کوردی           عربی

سنور کەریم: باشوور لەژێر هەیمەنەی وڵاتانی دەرەکی و ئیقلیمیدا بەڕێوە دەچێت‌

18/11/2016

Wednesday‌


تەڤگەر - سلێمانی

سنور   کەریم، ئەندامی دەستەی بەڕێوەبەری تەڤگەری ئازادی کۆمەڵگەی کوردستان، رایدەگەێنێت: : دەوڵەتی تورکیای فاشیست بە ناوی رێکەوتنی ئابوووری دەستی بەسەر جومگە گرنگەکانی باشووردا گرتوە. نە بوونی بنکەیەکی ئابووری بەهێز لە ماوەی ئەم ٢٥ ساڵەدا وایکرد، دۆخی باشوور بگاتە ئەم دۆخەی کە ئێستا پێدا تێپەر دەبێت، جەختیکردەوە: دروستکردن و خوڵقاندنی قەیرانی دارایی بەرژەوەندی سیاسیی لە پشتەوەیە، لە ڕاستیدا لە ئەمڕۆی باشووری کوردستاندا شتێک نەماوە بە ناوی حکومەت، ئەوەی هەیە تەنیا حزب بەڕێوەی دەبات، دیموکراسی لەژێر پرسیاردایە و هەتککردنی ئازادی هەیە. هەروەها پرۆژە پێشنیاریش بۆ باشوور ئاشکرا دەکات.

• بۆچی بارودۆخی باشووری کوردستان بە ئێستا گەیشت و تەنگەژەکە وا گەورە کرا؟

سنور کەریم: بێگومان هەرێمی کوردستان بەدور نییە لەو گێژاوەی رۆژهەڵاتی ناوەڕاستی گرتوتەوە، باشووری کوردستانیش وەک نمونەیەکی زیندوو کە پسشکی شێری بەرکەوتوە ئەمە سەرەڕای نەبوونی سیاسەتێکی  ڕاست و دروست وستراتیژێکی ڕوون، دەسەلاتێکی نادادپەروەر و نایەکسان، نەبوونی پلانێکی تۆکمەو دوربین، لە سەروی هەموشیانەوە دەسەڵاتێکی نادیموکرات و بەرژەەندی پەرست، بوونەتە هۆی دروست بوونی کۆمەڵە قەیرانێکی یەک لەدوای یەک تا دۆخەکە گەیشتووەتە ئاستێک کە بگاتە گێژاو تا ئاستێک کە ئاسۆی چارەسەری لە ئێستادا بە هیچ جۆرێک بەدی ناکرێت. لەگەڵ بەردەوامی  هەبوونی قەیرانی سیاسیی و کۆمەڵایەتی و دەستوری ویاسایی لە ماوەی ئەزمونی حوکمڕانی ٢٥ساڵەی دەسەڵاتی باشووری کوردستاندا کە کۆمەڵگا روبەڕوی چەندین تەنگەژەی جۆراو جۆر بوو وەتەوە، بەڵام هیچیان هێندەی قەیرانی دارایی دۆخەکەی ئاڵۆزتر نەکردوە، چونکە ڕاستەوخۆ پەیوەندیدار بووە بە ژیانی ڕۆژانەی هاوڵاتیان و کاریگەری نێگەتڤی لەسەر دۆخی ژیانی هاوڵاتیان و بارو گوزەرانیان دروستکردوە. لەگەڵ هەبوونی ئەو قیرانانەی کە پێشتر باسکران کە مەسەلەی چارەنوس سازن و ئایندەی گەلی کوردیان پێوە گرێدراوە، بەڵام نەبوونی هۆشیارییەکی دروست لەلای تاکە کانی کۆمەڵگاو پەیڕەوکردنی سیاسەتی بە مێگەل کردنی خەڵک لە لایەن دەسەڵاتەوە وایکردوە دۆخەکە تەنیا لە چوارچێوەی قەیرانی دارایدا کورت بکرێتەوە. لە کاتێکدا من پێم وایە گرنگتر لە هەمویان قیرانە کۆمەڵایەتیەکەیە کە کۆمەڵگا بەرەو هەڵوەشان و لێکترازانێکی مەترسیدار  و ڕیشەیی دەبات بە بەردەوامیش دەگۆڕێن بۆ دیاردە کە ساڵانێکی زۆری دەوێت تا کۆمەڵگا دەگاتەوە سەر سکەی خۆی و جارێکی تر ڕێخستنەوەی بەڵام دەکرێ قەیرانێکی وەک دارایی لە ڕێکەوتنێکی سیاسیی نێوان لایەنەکاندا بەرەو چارەسەری بڕوات. چونکە لە باشووری کوردستاندا حکومەتێکی بنکە فراوان هەیە کە پێنج حزب تێیدا بەشدارن کە من پێم وایە بەپێی سەنگی خۆیان لەم دۆخەدا پشکیان بەردەکەوێت. سەرهەڵدانی قەیرانی داراییش بە تایبەت بە مۆرکردنی پرۆتۆکۆڵی نەوت لەگەڵ تورکیادا گەورەتر بوو زیاتر درکی پێکرا.   کوردستان بۆ ماوەی ٥٠ ساڵ بکەویتە ژێر هەژمو ن و دەسەڵاتی دەوڵەتی تورکیا وەک چۆن لەزۆر ڕوی تریشەوە ئەمڕۆی باشوور لەژێر هەیمەنەی وڵاتانی دەرەکی و بەتایبەت ئیقلیمیدا بەڕێوە دەچێت بەتایبەت دەوڵەتی تورکیای فاشیست بە ناوی رێکەوتنی ئابوووری دەستی بەسەر جومگە گرنگەکانی باشووردا گرتوە. نە بوونی بنگەیەکی ئابووری بەهێز لە ماوەی ئەم ٢٥ ساڵەدا هەمو ئەمانە وایکرد، دۆخی باشوور بگاتە ئەم دۆخەی کە ئێستا پێدا تێپەر دەبێت.

