کوردی           عربی

په‌یره‌وى ناوخۆى په‌سه‌ندکراوى یه‌که‌مین کۆنفرانسى هه‌رێمى سلێمانى‌

18/01/2016

Wednesday‌

ته‌ڤگه‌رى ئازادى  کۆمه‌ڵگاى کوردستان
دیوانى به‌رێزى کۆنفرانس:
به‌رێزان ئه‌ندامانى کۆنفرانس:
سڵاوى شۆڕش‌و کارو تێکۆشانتان لێ بێت:
له‌سه‌ر بنه‌مانى په‌یماننامه‌ى ته‌ڤگه‌رى ئازادى کۆمه‌ڵگاى کوردستان بۆ پێکهاته‌‌و ته‌واوکردنى په‌یکه‌رى رێکخستنى، هه‌روه‌ها ئه‌و بارودۆخه‌ گێژاو‌و قه‌یراناویه‌ى که‌ ئه‌مڕۆ باشورى کوردستانى پێدا تێده‌په‌ڕێت، له‌ تێکچونى سیسته‌مى سیاسى، گه‌نده‌ڵى ئیدارى خراپبوونى بژێوى هاوڵاتیان، له‌گه‌ڵ ئه‌وانه‌دا سه‌لمێنراوه‌ که‌ سیسته‌مى حیزبگه‌رایى تاکڕه‌‌و‌و خۆسه‌پێن‌و نادیموکرات‌و دوور له‌پێوانه‌کانى ئازادى‌و پێوانه‌کانى مافى مرۆڤ‌و مافه‌ گه‌ردوونیه‌کان، به‌تایبه‌ت له‌ کوشتنى ژنان‌و بێ ڕۆڵکردن‌و گرنگینه‌دان به‌ ژیانى گه‌نجان، قه‌یرانى سیسته‌مى پاراستنى له‌به‌ر به‌ حیزبى کردنى، بۆیه‌ داڕشتنه‌وه‌‌و رێکخستنه‌وه‌ى له‌سه‌ر بنه‌ماى پاراستنى ره‌وا‌و جه‌وهه‌رى به‌رێکخستن بکرێته‌وه‌. به‌ دامه‌زراوه‌ نه‌کردنى سیسته‌مى سیاسى له‌ هه‌رێمى کوردستان، واى کردووه‌ که‌ سیسته‌مى سیاسى رووبه‌ڕووى هه‌ڵوه‌شانه‌وه‌ ببێته‌وه‌.
بێگومان هه‌رێمه‌که‌یشمان وه‌ک هه‌رێمى سلێمانى پشکى هه‌ره‌ گه‌وره‌ى له‌ هه‌موو ئه‌و قه‌یرانانه‌ى که‌ رووبه‌ڕووى هه‌رێمى کوردستان بۆته‌وه‌ به‌گشتى به‌ر که‌وتووه‌. به‌تایبه‌ت له‌رووى سیاسیه‌وه‌ به‌هۆى ئه‌و ئه‌قڵیه‌ته‌ى که‌ زاڵه‌ له‌م هه‌رێمه‌ کێشه‌کانى قووڵتر کردۆته‌وه‌ که‌ ده‌توانین بڵێین خۆى ده‌بینێته‌وه‌ له‌ سیاسه‌تێکى دووفاقى‌و قووڵکردنه‌وه‌ى هه‌رێمچێتى‌و ده‌سته‌گه‌رێتى ئه‌مه‌ش ده‌گه‌ڕێته‌وه‌ بۆ ئه‌نجامى ئه‌و ئاراسته‌ چه‌وته‌ سیاسى‌و ئیدارى‌و باوه‌ڕ به‌خۆنه‌بوونه‌، له‌لایه‌کى تریشه‌وه‌ ره‌نگدانه‌وه‌‌و به‌رده‌وامبوونى ململانێکان له‌ سلێمانیدا له‌ قۆرخکردنى بژێوى کۆمه‌ڵگا‌و قوت‌و ره‌نجى خه‌ڵک به‌گوێره‌ى به‌رژه‌وه‌ندى ده‌سته‌گه‌رێتى که‌ زاڵه‌ له‌ هه‌رێمه‌که‌ماندا. هه‌روه‌ها کۆمه‌ڵگا به‌ حیزبى کردن‌و حساب نه‌کردن بۆ مافى هاوڵاتى‌و پێوه‌ر‌و بنه‌ماکانى ئازادى بیروڕا‌و کپکردنى ده‌نگى ئازادى دیموکراتى. له‌م پێناوه‌شدا به‌ رووبه‌ڕوو کردنه‌وه‌ى بازاڕ به‌ داڕمانێکى مه‌ترسیدار‌و دروستکردنى قات‌و قڕى‌و کۆچى به‌کۆمه‌ڵ به‌تایبه‌تیش کۆچى گه‌نجان که‌ به‌رده‌وامى هه‌یه‌ له‌ کاتێکدا گه‌وره‌ترین داینه‌مۆن بۆ پێشه‌نگایه‌تى‌و گۆڕانکارى له‌ کۆمه‌ڵگادا  ئه‌مه‌ش بێ هیواییه‌کى ترسناکى لاى تاکى هه‌رێمه‌که‌مان دروست کردووه‌. 
له‌ لایه‌کى تریشه‌وه‌ شار‌وشارگه‌راییو بوون به‌ ناوه‌ند، که‌ ده‌رهاویشته‌ی سیسته‌مى مۆدیرنیته‌ی                سه‌رمایه‌دارین و به‌هه‌ڵه‌ ئاراسته‌کردنى هه‌وڵدانی زانسته‌ کۆمه‌ڵایه‌تییه‌کان، هێنان‌و بڵاوکردنه‌وه‌ى چه‌مکى ته‌قلیدى‌و تاکگه‌رایى‌و به‌ بنه‌ماگرتن‌و زاڵکردنى چه‌مکى بینین‌و رووکه‌ش به‌سه‌ر فکر‌و زیهندا، کراونه‌ته‌ شێرپه‌نجه‌یه‌ک‌و رۆژانه‌ به‌شێوه‌یه‌کى مه‌ترسیدار بڵاوکراونه‌ته‌وه‌، به‌تایبه‌تیش گه‌نجان‌و ژنان ئامانج‌و قوربانى سه‌ره‌کى بوون. 
به‌مشێوازه‌ قاڵبوونه‌وه‌ له‌ شارنشینی و شارگه‌راییو دروستکردنى ناهاوسه‌نگیه‌کى مه‌ترسیدار له‌ نێوان گوند‌و شاردا بێ پێوان و به‌دوور له‌ میکانیزمایه‌کی زانستیانه‌و نا ته‌ندروست، نه‌بووه‌ته‌ هۆی گۆرانکاریه‌کی ڕیشه‌یی و ته‌نها له‌ دروشم و تیۆریدا به‌رجه‌سته‌بووه‌و ده‌رئه‌نجامێکی ته‌مومژاوی کۆمه‌ڵایه‌تی، ئابووری، سیاسی و که‌لتووری له‌ ژینگه‌ی شارو قه‌زاو ناحیه‌کانی باشووری کوردستان و شاری سلێمانی به‌تایبه‌ت ره‌نگیداوه‌ته‌وه‌، له‌م ڕوانگه‌وه‌ ئه‌وه‌ی ده‌توانێت ببێت به‌ پاڵنه‌ری سه‌ره‌کی له‌ گۆرانکارییه‌ ڕیشه‌ییه‌کاندا به‌رجه‌سته‌کردنی ئیراده‌ی کۆمه‌ڵگایه‌ له‌سه‌ر خۆبه‌ڕێوه‌بردنێکی ئازادو دیموکراتیدا، تاکوو هه‌موو چین و تۆێژه‌کانی کۆمه‌ڵگا به‌ پێشه‌نگایه‌تی ژنان و گه‌نجان له‌ هه‌رێمی ڕۆشنبیری به‌ سیسته‌می کۆنفیدرالیزمی دیموکراتی هه‌نگاو به‌ره‌و ژیانێکی ئازادو دیموکراتی و دادپه‌روه‌ر بنێن.
بۆیه‌ بۆ به‌دیهێنانی ئه‌م راستیه‌ش له‌ڕێگای میکانیزمای په‌روه‌رده‌، ڕێکخستن و چالاکی به‌ره‌و کۆمه‌ڵگایه‌کی هۆشیار هه‌نگاو ده‌نێین‌و ده‌بینه‌ هێزێکى سه‌ره‌کی له‌ ڕووبه‌ڕووبوونه‌وه‌ی کێشه‌کانی جڤاکداو به‌ ئاواکردنی ئه‌نجومه‌نه‌کان و به‌ده‌زگاکردنی دیموکراتی ڕاسته‌وخۆ بناخه‌ی هه‌رێم و شارێکی ڕۆشنبیری ڕیشه‌یی بونیاد ده‌نێین.

