەوامیش خەڵکە وڵاتپارێزەکەی لەبەرامبەر هێزە دەسەڵاتدارە خۆسەپێن و گەندەڵ و مشەخۆرە ناوخۆییەکان پێشەنگایەتیان کردووەو  بەشێوەی مەدەنیانە نادادی و ستەمکاریان رەتکردۆتەوە. 
هەروەک چۆن تەڤگەری ئازادی لەکاروخەباتی خۆیدا بە پێشەنگایەتی خەباتکارانی ژنان و گەنجانی وڵاتپارێز لەسەرجەم شارەکانی باشوری کوردستان بەچالاکی دیموکراتی و رێپێوانی جەماوەری پشتگیری و پشتیوانی خەباتی نەتەوەیی دیموکراتی بووە لە باکوری کوردستان و شۆرشی مەزنی رۆژئاواو بەرخودانی مەزنی مرۆڤایەتی لەکۆبانی، هه‌رێمی راپەرینیش ناوەندێکی گرنگی ئەو خەباتەبووەو لەماوەی ساڵێکدا ئەو چالاکیانە  بۆتە ناسنامە و ناسینەوە بۆی، لێره‌وە دەتوانین بەوشێوەیە كارو چالاکیەکان پۆلێن بکەین:
1- لەماوەی ساڵێکی کارو خەباتدا زیاتر لە ٢٠ ئەندام بەشداری خولی پەروەردەی ناوەندیان کردووە و لەهەرێمی راپەڕینیش خولی پەروەردەیی بۆ هەڤاڵانی تازە بەشداربوو ئەنجامدراوە و لە ناحیەی چوارقوڕنەو سەرکەپکان کۆمیتەی رێکخستنی پێکهاتووون.
2- سازکردنی دەیان چالاکی رێپیوان گردبوونەوە و لێدوان بۆ پشتگیری بەرخودانی گەریلا و شەرڤانان و پێشمەرگە لەبەرەکانی شەر دژ بەچەتەکانی داعش.
3- سازکردنی کۆرو سمینارلە شارو شارۆچکەکان لەسەر پرۆژەکانی تەڤگەری ئازادی بۆ چارەسەری قەیرانەکانی باشوری کوردستان. هه‌روه‌ها كه‌مپینی و چالاكی بۆ ئازادی رێبه‌ر ئاپۆ و شه‌رمه‌زاركردنی گه‌له‌كۆمه‌ی نێوده‌وڵه‌تی و گۆشه‌گیری و خراپبوونی دۆخی دانسوتاندن و پرۆسه‌ی چاره‌سه‌ری.
4- ئەنجامدانی کۆرو سمینار لەسەر بارودۆخی سیاسی و کۆمەڵایەتی و پێشهات و رووداوەکانی ناوچەکە بۆ روناکبیران و مامۆستایانی زانکۆ و چالاکانی مەدەنی.
5- سازدانی ئاهەنگ و مەراسیم لەیادو بۆنە نه‌تەوەیی و نیشتیمانیەکان و سەرکەوتنەکانی گەلەکەمان لەباکورو رۆژئاوای کوردستان. 
6- ئەنجامدانی کەمپینی پشتگیری و هاوکاری بۆ پێشمەرگە و گەریلا و شەرڤانانی یەپەگەو یەپەژە و یه‌به‌شه‌، هەروەها کەمپینی هاریکاری بۆ گەلی کۆچبەری شەنگال و مەخمور و رۆژئاوا.
7- بەشێوەیەکی بەردەوام لەدژی هێرشی فرۆکە جەنگیەکانی دەوڵەتی داگیرکەری تورکیا و کۆمەڵکوژیەکانی بۆسەر هاوڵاتیانی سڤیل لە هەرێمی قەندیل و ناوچەکانی تری کوردستان، خۆپێشاندان و ناڕەزایەتی شەرمەزارکردن ئەنجامدراوە، هەروەها لەبەرامبەر لەسێدارەدانی لاوانی کورد لەلایەن رژێمی سێدارەی ئێران بەشێوازی گردبوونەوە ریپێوان ئەو رەفتارە نامرۆڤانەیە شەرمەزارکراوە.
8- هەروەها خۆپێشاندان و ناڕەزایەتی لەدژی سیاسەتی نانەتەوەیی و نادیموکراتیانەی پارتی دیموکراتی کوردستان لەبەرامبەر شۆرشی رۆژئاوا و باکوری کوردستان و سیاسەتی گەمارۆو هەڵکەندنی خەندەق و بێدەنگی لەبەرامبەر سنوربەزاندن و کۆمەڵکوژیەکانی دەوڵەتی تورکیا.