پەرلەمان و حکومەت و هەموو دامودەزگاکانی پەکخراوە، ئەمە چی کارگەرییەکی لەسەر کۆمەڵگە کردوە و دەرئەناجامە خراپەکانی لە ئایندەدا چی دەبێت؟

سنور کەریم: لە ڕاستیدا لە ئەمڕۆی باشووری کوردستاندا شتێک نەماوە بە ناوی حکومەت، ئەوەی هەیە تەنیا حزب بەڕێوەی دەبات، دیموکراسی لەژێر پرسیاردایە و هەتککردنی ئازادیە، شکاندنی هەیمەنەی پەرلەمان بەمانای شکاندنی شکۆو ئیرادەی خەڵکی باشوور دێت. ململانێی نێوان دەسەڵات بە عەقڵیەتێکی نا دیموکراتی بەرامبەر بە عەقڵیەتی دیموکراتی و ئیرادەی گەلە. بە پێشێل کردنی ڕێگریکردنە لە بە دامەزراوەیی  بووونی سەرجەم دام و دەزگاکانی حکومەتی هەرێمی باشووری کوردستان و چەسپاندنی سیستەمێکی سیاسیی دیموکراسی و نوسینەوەی دەستورێکی کۆنکرێتی کە مافی سەرجەم چین و توێژ و پێکهاتەکانی کۆمەڵگا لەخۆی بگرێت، سەروەربوونی یاسایە. بەو پێیەی کاری پەرلەمان چاودێری کردنی کاروباری حکومەت و سێکتەرە جیاوازەکان و لێپێچینەوەی یاسایی یە لەسەر سەرپێچیەکانی حکومەتە دژی بەرژەوەندی گەل. بە نەبوونیشی درێژەدانی دەسەڵاتە بە ملهوڕییەکانی و پاراستنی بەرژەوەندییەتایبەتیاکانی خۆیان و مەنسەب و کورسی خستنە گەڕی داهاتی گشتیی بە خزمەتی تایبەتی.

دروستکردنی ئەم قەیرانە ئابووورییە بۆچییە، ئایا دەسەڵاتی هەرێمی کوردستان لەم رێگەیەوە دەیەوێت چ بەدەست بهێنێت؟ 