پره‌نسیپه‌ بنچینه‌ییه‌کانی ئه‌نجومه‌ن:
1 ـ له‌ ‌قۆناخی راگوزاریدا تا گه‌یشتنی جڤاک به‌ ‌سیسته‌می دیموکراتی خۆی؛ فۆرمیله‌ی (ده‌وڵه‌ت + دیموکراتی) پره‌نسیپی تێکۆشانی به‌ ‌ده‌زگابوونی دیموکراتیی و سنووردارکردنی هه‌ژموونی ده‌سه‌ڵاتدارێتییه‌. بۆیه‌ ‌رووخانی سیسته‌می ده‌سه‌ڵاتدارێتی (ده‌وڵه‌تگه‌رایی) یان ته‌سلیمبوون به‌و سیسته‌مه‌ ‌به‌ ‌ئامانج وه‌رناگیرێت؛ به‌ڵکو له‌ سه‌ر بنه‌مای پره‌نسیپی ئاوێته‌بوونی (په‌یوه‌ندی ـ ناکۆکی) نێوان (ده‌وڵه‌ت + دیموکراتی) دا ئاستی په‌سندکردن و رێزگرتنیان به‌رامبه‌ر به ‌یه‌کتری ده‌ستنیشان ده‌کات.
2 ـ بوونی هه‌مه‌ڕه‌نگی و هه‌مه‌چه‌شنه‌یى کلتور (چانده‌کان) سروشتی جڤاکێکی پێشکه‌وتنخوازه‌. بۆیه‌ له ‌ئاستی ئه‌قڵییه‌ت و چه‌مکدا، ژیان و کاردا، ماف و ئازادییه‌کاندا؛ دژی هه‌موو جیاکارییه‌کی نه‌رێنییه‌ ‌که‌ ‌له‌سه‌ر بنه‌مای ره‌گه‌زو ره‌نگ، زمان و شێوه‌زار، چین و توێژ، نه‌ته‌وه‌ و نه‌ژاد، ئایین و ئایینزا بسه‌پێنرێت و په‌یڕه‌و بکرێت.
3 ـ دژی هه‌موو جۆره‌ داگیرکاری و پاوانخوازییه‌کى کلتورى فه‌رهه‌نگییه‌ به‌ هه‌موو به‌شێوازه‌کانی قڕکردن، نکۆڵیکردن، تواندنه‌وه‌، برسیکردن، بێکارکردن... هتد) خۆی ده‌سه‌پێنێت.
4 ـ جاڕنامه‌ی گه‌ردوونی مافه‌کانی مرۆڤ، نۆڕمی سێ نه‌وه‌ی مافه‌کانی مرۆڤ (مافه‌کانی مه‌ده‌نی و سیاسی، ئابووری و کۆمه‌ڵایه‌تی و رۆشنبیری، ژینگه‌و گه‌شه‌پێدانی مرۆیی) و سه‌رجه‌م پێوانه‌ پێشکه‌وتووه‌کانی ماف و ئازادی مرۆڤ و جڤاکه‌کان په‌سه‌ند ده‌کات و خاوه‌ندارێتی لێ ده‌کات.
5 ـ بۆ هه‌موو تاک و جڤاکێک مافی خۆپاراستنی گه‌وهه‌ری بنچینه‌ی هه‌موو مافه‌کانه‌، گه‌وره‌ترین پێشێلکاری مافه‌کان خۆنه‌پاراستنه‌.
6 ـ له‌ ده‌ره‌وه‌ی مافی پاراستنی ره‌وا دژی هه‌موو جۆرو شێوازو ئامرازه‌کانی توندوتیژییه‌.
ئه‌رک و ئامانجی ئه‌نجومه‌ن:
ئه‌رکی ئه‌نجومه‌نی هه‌رێمه‌کانه‌ له‌گه‌ڵ به‌یه‌که‌وه‌ به‌ستنه‌وه‌ی ته‌واوی ئه‌و کاروخه‌باتانه‌ی له‌ هه‌رێمه‌که‌ ئه‌نجام ده‌درێن، هه‌مانکات پرۆژه‌و پلان به‌هاوکاری له‌گه‌ڵ کۆمیسیۆن و کۆمیته‌کان ده‌رده‌خاو له‌ جێبه‌جێکردنیشیاندا خۆی به‌رپرسیار ده‌بینێ. 
هه‌وڵده‌دات خۆی بگه‌یه‌نێته‌ هه‌موو چین و توێژو ئاین و ره‌نگه‌ جیاوازه‌کانی ده‌ڤه‌ره‌که‌ی، له‌سه‌ر ئه‌و بنه‌مایه‌ش ده‌بێته‌ جێگای کۆکردنه‌وه‌ی ده‌نگه‌ چالاکوان و ناڕازی و دیموکرات و ئازادیخوازه‌کان.  پرسه‌کانی کۆمه‌ڵگا له‌ کێشه‌ کۆمه‌ڵایه‌تیه‌کان، تێکۆشان بۆ ئازادی ره‌گه‌زی و هاوسه‌نگ بوونی ئازادی تاک و کۆمه‌ڵ، رووبه‌ڕوو بوونه‌وه‌ی گه‌نده‌ڵی، یه‌کێتی و پێکه‌وه‌ ژیانی دیموکراتیانه‌ی ئاین و ئاینزاو گه‌ل و نه‌ته‌وه‌ جیاوازه‌کان، بۆ ئه‌و مه‌به‌سته‌ش ده‌نگی خۆی له‌ رێگای کۆڕو کۆبوونه‌وه‌و سیمینارو گردبوونه‌وه‌و بایکۆتکردن و خۆپیشاندان نیشان ده‌دات، له‌پێناو خاوه‌ن ده‌رکه‌وتن له‌ نرخ و مافه‌کانی کۆمه‌ڵگا هه‌موو هێزو توانای ده‌خاته‌ گه‌ڕ.