9- ئەنجامدانی دەیان مەراسیم و بەڕێوەبردنی پرسەو پێشوازی بۆ شەهیدانی گەریلاو شەرڤانان و ئەنجامدانی چلە بۆیان، بەتایبەت شەهیدانی گەریلاو شەرڤانی هه‌رێمی راپەرین و بەشداربوون لە مەراسیم و پێشوازی سەرجەم شەهیدانی شەڕی دژ بە چەتەکانی داعش و سەردان و بەشداربوون لە پرسەی پێشمەرگە شەهیدەکان و سەردانکردنی بریندارەکان، هەروەها دەزگا تەندروستیەکانی هەرێمەکە بەردەوام هاوکاربوون لە کاتی گواستنەوە و مەراسیمی شەهیدان، جێی ئاماژەیە رێزگرتن و سازکردنی مەراسیمەکان بۆ شەهیدان کاریگەری زۆری لەسەر هەست و سۆزی گەل کردووەو بەڕێزەوە گەل بەشداریان تیاداکردووە، جگە لەوەش لە هەموو بۆنەو جەژنەکاندا گۆڕستانی شەهیدان و بنەماڵە سەربەرزه‌کانیان بەسەر کراونەتەوە.
10- بەهاوکاری کۆمیتەی  خانه‌واده‌ی شەهیدان مەراسیمی رێزلێنان و یاد كردنه‌وه‌ بۆ شەهیدانی هه‌رێمه‌كه‌ ئەنجامدراوە.
11- سەرجەم کاروچالاکیەکان بەهاوئاهەنگی و بەشداری و کاروچالاکی  پێکەوەیی لەگەڵ رێکخستنی گەنجانی وڵاتپارێز و  رەژاک و هەڤاڵانی رۆژئاوا و رۆژهەڵات هەبووە بۆ چالاکیە نەتەوەیی یەکان. هەروه‌ها چەندین کاروچالاکی جۆراوجۆر لەبه‌رامبه‌ر پێشێل کاری و توندووتیژی دژ به‌ژنان و نادادی کۆمەڵایەتی و پرسە سیاسی و کۆمەڵایەتیەکان و بژێوی و گەندەڵی ئەنجامدراون.
چواره‌م: هەڵسەنگاندنی کارو خەبات و رەخنە و رەخنەداین :
گومانی تێدانییە کارو خەبات و تێکۆشانیش بێ کەموکوڕی نابێت، لەگەڵ ئەوەی تەڤگەری ئازادی لەبارودۆخێکی هەستیار و پڕ گۆڕانکاری هاتە دامەزراندن، سەرەڕای شەڕی پاراستنی خاكی کوردستان بەهێزی پۆڵاینی گەریلا و پێشمەرگە و شەرڤانانی ئازادی لە بەرامبەر تیرۆرستانی داعش و داگیرکەران و سەرکەوتن بەسەریاندا کە بووە هۆی گەشەکردنی هەست و سۆزی نەتەوایەتی و بێواتاکردنی سنوورەکانی نێوان بەشەکانی کوردستان، کە بەخوێنی هەزارن شەهید لە باکور و باشور و رۆژهەڵات و رۆژئاوا هاتەبەرهەم. لەلایەکیتره‌وە سیستەمی حوکمڕانی باشوری کوردستان بەهۆی سیاستە حیزبی و خێڵەکی و قۆرخکاریی و گەندەڵییەکەی گەلیان رووبەڕووی دەیان کێشەی سیاسی و ئابوری و کۆمەڵایەتی و نەبوونی و قاتوقڕی و بێ هیوای کردۆتەوە کە لەمێژووی حوکمڕانیان لەباشوردا کەم وێنەبووە، لەسەرئاستی باشور تەڤگەری ئازادی وەک پێویستیەکی قۆناخ کە خاوەن پرۆژەو سیستەمێکی دیموکراتی و چارەسەری بووە  بۆ سەرجەم کێشەکان، بەڵام وەک پێویست نەتوانراوە ئەو بارودۆخە بەقازانجی رێکخستن وەرچەرخێنێت و داخوازی و ناڕەزایەتیەکان بەشێوەی رێکخراو ئاراستە بکات و چالاکانە رۆڵی پێشەنگایەتی ببینێت ئەوەش بۆ چەندین هۆکار دەگەڕێتەوە.