سنور کەریم: دروستکردن و خوڵقاندنی قەیرانی دارایی بەرژەوەندی سیاسیی لە پشتەوەیە. وەک وتم بەشێکی پەیوەستە بە نەبوونی پلانێکی تۆکمەی ئابووری بۆ داهاتو وە ئەو خاڵانەی ئاماژەم پێکردن، بەڵام بەشێوە سەرەکیەکەشی سەپاندنی  هەژمونی وڵاتانی ئیقلیمی لەژێر ناوی ڕێککەوتنی ئابووری مەسەلە سەرەکیەکەیە. تورکیا کە بەڕێکەوتنی ٥٠ ساڵی نەوت لەگەڵ پارتی دیموکراتی کوردستانی عێراق و بە ئاگاداری لایەنەکانی تری بەشداری دەسەڵات کە حکومەتێکی ئیفلیج و شکستخواردوی سیاسییان بەرهەمهێنا لە باشووردا بەشدارن لەم قەیرانە هەمو لایەنەکان بە سەنگی خۆیان بەرامبەر بەم دۆزە تاوانبارن. بێگومان ئامانجی تورکیا خەونی گێڕانەوەی ویلایەتی موسڵە سەرەتا بە کۆنترۆڵکردنی ئابووری باشووری کوردستان. ئەمەش بە بنیادنانی چەندین بناخەی ئابووری بەهێز لە باشووردا کۆنتڕۆڵکردنی جموجۆڵی بازاڕ و ساخکردنەوەی کاڵاو کەلوپەلی نا تەندروستی تورکی و دروستکردنی چەندین کۆمپانیای بەهێزو سەدان ناوەندی فێرکاری و پەروەردەیی و بنکەو سەنتەری تەندروستی، بەزاندنی سنورەکانی هەرێمی کوردستان و بەردەوام بۆردومان کردنی خاکی باشوور و هێنانی هەزاران هێزو تانکو تۆپی تورکیا، ئاماژەو بەڵگەی ڕونن بە زاڵبوونی هەژمونی سیاسیی و ئابووری و سەربازی تورکیا لەسەر حوکمڕانی دەسەلاتی باشووری کوردستاندا، لە بەرامبەریشدا دەسەڵاتی بنەماڵەیی پارتی بۆ درێژەدان  و پاراستی بەدەسەڵاتی حزبی و بنەماڵەیی و سەپاندنی هەژمونیان بەسەر کۆمەڵگادا کۆنتاکتێکی دانەبڕاو و بەرژەوەندیخوازانەیان بەرهەم هێناوە و چاوپۆشیان لەسەر پەرچەکردارەکانی تورکیا کردوە بگرە ئەمە بوووەتە هێز و پاڵپشتێکی گەورە کە تورکیا ئەمە بە هێز و پاڵپشتێکی گەورە بۆخۆی بینێ، بەکاری بهێنێ بۆ دژایەتی کردنی ئەزمونی ڕۆژ ئاوای کوردستان و، ئیدانەو سەرکوتی هاونیشتمانیانمان لە باکوری کوردستان و ئەڵبەتە بۆ ئەمەش هەمویان خاڵی کۆک و هاوبەشیان هەیە. لە لایەکی تریشەوە سیاسەتی بەمێگەلکردنی گەل لەلایەن دەسەڵاتەوە بۆ مەبەستی کۆنتڕۆڵکردنی ئیرادەی تاکەکانی کۆمەڵگا و خزمەتکردنیان بە دەسەڵاتی خۆیان تاکو کۆمەڵگا بە بەرژەوەندی و خۆیان ئاڕاستە بکەن و بە ویستی خۆیان سیاسەت لەسەر تاکەکانی کۆمەڵگا بەڕێوە ببەن. چونکە تاکێکی سیاسیی و هۆشیاربە مەترسی لەسەر دەسەڵاتی تاک پەرستی خۆیان دەبینن. 

ئۆپۆزیسسیۆنی پێشو بۆچی نەبوووە وەڵمی داواکانی کۆمەڵگە؟ ئایا کەداوی ئەم ئۆپۆزیسیۆنەکەداوی چوە حکومەتەوە دەتوانێت ئەم تەنگەژەیەی هەیە بەرەو چارەسەری ببات و تێی پەڕێنێت؟ 