1 ـ تێکۆشانی دیموکراتی و به‌رگری خۆیی (جه‌وهه‌ری) به‌ بنه‌ما وه‌رده‌گرێت ‌و له‌نێو جڤاکدا دیموکراتی ده‌گه‌یه‌نێته‌ ئاستی به‌ده‌زگابوون و سیسته‌می کۆنفیدراڵی دیموکراتی جڤاک و خۆبه‌ڕێوه‌به‌رێتی دیموکراتی به‌ بنچینه‌ وه‌رده‌گرێت.
2 ـ له‌پێناو بونیادنانی جڤاکێکی ئازادو دیموکرات و ژینگه‌پارێزدا دیموکراتیزه‌بوونی تاک و کۆمه‌ڵگاو هاوسه‌نگی نێوان مرۆڤ و ژینگه‌ به‌ بنچینه‌ وه‌رده‌گرێت.
3 ـ له‌ پێناو به‌رگریکردن له‌ سه‌رجه‌م ماف و ئازادییه‌ تاکه‌که‌سی و جڤاکییه‌کاندا تێده‌کۆشێت.
4 ـ له‌ پێناو یه‌کسانی و دادپه‌روه‌ری جڤاکیدا پێشه‌نگایه‌تی تێکۆشانی یه‌کسانیخوازو دادپه‌روه‌ریخوازانه‌ی چین و توێژه‌ ره‌نجده‌رو کرێکارو چه‌وساوه‌کان ده‌کات.
5 ـ له‌تێکۆشانی خۆیدا ئه‌قڵییه‌تی هاوسه‌نگی ره‌گه‌زی  و رێبازی ئازادی ژن به‌بنه‌ ماوه‌رده‌گرێت. له‌ پێناوی ئه‌وه‌ی ژن ناسنامه‌و ئیراده‌ی خۆی به‌ده‌ستبێنێته‌وه‌و پێشه‌نگایه‌تی بونیادنانی جڤاکێکی ئازادو یه‌کسان و دادپه‌روه‌ر بکات پێشخستنی ته‌ڤگه‌ری ئازادی ژن به‌ ئه‌رک و ئامانجی خۆی ده‌بینێت.
6 ـ له‌ تێکۆشانی خۆیداو له‌ وه‌رگرتنی هه‌موو بڕیاره‌کانیدا یه‌کێتی نه‌ته‌وه‌یی دیموکراتی و به‌رژه‌وه‌ندی باڵای سه‌رتاسه‌ری کوردستان به‌بنچینه‌ وه‌رده‌گرێت.
7 ـ له‌ پێناو ئه‌وه‌ی گه‌نجان ببنه‌ خاوه‌ن که‌سێتییه‌کی ئازادو به‌ئیراده‌و ده‌ستپێشخه‌ری و پێشه‌نگی ئاواکردنی جڤاکێکی سیاسی ـ ئه‌خلاقی پێشخستنی ته‌ڤگه‌ری دیموکراتی گه‌نجان به‌ ئامانجی خۆی ده‌بینێت.
8 ـ له‌ پێناو دابینکردنی ژیانێکی ئاسووده‌و ئارام بۆ پیرو په‌ککه‌وته‌، منداڵ و خاوه‌ن پێداویستییه‌ تایبه‌ته‌کان تێده‌کۆشێت.
پێکهاته‌و ئه‌رکه‌کانی کۆنفرانس:
1  ـ له‌ سه‌ر بنه‌مای په‌یماننامه‌ی ته‌ڤگه‌ری ئازادی ساڵانه‌ کۆنفرانسی هه‌رێمی ئه‌نجام ده‌درێت، هه‌ڵسه‌نگاندن بۆ دۆخی هه‌رێمه‌که‌ی ده‌کات و ده‌گاته‌ بڕیاری پێویست، هه‌روه‌ها هه‌ڵبژاردن بۆ ئه‌نجومه‌ن و هاوسه‌رۆک و ده‌سته‌ی دسپلین بکات.
2 ـ به‌شداربووانی کۆنفرانس پێویسته‌، ئه‌ندامانی ته‌ڤگه‌ری ئازادی، خه‌باتکارانی ژنان و گه‌نجان، هه‌مانکات هه‌موو ئه‌وانه‌ی به‌شداری کۆبوونه‌وه‌کانی جڤاتی گشتی بوونه‌، له‌گه‌ڵ رێژه‌یه‌ک له‌و وڵاتپارێزه‌ نزیکانه‌ی که‌ به‌شدارن له‌ چالاکیه‌کانمان و په‌یماننامه‌ی ته‌ڤگه‌ر گونجاو ده‌بینن.
3 ـ  بۆ ئه‌نجامدانی کۆنفرانس کۆمیته‌ی ئاماده‌کار دیوانێک بۆ به‌ڕێوه‌بردنی کۆنفرانس له‌ ئه‌ندامانی کۆنفرانس به‌ هه‌ڵبژاردنی راسته‌وخۆ دیاری ده‌کات.
4 ـ هه‌ر هه‌رێمێک راپۆرتی ساڵێکی کاروخه‌باتی ئه‌نجومه‌نی کاتی پێشکه‌شی کۆنفرانس ده‌کات.
5 ـ په‌یڕه‌وی ناوخۆ دوای خوێندنه‌وه‌‌و گفتوگۆکردنی پێویسته‌ به‌ ده‌نگدانی زۆرینه‌، کۆنفرانس په‌سندی بکات.