 بەرۆژەڤ نەکردنی جیهانبینی ئێمە و کەمی کادر بۆ ناساندنی پرۆژەی کۆنفیدرالیزمی دیموكراتی و خۆبەڕێوەبەری دیموکراتی و سیستەمی خۆبەریکخستنکردنی تەڤەگەری ئازادی وەک بەدیل و چارەسەری بۆ ئەو سیستەمە حوکمڕانە حیزبییە دەسەڵاتخوازە وابەستەیە بە داگیرکەران و نادیموکراتیە شکستخواردووە کە خودی خۆی لەجیاتی چارەسەر بووەتە سەرچاوەی کێشە و چەندین قەیران بۆ کۆمەڵگا. دروست نەکردنی ئەنجومەنی گەل بۆ دەستپێشخەری دیموکراتی و پێشڕەوایەتی کردنی داخوازی و ناڕەزایەتیەکانی چین وتوێژە رەنجده‌ره‌كان و مامۆستایان و فەرمانبەران. 
هەرچەندە تەڤگەری ئازادی خاوەن میراسێکی مێژووی و خەباتێکی نەتەوەیی و دیموکراتییە لە باشوری کوردستان، بەڵام سەرلەنوێ خۆڕێکخستنەوە لە سیستەمێکی نوێدا و خێرایی رووداو گۆڕانکاریەکان وایکرد نەتوانرێت لەناو گەلدا بەزووی خۆی بەڕێکخسن بکات و رۆڵی پێشەنگایەتی ببینێت بۆ چارەسەری قەیرانەکانی ئەمڕۆی کۆمەڵگا، سەرەڕای ئەوەی ئەندامی نوێ بەشداری کاروخەبات بوون، بەڵام نەمانتوانیوە لەئاستی سیاسی و جڤاکیدا  هەنگاوی گەورە بهاوێژین، هەروەها کەمتەرخەمی کرا لەوەی نەتوانرا خۆمان بگەێنینە بەشێکی زۆر لەشار و شارۆچکە و گوندەکانی سنوری هه‌رێمی راپەڕین بەهۆی داخراوبوونی کۆمیتەکان بەخەباتی ناوشارەکان و تەرخان نەکردنی کاتی پێویست لەلایەن ئەندامان و خەباتکاران بۆ کاری رێکخستن، بەهۆی دابەش نەکردنی کارەکان خەمساردی هەندێک لە ئەندامان بەهۆکاری پابه‌ند بوون به‌دەوام و بژێویانەوە زۆربەی کات گرانایی کار دەکەوێتە سەرشانی چەند هەڤاڵیک.
لێرەدا بەرۆحێکی بەرپرسیارانەوە رەخنەی خۆمان لە بەرامبەر کۆنفرانسدا دەدەین و خۆمان بەرپرسیار دەبینین لەبەرامبەر کەموکورتیەکان، بێگومان ئەگەر بەشێوەیەکی باشترخۆمان بەڕێکخستن و پلانڕێژتر بکردبوایە خۆمان گەیاندبوایە زێده‌تر لە خەڵکی دەڤەرەکەو چین وتوێژە جۆراوجۆرەکانی کۆمەڵگا ئەوا دەرفەت هەبوو کە بتوانرێت ئامادەکارییەکانی کۆنفرانس لەئاستێکی باشتردا ده‌بوو. هه‌روه‌ها بەڵێندەدەین لەقۆناخی داهاتوودا بڕیارەکانی کۆنفرانس و ئەرکەکانمان لەسەر هەموو کارە تەواو نەکراوەکان بەپلان و پرۆژەی پێویست و بەرۆحێکی سەفه‌ربەری جێبەجێبکەین و لە هەرێمەکەماندا بۆ خەباتێکی نەتەویی دیمکراتی پێشەنگ بین، هه‌مانكات تەڤگەری ئازادی بکەینە وەڵام دەرەوەی ئەو قۆناخە پڕکێشە و قەیرانەکە لە هەموو ئاستێکدا گەلەکەمانی رووبەڕووی ژیانێکی دژوار کردۆتەوە ئەوەش تەنها بە بنەماگرتنی ئیرادەی گەل و خۆبەڕێوەبردنی دیموکراتیانە دەستەبەردەبێت ئەوەش لەم قۆناخەدا تەنها بەهزرو و بیری رێبەر ئاپۆ و شوێنکەوتوانی ئەو رێبازە دێتەدی.