سنور کەریم: نەبوونی ستراتیژێکی ڕون پلانێکی تۆکمە و جیهان بینییەکی بەهێز، نەبوونە وەڵامی ئۆپۆزیسیۆنە بۆ داواکاریەکانی کۆمەڵگا، سیاسەت کردن بە تێڕوانینی دەسەڵات و هەمان عەقڵیەت بێگومان دوبارە کردنەوەی ئەزمونە هەڵەکانی حزبەکانی ترە کە نەیانتوانی لەماوەی ٢٥ ساڵی ئەزمونی حوکمڕانی کوردییدا سەرکەوتوبن. ئەوەی ئۆپۆزیسیۆنی دروستکرد هەڵچون و توڕەیی خەڵکی بەشمەینەت و بەشخوراوی خەڵک بوو، بێگومان ئیش کردن لەسەر عەتف و توڕەیی خەڵک بەبێ بوونی ستراتیژ ئەنجامێکی سەرکەوتوی نابێ، چونکە ئامادەکارییەکی بنگەیی نەکراوە، گرنگترینیان ئۆپۆزیسیۆن بەبەرزکردنەوەی دروشمی بەرەو دەسەڵات و پێگەی جەماوەریان بەرەو لاوازی ڕۆشت بە چونیشیان بۆ دەسەڵات بێ ئومێدیەکی زۆریان لە ناخی تاکی کوردیدا چاند. تا ئەو ئاستەی ڕوخان و بێ ئیرادەیەکی زۆری لێکەوتەوە ئیتر تاک گەشتە قۆناخی بێ ئینتیمایی بۆ نەتەوە و نیشتمان و دۆخی بێچارەیی ڕوی لە تاکەکان کرد چونکە بە زنجیرە یەک بەدوای یەک سیاسەتی جیاوازی حزبەکانیان لەسەر تەجروبە کرا دوایەمینیشیان بزوتنەوەی گۆڕان بووو. لە لایەکی تریشەوە ململانێ و دوبەرەکی و نەسازانی حزبەکانیش لەناو حکومەتێکی بنکە فراواندا بە ئۆپۆزیسیۆنیشەوە ئیرادی ڕوبەڕوبوونەوەی گەندەڵی لە ناو برد و بەجۆرێک کە دەست و پێی ئەوانەشی بەست کە ویستی گۆڕانکاریان هەبووو. ئێمەش وەک تەڤگەری ئازادی کە خۆمان بە ئەڵتەرناتیڤی سیستەمی سیاسیی و کۆمەڵایەتی لە باشووردا دەبینین و خۆمان بەدرێژکراوەی دەسەڵاتی هیچ لایەنێک نابینین بە حوکمی  ئەو ماوە کەمەی کە خۆمان ڕاگەیاندوە هەمو ئاستەنگیەکانی دەسەڵات تا ئاستێک کە هێشتا مۆڵەتی کارکردنمان پێ نەبەخشراوە، بە بڕیاری سیاسیی بێکومان هێشتا بە تەواوی نەکەوتوینەتە سەرسکەی خۆمان، لەڕوانگەی باوڕبوونمان بە بەرپاکردنی شۆڕشی زهنی پێش شۆڕشەکانی تر سیاسەتێکی ستراتیژ و درێژ خایەن هەیە، دەستمان پێکردوە بەردەوامین بە ئیرادەیەکی پۆڵاین لە تێکۆشانی ئازادیدا تا گەیشتن بە ئامانجەکان و خزمەت کردنی کۆمەڵگا ئەوەی گرنگە تەڤگەری ئازادی بووەتە ئومێدێکی گەورە بۆ گەلی باشوور. 

دەسەڵات بۆچی ناڕەزیەتییەکانی هاوڵاتیان بەهەند وەرناگرێت؟ هاوڵاتیان چی دیکە بکەن بۆئەوەی بتوانن مافەکانی خۆیان بەدەست بهێننەوە؟