6 ـ له‌ کۆنفرانس کۆمیسیۆنێک هه‌ڵده‌بژێردرێت بۆ ئه‌نجامدانی هه‌ڵبژاردنه‌کانی ئه‌نجومه‌ن. ده‌نگدان به‌ نهێنیه‌و ژماردن به‌ ئاشکرایه‌.
په‌یکه‌ری ئه‌نجومه‌ن و ئه‌رکه‌کانی:
 1 ـ ئه‌نجومه‌ن له‌ کۆنفرانس هه‌ڵده‌بژێردرێ و هه‌ر له‌وێش به‌ڵێن ده‌دات.
2 ـ ئه‌نجومه‌ن له‌ (٢٥) که‌س پێک دێت، له‌گه‌ڵ رێکخستنی ژنان و گه‌نجان و به‌ڕێوه‌به‌ری کۆمیته‌و رێکخراوه‌‌کان دیاری ده‌کرێت، هه‌روه‌ها ئه‌و کۆمیتانه‌ی له‌ داهاتوو زیاد ده‌بن به‌ڕێوه‌به‌ره‌کانیان ده‌بنه‌ ئه‌ندامی ئه‌نجومه‌ن. ئه‌ندامانی ئه‌نجومه‌ن دابه‌شده‌کرێنه‌ سه‌ر کۆمیسیۆنه‌کان.
3 ـ کۆتای ره‌گه‌زی به‌شێوه‌یه‌کی هاوسه‌نگ به‌پێى په‌یماننامه‌ى ته‌ڤگه‌رى ئازادى ره‌چاوده‌کرێت، له‌گه‌ڵ رێژه‌ی 25% بۆ گه‌نجان له‌ ئه‌نجومه‌ن و کۆمیسیۆنه‌کان.
4 ـ ئه‌نجومه‌ن دوومانگ جارێک کۆبوونه‌وه‌ی خۆی ده‌کات و له‌ رێگای هاوسه‌رۆکه‌وه‌ راپۆرت پێشکه‌شی ناوه‌ندی رێکخستن ده‌کات. هه‌مانکات چاودێری کاره‌کانی ته‌واوی دامه‌زراوه‌ رێکخستنیه‌کان ده‌کات له‌ هه‌رێمه‌که‌ی.
5 ـ ئه‌نجومه‌ن به‌رپرسیاره‌ له‌ پلانکردنی کاروخه‌باتی هه‌رێمه‌که‌ی و رێکخستن و سه‌رخستنی، هه‌موو کۆسپ و ته‌گه‌ره‌کان به‌شێوازی رێکخستنی رووبه‌ڕوو ده‌بێته‌وه‌. جێبه‌جێکاری بڕیاره‌کانی جڤاتی گشتی و کۆنفرانسی هه‌رێمیه‌.
پێکهاته‌و ئه‌رکه‌کانی ده‌سته‌ی کارگێڕی:
1 ـ ده‌سته‌ی کارگێڕی له‌ناو ئه‌نجومه‌ن هه‌ڵده‌بژێردرێت، ژماره‌یان له‌"5" که‌س پێک دێت. له‌ناو خۆیدا ئه‌رک دابه‌ش ده‌کاو سه‌رپه‌رشتی هه‌موو کاروخه‌باتی هه‌رێمه‌که‌ی ده‌کات، له‌گه‌ڵ ئه‌نجومه‌ن به‌هه‌م ئاهه‌نگی کارده‌کات و جێبه‌جێکاری بڕیاره‌کانی ئه‌نجومه‌نه‌.
2 ـ مانگانه‌ به‌ هاوبه‌شی له‌گه‌ڵ به‌رپرسیاری کۆمسیۆن و کۆمیته‌کان کۆبوونه‌وه‌ ده‌کات، راپۆرتی خۆی پێشکه‌شی ئه‌نجومه‌نی هه‌رێمی ده‌کات.
 3 ـ هه‌ر کاتێک ده‌سته‌ی کارگێڕی یان هه‌رئه‌ندامێکی که‌مته‌رخه‌م بوو، یان کاره‌کانی جێبه‌جێ نه‌کرد، له‌ ئه‌رک ده‌گیردرێت و ئه‌نجومه‌ن هه‌ڵبژاردنی ترئه‌نجام ده‌دات.
هاوسه‌رۆک، ئه‌رک و به‌رپرسیاریه‌تیه‌کانی:
1 ـ له‌ ژنێک و پیاوێک پێک دێت، له‌کۆنفرانس هه‌ڵده‌بژێردرێن و به‌هاوبه‌شی له‌گه‌ڵ ئه‌نجومه‌ن و ده‌سته‌ی کارگێڕی کارده‌که‌ن و هه‌مان کات سه‌رپه‌رشتیکار و خه‌باتی ئه‌نجومه‌ن و کۆمیسیۆن و کۆمیته‌کان ده‌که‌ن.
2 ـ ئه‌رکداره‌ له‌ جێبه‌جێکردنی بڕیارو پلانه‌کانی ئه‌نجومه‌ن و ده‌سته‌ی کارگێڕی، هه‌مان کات پره‌نسیپی کاری هه‌ره‌وه‌زی به‌ بنه‌ما وه‌رده‌گرێت. 
3 ـ کاتی کۆبوونه‌وه‌کانی ئه‌نجومه‌ن و ده‌سته‌ی کارگێڕی به‌ هاوبه‌شی له‌گه‌ڵ ده‌سته‌ی کارگێڕی دیاری ده‌که‌ن و سه‌رپه‌رشتی کۆبوونه‌وه‌کانی ئه‌نجومه‌ن و ده‌سته‌ی کارگێڕی ده‌که‌ن.