ئەنجام و چاره‌سه‌ری كێشه‌كان:
  وه‌ك ئه‌ركێكی رێكخستنی و هه‌نگاونان بۆ ده‌سپێكردنی قۆناخێكی نوێ  له‌كاروخه‌باتی ته‌ڤگه‌ری ئازادیدا، کۆمیتەی ئامادەکردنی کۆنفرانس لەچوارچێوەی ئەنجامدانی بڕیارەکانی کۆبونەوەی جڤاتی گشتی ناوبەر بۆ ئەنجامدانی کۆنفرانسی هەرێمەکان لەسەرەتایی مانگی ١٢ ی ٢٠١٥ بە هاوبەشی لەگەڵ کۆمیتەی گشتی کۆنفرانسەکان پێكهات، هه‌مانكات کۆمیتەی ئامادەکاری کۆنفرانسی هەرێمی راپەڕین بەنوێنەرایەتی ١٥ ئەندام لە کۆمیتەکان و دەستەو ناوەندەکانی کاروخەبات پێکهات و دەستی بەئامادەکاری کردوو هەر حەوت رۆژ جارێک کۆبۆتەوەو پلان وکاری رۆژانەی داڕشتووە و کۆمیتەی راگەیاندن و پەروەردە و کۆمیسیۆنی نووسینی راپۆرت و  پەیوەندی و راگەیاندنی دروست کردوه‌، هه‌مانكات دەستیان بەکارەکانی خۆیانکردوە، هەروەک لە پەیماننامەو پەیڕەوی ناوخۆی ئەنجومەنی هەرێمیدا هاتووە، سەرەتا دەستکرا بەخولی پەروەردە لەسەر پەیڕەوی ناوخۆی ئەنجومەن بۆ کۆنفرانس بۆ ئەو ئەندامانەی بەشداری کۆنفرانس دەبن و بە جۆرێک کە هەر ئەندامێک دەبێت بەو پەروەردانەدا تێبپەڕێت، خولەکان لەشاری قەڵادزێ  و رانیە و  چوارقوڕنە  و حاجیاوا بەڕێوەچوون و زیاتر لە ٨٠ ئەندام بەشداریان تیاداکردووە، هەروەها رێکخستنی گەنجانیش لەچوارچێوەی هەمان پلاندا بەشداربوونە، بەشێکیتر لە کارەکان، سەردان کردن و گفتوگۆکردن  لەگەڵ کەسانی وڵاتپارێز و نیشتمان پەروەر و ئەندامی نوێ کە پەیماننامەی تەڤگەری ئازادیان بۆکاروخەبات و تێکۆشان قبوڵ کردووە، بەشێوەیەکی گشتی کۆمیتەی ئامادەکار لەئاستێکی باشدا گەیشتۆتە تەواوی ئەو ئەنجامەی کە بۆ سەرکەوتنی کۆنفرانس دیاریکردبوو.
ئەمڕۆش کەهەموومان بۆ ئەنجامدان و سەرخستنی ئەم کۆنفرانسە  لێرە کۆبووینەتەوە بەرهەمی کاروخەباتی کۆمیتەی ئامادەکار و سەرجەم هەڤاڵانی ئەم هه‌رێمه‌یه‌ کە بەرۆحیەتی راپەڕینەوە ئامادەی پەیمان دانیین بۆ وەرگرتنی ئەرک و بەرپرسیاریەتی کە کۆنفرانس دەخاتە سەرشانمان. لەسەر ئەو بنەمایە ئێمە خۆمان بە قەرزاری شەهیدان و گەل و هێزە شۆرشگێڕ و گەریلا و شەرڤان و پێشمەرگە و رێبەر ئاپۆ دەزانین بۆیە لە حزوری ئامادەبوانی کۆنفرانسدا پەیمان دووپاتدەکەینەوە کە بەهەموو هێز و توانامانەوە بەردەوام دەبین لەپشتگیری و پشتیوانی لە خەباتی نەتەوەیی و دیموکراتی لە چوارپارچەی کوردستان و ئەو بەرخودانە شکۆدارەی کە ئەمڕۆ لە باکور و رۆژئاواو شەنگال بەڕێوەدەچێت، هەروەها خەباتدەکەین بۆ سەرخستنی سیستەمی تەڤگەری ئازادی کۆمەڵگای کوردستان له‌ هه‌رێمه‌كه‌مان و ته‌واوی باشوری كوردستاندا.

                           کۆمیتەی ئامادەکاری کۆنفرانسی هەرێمی  ڕاپەرین 
                                             8/1/2016
-------------------------------------------------------------------------------------------------------------------------------------------------------------------


به‌ڵێن دووپات كردنه‌وه‌ بۆ تێكۆشان و شۆرشی دیموكراتی له‌ كوردستان

له‌سه‌ربنه‌مای به‌جێكردنی پێوانه‌كانی شۆرشی دیموكراتی، سه‌رخستنی هێلی سیاسه‌تی دیموكراتی، پێوانه‌كانی ئازادی ژن و ئازادی كۆمه‌ڵگا، وه‌ك پره‌نسیبێكی سه‌ره‌كی بۆ خۆم ده‌بینم، تێكۆشان له‌ سیسته‌می كۆنفیدالیزمی دیموكراتی وه‌ك رێگای رزگاری بۆ خۆم ده‌بینم، بۆیه‌ وه‌ك هه‌ڤاڵێك كه‌ خۆم ئه‌ركدار ده‌بینم بۆ خزمه‌ت كردنی گه‌ل و وڵاته‌كه‌م، له‌سه‌ر رێگای شه‌هیدان و سه‌رۆك ئاپۆ و هه‌ڤاڵانی ناو سه‌نگه‌ری تێكۆشان و رێبازی ته‌ڤگه‌ری ئازادی كۆمه‌ڵگای كوردستان،په‌یمان به‌ رێبازی شه‌هیدان و به‌ها مرۆڤایه‌تیه‌كان كه‌ تاسه‌ركه‌وتن به‌هه‌موو توانام بێ كه‌مته‌رخه‌می، له‌ تێكۆشان به‌رده‌وام ده‌بم.
له‌سه‌ر ئه‌و بنه‌مایه‌ به‌ڵێن دووپات ده‌كمه‌وه‌:
به‌ڵێنده‌ده‌م به‌ فه‌لسه‌فه‌ و هزری رێبه‌ر ئاپۆ
به‌ڵێن بۆ رێبازی شه‌هیدانی كوردستان
به‌ڵێن بۆ گه‌لی كوردی وڵاتپارێز
به‌ڵێن به‌ په‌یماننامه‌ی ته‌ڤگه‌ری ئازادی كۆمه‌ڵگای كوردستان
به‌ڵێن ده‌ده‌م، به‌ڵێن ده‌ده‌م ، به‌ڵێن ده‌ده‌م










چه‌ند هه‌واڵكی تر

‌په‌یماننامه‌ی ته‌ڤگه‌ری ئازادیی...

‌ئەنجومەنی گەرمیانی تەڤگەری ئازادیی پرۆژە و پێشنیاری خۆی بۆ ساڵی داهاتو...

‌تێدەکۆشین بەڕۆحییەتی ئەو رۆژانەی کە راپەرینی پێنجی ئازاری تێدا سەرکەوت...

‌17 ی شوبات قۆناغێکی مێژوویی بوو له‌ خه‌باتی جه‌ماوه‌ریی هه‌رێمی كوردست...

‌به‌ڕۆحى به‌رخودانى ئیمراڵى و عه‌فرین پلانگێری نێوده‌وڵەتى 15ی شوبات پو...

‌هه‌ڵوێستی ته‌ڤگه‌ری ئازادیی بۆ ڕه‌وشی هه‌رێمی كوردستان...

‌پرۆژه‌ پێشنیاری په‌سه‌ندکراوی یه‌که‌مین کۆنفرانسی هه‌رێمی گه‌رمیانی ته...

‌پرۆژه‌ پێشنیاری په‌سه‌ندکراوی یه‌که‌مین کۆنفرانسی هه‌رێمی گه‌رمیانی ته...

‌پڕۆژه‌‌ په‌‌سنه‌‌د کراوی یه‌که‌مین کۆنفرانسی هەرێمی کەرکوک...

‌په‌یره‌وى ناوخۆى په‌سه‌ندکراوى یه‌که‌مین کۆنفرانسى هه‌رێمى سلێمانى...

‌به‌ڵگه‌کانی یه‌که‌مین؛ کۆنگره‌ی"ته‌ڤگه‌ری ئازادی کۆمه‌ڵگای کوردستان" "...

‌په‌یماننامه‌ی ته‌ڤگه‌ری ئازادی کۆمه‌ڵگای کوردستان (ته‌ڤگه‌ری ئازادی)...

1
په‌ڕه‌یله‌ 1
ژماره‌ی بابه‌ت

كه‌ش و هه‌وا

فەیسبووك