4 ـ دوو مانگ جارێک به‌ڕاپۆرت به‌شداری کۆبوونه‌وه‌ی ناوه‌ندی رێکخستن ده‌بن .
ده‌سته‌ی دسپلین ، ئه‌رک و به‌رپرسیاریه‌تی:
1 ـ ده‌سته‌ی دسپلین له‌ 3 که‌س پێک دێت‌و له‌ کۆنفرانس هه‌ڵده‌بژێردرێت.
به‌ هاوبه‌شی له‌گه‌ڵ ده‌سته‌ی دسپلینی گشتی کارده‌کات و به‌دواداچوون بۆ دۆسیه‌کان ده‌کات.
3 ـ ئه‌نجامی کاره‌کانی وه‌ک زانیاری ئه‌داته‌ ئه‌نجومه‌نی هه‌رێمی و راپۆتیش ده‌داته‌ ده‌سته‌ی دسپلینی گشتی.  
کۆمیسیۆن و کۆمیته‌، ئه‌رک و به‌رپرسیاریه‌تی:
1 ـ ئه‌نجومه‌ن بۆ رێکخستنی کاروباره‌کانی، پێویسته‌ له‌ ئه‌نجومه‌ن ئه‌ندامانی کۆمیسیۆنه‌کان هه‌ڵبژێردرێت، به‌گوێره‌ی تواناو بواری کارکردنیان.
له‌ ده‌ره‌وه‌ی کۆمیسیۆنه‌ گشتیه‌کان ده‌توانێ کۆمیسیۆنی تایبه‌تمه‌ند پێک بهێنێ که‌ پێویستی هه‌رێمه‌که‌ رایی ده‌کات.
3 ـ کۆمیسیۆنه‌کان له‌ پێشکه‌شکردنی پرۆژه‌ له‌ بواره‌کانی خۆیانداو هه‌مانکات جێبه‌جێکردنیشیدا به‌رپرسیارن.
4 ـ مانگانه‌ کۆبوونه‌وه‌ی خۆیان ئه‌نجام ده‌ده‌ن‌و راپۆرتی خۆشیان مانگی جارێک پێشکه‌شى ده‌سته‌ی کارگێڕی و دوومانگ جارێک پێشکه‌ش به‌ ئه‌نجومه‌ن و ناوه‌ندو کۆمیته‌ی تایبه‌تمه‌ند به‌ خۆیان ده‌که‌ن.
5 ـ ئه‌و کۆمیسیۆنانه‌ی پێویسته‌ پێک بهێنرێن: په‌یوه‌ندیه‌ سیاسیه‌کان، کۆمه‌ڵایه‌تی + ئه‌تنیک و باوه‌ڕیه‌کان، په‌روه‌رده‌و لێکۆڵینه‌وه‌ی فیکری، ژنان، گه‌نجان، راگه‌یاندنی ئازاد + چاندو هونه‌ر، دارای و ئابووری.
6 ـ کۆمیته‌ له‌ گه‌ڕه‌ک و کۆڵان و شارۆچکه‌و ناوچه‌کان ئاواده‌کرێن و ئه‌رکیان به‌رێکخستن کردن و خاوه‌نده‌رکه‌وتنه‌ له‌ کێشه‌ و داواکاریه‌کانی خه‌ڵک. 
له‌سه‌ر ئه‌و بنه‌مایه‌ تایبه‌تمه‌ندی و ئه‌رکی هه‌رکۆمسیۆنێک ده‌توانین به‌و شێوه‌یه‌ دیاری بکه‌ین:
1 ـ کۆمیسیۆنی په‌یوه‌ندیه‌ سیاسیه‌کان:
أ‌ ـ له‌سه‌ر بنه‌مای سیاسه‌ت ئاکاری کۆمه‌ڵگایه‌، کۆمه‌ڵگایه‌کی بێ سیاسه‌ت ناتوانێ گوزاره‌ له‌ خۆی بکات په‌یوه‌ندیه‌کانی دروست ده‌کات تاک و په‌یامی ته‌ڤگه‌ری ئازادی بگه‌یه‌نێت، له‌گه‌ڵ هه‌موو لایه‌نه‌ سیاسیه‌ کوردستانیه‌کان، لایه‌نه‌کانى نه‌ته‌وه‌ جیاوازه‌کان، رێکخراوه‌کانی کۆمه‌ڵگای مه‌ده‌نی، که‌سایه‌تی و داموده‌زگا حکومیه‌کان.
ب‌ ـ هیچ که‌سێک له‌ هه‌ر ئاستێک بێ به‌ته‌نها ناچێته‌ دیدارو چاوپێکه‌وتنی فه‌رمی.
ت‌ ـ کۆنوسی هه‌موو دیداره‌کانی له‌گه‌ڵ راپۆرتی مانگانه‌ی ده‌نێرێته‌وه‌ بۆ ناوه‌ندی سیاسه‌تی دیموکراتی.
2 ـ کۆمیسیۆنی کۆمه‌ڵایه‌تی +  ئه‌تنیک و باوه‌ڕی:
أ‌ ـ له‌سه‌ر بنه‌مای چاره‌سه‌رکردنی کێشه‌کانی هاوڵاتیان له‌ده‌ره‌وه‌ی ده‌سه‌ڵات و به‌رێبازو شێوازی دیموکراتیانه‌ که‌ پێوه‌ره‌ سه‌ره‌کیه‌کانی په‌یماننامه‌ی ته‌ڤگه‌ری ئازادی به‌بنه‌مابگرێت، کێشه‌کان چاره‌سه‌ر ده‌کات.
ب‌ ـ له‌ چاره‌سه‌ری هه‌رکێشه‌یه‌کدا ئه‌نجامه‌که‌ی به‌ راپۆرت ده‌داته‌ ناوه‌ندی جڤاکی ئازادو ژینگه‌ پارێزی.
ت ‌ـ ناڕه‌زایی به‌رامبه‌ر بڕیاره‌کانی کۆمیسیۆنی کۆمه‌ڵایه‌تی پێشکه‌شی ده‌سته‌ی دسپلین ده‌کرێت، ماوه‌ی سه‌رلێدان بۆ ناڕه‌زایی ده‌ربڕین 15 رۆژه‌.
پ ‌ـ به‌ ئازادانه‌ جێبه‌جێکردنی پێویستی باوه‌ڕی و په‌رستن بۆ هه‌موو ئاین و ئاینزاو باوه‌ڕیه‌ جیاکانی گه‌لی کوردو گه‌لانی تر ده‌ئافرێنێت. هه‌مانکات پێکه‌وه‌ ژیانی نه‌ته‌وه‌و گه‌لانی جیاوازیش به‌ ده‌وڵه‌مه‌ندی کۆمه‌ڵگا ده‌بینێ و پێکه‌وه‌ کارو پێکه‌وه‌ ژیان ده‌کاته‌ پره‌نسیبی تێکۆشان.
ج ‌ـ هێرش و چه‌واشه‌کاریه‌کانی به‌ناوی ئاین بۆ سه‌ر بزاڤی ئازادیخوازی گه‌لی کوردستان راست ده‌کاته‌وه‌، هه‌روه‌ها پشت ئه‌ستور به‌ گه‌وهه‌ری بنه‌ڕه‌تی ئایین و به‌ گوێره‌ی بنه‌ماکانی دیموکراتی و ناسنامه‌ی نیشتیمانپه‌روه‌ری پره‌نسیبی لایه‌نگری چه‌وساوه‌کان به‌بناخه‌ وه‌رده‌گرێ.
 3 ـ په‌روه‌رده‌و لێکۆڵینه‌وه‌ی فیکری:
أ‌ ـ کۆمیسیۆنی په‌روه‌ده‌و لێکۆڵینه‌وه‌ی فکری، بۆ پێگه‌یاندنی ئه‌ندامانی ته‌ڤگه‌ری ئازادی و خه‌ڵکی هه‌رێمه‌که‌ی خۆی و قاڵبوونه‌وه‌یان بۆ تێکۆشان و ئاگاداربوونیان له‌ قۆناخ، پێش هه‌موو شتێک سیسته‌م و پرۆگرامێکی په‌روه‌رده‌یی وه‌گه‌ڕ ده‌خات.
ب ‌ـ له‌ کات و شوێنی خۆیدا بێ بڕوایی، بێ هیوای، نادیاری و هێرشه‌ ئایدیۆلۆژیه‌کانی دژ به‌ نرخه‌ جڤاکیه‌کان و تێکۆشانی شۆرشگێڕی ده‌ستنیشان ده‌کات و له‌ به‌رامبه‌ریدا تێکۆشانێکی ئایدیۆلۆژی و سیاسی به‌ بنه‌ما ده‌گرێت.
ت‌ ـ له‌ سه‌ر بنه‌مای په‌روه‌رده‌کردنی کۆمه‌ڵگا به‌شێوه‌ی تاک یان گرووپ و کۆمه‌ڵ له‌چوارچێوه‌ی شارو شارۆچکه‌و گه‌ڕه‌ک و شوێنه‌ دووره‌ ده‌سته‌کان، کۆبوونه‌وه‌ی جه‌ماوه‌ری و سیمینارو پانێل و گفتوگۆی کراوه‌ ساز ده‌کات.
پ ‌ـ راوه‌سته‌کردن له‌ سه‌ر ده‌رخستن و بڵاوکردنه‌وه‌ی ئه‌ده‌بیات و نامیلکه‌کانی رێکخستن، هه‌روه‌ها به‌ره‌و پێش بردنی لێکۆلینه‌وه‌ی هزری سیاسی و جڤاکی.
4 ـ کۆمیسیۆنی ژنان:
أ‌ ـ له‌ سه‌ر بنه‌مای جیهانبینی کۆمه‌ڵگه‌ی ژینگه‌ پارێزو دیموکرات و ئازادی ره‌گه‌زی و ئایدیۆلۆژیای رزگاری ژن تێکۆشان ده‌کات، له‌ پێناو ده‌سته‌به‌رکردنی مافه‌کانی ئازادی و یه‌کسانی ژنان، له‌ سیاسه‌تدا کاروباره‌کانی رێکخستنی ژن و به‌ده‌زگاکردنی له‌ هه‌موو بواره‌کانی کۆمه‌ڵگادا به‌ڕێوه‌ ده‌بات. بۆ ئه‌وه‌ش سیسته‌مى هاوسه‌رۆکایه‌تى له‌ هه‌موو دامه‌زراوه‌کاندا په‌یڕه‌و ده‌کات.
ب‌ ـ په‌روه‌رده‌کردن و رێکخستنی کۆمه‌ڵگا به‌بناخه‌ وه‌رده‌گرێت.
ت‌ ـ کاروباره‌کانیان ته‌نها به‌ ژنی کورده‌وه‌ سنوردار ناکات و دانانی په‌یوه‌ندی له‌گه‌ڵ ژنانی گه‌لانی دیکه‌ش ده‌کاته‌ ئامانج.
پ‌ ـ هه‌ر ژ‌نێک له‌ کۆمسیۆن و رێکخستنی هه‌رێمی ئه‌ندامی کۆنفیدراسیۆنی ژنانه‌، بۆیه‌ به‌ هاوته‌ریبی پێکه‌وه‌ کار ده‌که‌ن.
5 ـ کۆمیسیۆنی گه‌نجان:
أ‌ ـ کۆمیسیۆنی گه‌نجان به‌رپرسیاره‌ له‌ به‌ڕێکخستنکردنی گه‌نجان له‌ بواره‌کانی سیاسی، کۆمه‌ڵایه‌تی، کلتوری و وه‌رزشیدا، چونکه‌ گه‌نج پێشه‌نگی کۆمه‌ڵگان بۆ ئه‌وه‌ی کۆمه‌ڵگا له‌سه‌ر بنه‌مای دیموکراتی خۆی به‌ڕێکخستن ده‌کات.
ب‌ ـ کۆمیسیۆن گه‌نجان له‌سه‌ر رێبازی نه‌ته‌وه‌یی دیموکراتی گه‌نجان په‌روه‌رده‌ ده‌کات، هه‌روه‌ها به‌ ئامانجی پابه‌ندبوون به‌ به‌ها نه‌ته‌وه‌یی و وڵاتپارێزیه‌کان، هه‌روه‌ها کارده‌کات بۆ نه‌هێشتنی شاڵاوی کۆچی به‌ کۆمه‌ڵی گه‌نجان بۆ ده‌ره‌وه‌ی وڵات، بۆ ئه‌و مه‌به‌سته‌ش پرۆژه‌ی تایبه‌ت و جیاجیا بۆ گه‌نجانی خوێندکار، کرێکارو بێکار ئاماده‌ ده‌کات، هه‌مانکات هاوکاری و پشتگیری گه‌نجانی داهێنه‌ر ده‌کات.
ت ‌ـ کارکردن له‌گه‌ڵ رێکخراوه‌کانی گه‌نجان و لاوان به‌ هاوبه‌شی، هه‌روه‌ها خۆگه‌یاندنه‌ گه‌نجانی نه‌ته‌وه‌کانی ترو پێکه‌وه‌ کارکردن.
پ‌ ـ هه‌موو ئه‌ندامی کۆمیسیۆنی گه‌نجان و کۆمیته‌کانیان، هه‌مانکات ئه‌ندامن له‌ کۆنفیدراسیۆنی گه‌نجان و به‌هاوبه‌شی پێکه‌وه‌ کار ده‌که‌ن.
6 ـ کۆمیسیۆنی راگه‌یاندنی ئازاد + چاندو هونه‌ر:
أ ‌ـ کۆمیسیۆنی راگه‌یاندنی ئازاد، له‌سه‌ر بنه‌مای راگه‌یاندن پێگه‌یه‌کی سه‌ره‌کی خه‌باتی دیموکراتیه‌و کۆمه‌ڵگا پێویسته‌ به‌زانیاری راست و ئاراسته‌ بکرێت.
ب‌ ـ کۆمیسیۆنی راگه‌یاندنی ئازاد کارده‌کات تاک و هه‌موو چالاکیه‌کانی ته‌ڤگه‌ری ئازادی له‌ هه‌رێمی خۆی بگوازێته‌وه‌ بۆ ماڵپه‌ڕو تۆڕه‌ کۆمه‌ڵایه‌تیه‌کانی ته‌ڤگه‌ر. هه‌روه‌ها دروستکردنی پردی په‌یوه‌ندی له‌گه‌ڵ راگه‌یاندنه‌کانی تر.
ت ‌ـ کۆمیسیۆنی چاندوهونه‌ر، له‌هه‌موو کارو خه‌باتیدا په‌رپێدان به‌چاندی نه‌ته‌وه‌یی دیموکراتی و کردنی به‌موڵکی کۆمه‌ڵگا ده‌کاته‌ ئامانج و چه‌مکی هونه‌ری شۆرشگێڕی و به‌رخودان به‌ بنه‌ما وه‌رده‌گرێت.
پ‌ ـ کۆمیسیۆن به‌رپرسیاره‌ له‌ به‌رێکخستنکردنی کاروباری هونه‌ری له‌ هه‌رێمه‌که‌ی، هه‌روه‌ها هانده‌ر ده‌بێت بۆ پێشخستن و پاراستنی گیانی هونه‌ری نه‌ته‌وه‌یی و جڤاکی. هه‌موو چالاکیه‌ هونه‌ریه‌کانی هه‌رێمه‌که‌ی رێک ده‌خات و به‌ڕێوه‌ی ده‌بات.
 7 ـ کۆمیسیۆنی دارای و ئابووری:
أ‌ ـ پره‌نسیبی خۆتێری "فینانس" ده‌کاته‌ بنه‌مای به‌ڕێوه‌بردن، هه‌مانکات زۆری داهات و که‌می خه‌رجی په‌یڕه‌و ده‌کات.
ب ‌ـ ئه‌ندامانی کۆمیسیۆن به‌هاوبه‌شی له‌گه‌ڵ ئه‌نجومه‌ن و ئه‌ندامانی کۆمیته‌و کۆمیسیۆنه‌کان کارده‌که‌ن بۆ کۆکردنه‌وه‌ی هاوکاری و پێویستیه‌ ماددیه‌کان. هه‌موو داهات و خه‌رجی لای کۆمیسیۆنی دارای کۆده‌بێته‌وه‌.
ت‌ ـ پێشخستنی ئابووری هاوبه‌ش و جڤاکی، تاک و هاوڵاتیان بتوانن پشت به‌خۆیان ببه‌ستن.
پ‌ ـ هاندانی کۆمه‌ڵگا بۆ به‌ بنه‌ماگرتنی پرۆژه‌ی ئابووری هاوبه‌ش "کۆپه‌راتیف" ، گرنگیدان به‌ ره‌نجدان و به‌رهه‌می خۆماڵی.
په‌سه‌ندکراوى یه‌که‌مین کۆنفرانسی هه‌رێمی سلێمانی
ته‌ڤگه‌ری ئازادی کۆمه‌ڵگای کوردستان
15 ـ 1 ـ 2016

چه‌ند هه‌واڵكی تر

‌په‌یماننامه‌ی ته‌ڤگه‌ری ئازادیی...

‌ئەنجومەنی گەرمیانی تەڤگەری ئازادیی پرۆژە و پێشنیاری خۆی بۆ ساڵی داهاتو...

‌تێدەکۆشین بەڕۆحییەتی ئەو رۆژانەی کە راپەرینی پێنجی ئازاری تێدا سەرکەوت...

‌17 ی شوبات قۆناغێکی مێژوویی بوو له‌ خه‌باتی جه‌ماوه‌ریی هه‌رێمی كوردست...

‌به‌ڕۆحى به‌رخودانى ئیمراڵى و عه‌فرین پلانگێری نێوده‌وڵەتى 15ی شوبات پو...

‌هه‌ڵوێستی ته‌ڤگه‌ری ئازادیی بۆ ڕه‌وشی هه‌رێمی كوردستان...

‌پرۆژه‌ پێشنیاری په‌سه‌ندکراوی یه‌که‌مین کۆنفرانسی هه‌رێمی گه‌رمیانی ته...

‌پرۆژه‌ پێشنیاری په‌سه‌ندکراوی یه‌که‌مین کۆنفرانسی هه‌رێمی گه‌رمیانی ته...

‌پڕۆژه‌‌ په‌‌سنه‌‌د کراوی یه‌که‌مین کۆنفرانسی هەرێمی کەرکوک...

‌په‌یڕه‌وی ناوخۆی ئه‌نجومه‌نی هه‌رێمی راپه‌ڕین...

‌به‌ڵگه‌کانی یه‌که‌مین؛ کۆنگره‌ی"ته‌ڤگه‌ری ئازادی کۆمه‌ڵگای کوردستان" "...

‌په‌یماننامه‌ی ته‌ڤگه‌ری ئازادی کۆمه‌ڵگای کوردستان (ته‌ڤگه‌ری ئازادی)...

1
په‌ڕه‌یله‌ 1
ژماره‌ی بابه‌ت

كه‌ش و هه‌وا

فەیسبووك