سنور کەریم: بێگومان دەسەڵات بەو سیاسەتەی لەسەر سایکۆلۆجیای خەڵک جێبەجێی کردوە، ئاستی فیکری تاکەکانی کۆمەڵگای خوێندوەتەوە وەک باسم کرد ئیرادەی ڕوبەڕوبوونەوەی تاکەکانی کوشتوە بۆیە تا ئاستێکی زۆر جۆرێک لە بێمنەتەتی بەرامبەر بە گەل پیشانداوە و داخوازییەکانی پشت گوێ خستوە، بەشێکی تریش پەیوەستە با ئاستی هۆشیاری تاکەکان کە تا ئاستێک هۆشیاری سیاسیی لاوازە، بۆیە بەو شێوەیە سیاسەت لەسەر ئاستی فیکری هاوڵاتی کراوە، بۆیە وەک وتم شۆڕشی زهن پێویستە بۆ پێدانی هۆشیاری بە کۆمەڵگا. لە کۆمەڵگایەکی هۆشیاری فیکری بەهێزدا دەتوانرێت ڕێکخستنێکی فراوان وەک بەرەیەکی دیموکراتی لەبەرامبەر دەسەڵاتێکی نا عادل دروست بکات و ڕوبەڕو ببێتەوە، دوەم سیاسەتی پەیوەست کردنی تاکەکانی کۆمەڵگا بە دەسەڵاتەوە بۆ نمونە دامەزراندن و موچەپێدان بە ژمارەیەکی زۆری هاوڵاتیان و بەتایبەت لە بوواری سەربازیدا تا ئاستێکی بەرز هەوڵی بە عەسکەرتاریەت کردنی تاکاکەن دراوە کە ئامانج لێی خزمەت کردنی دەسەڵاتی خۆیانە و پیرۆزی و بەهای پێشمەرگە بە موقابیلی پارە کراوە، واتە ژۆرێک لە بەکەسابەت کردن بەرامبەر بە بەهای پیرۆزی پێشمەرگە پەیڕەو کراوە، بە باوەڕی من بە ئامادەکاری ئەمانە بە دو خاڵ دەمان گەیەنێتە ئامانج، یەکەم: باوەڕی بە قەزیەکە واتە بە چاک سازی و تێگەشتن لە مافەکانمان وەکو تاک، دووەم: بەردەوامی لەسەر داواکارییەکان. جارێکی تر ئەویش پەیوەستە بە ئاستی هۆشیاری تاک. کاتێ تاک هۆشیار بوو ئیرادەی جێبەچیکردنی هەردو خاڵەکەی هەیە و دڵنیام دەگەینە ئامانج.

ئێوە وەک تەڤگەری ئازادی پرۆژە و چارەسەریتان بۆ ئەم قۆناخەی باشووری کوردستان چییە؟

سنور کەریم: ئێمە لەم ماوەکەمەی خۆ ڕاگەیاندنماندا، بۆ هەمو قۆناخەکان بەپێی زەروریاتی قۆناخ لە ڕوانگەی هەستکردن بە بەرپرسیارێتی پرۆژە پێشنیارمان پێشخستوە. چی لە مەسەلەی سیاسیی، دەستوریی، یاسایی، کۆمەڵایەتی و ئابووری و لەسەر دۆخی خۆپیشاندانەکانی هاوڵاتیان پڕۆژەی گونجاو خراوەتە ڕوو. 
ئێمە ئەم پرۆژە پێشنیارانەمان هەیە: 

1. بۆ دیمورکراتیزەبوونی سیستەمی سیاسیی کاراکردنەوەی پەرلەمان کاری لە پێشینەیە تا پەرلەمان بڕیاری هەڵوەشاندنەوەی حکومەت بدات و حکومەتێکی کاتی لە کاسانی تەکنۆکرات و بێلایەن دروست بکات کە خاوەنی دەستڕۆشتویی بێت بۆ چارەسەر کردنی کێشیەکان بە تایبەت لەم دۆخە نا لەبارەدا چارەسەر کردنی کێشەی موچەی هاوڵاتیان. نوسینەوەی دەستورێکی دیموکراتی کۆنکرێتی کە مافی هەمو هاوڵاتیانو چین و توێژەکانی تییادا پارێزراو بێت و لە ڕاپرسییەکی جەماوەریدا دەنگی لەسەر بدرێت. دەبێت هێزەکانی پێشمەرگە لەسەنگەری بەرگریدا بمێننەوە، پڕ چەک بکرێن و لە ژێر هەژمونی حزب دەربهێنرەن. بە پشت بەستن بە دەستوری عێراقی بۆ ڕێگرتن لە دو ئیدارەیی حیزبی و پارچەکردنی هەرێمی کوردستان، لەسەر بنەمای پەرەپێدانی ئیدارەیەکی دیموکراتی؛ پێشنیار دەکەین کەوا سیستەمی ئیداری لەسەر بنەمای خۆبەرێوەبردنی دیموکراتیانە هەرێمەکان رێکبخرێتەوە.

2. لەبوواری ئابوووریدا: داهاتی خۆماڵی و نەوت و خاز وباج و گومرگ ڕوون و شەفاف بێت، لە ناوەندە حزبیاکان ڕزگار بکرێت و بدرێتە لایەنی پەیوەندیدار لە حکومەت. چاو پیاخشاندنەوەبە هەمو ئەو پڕۆتۆکۆڵ و ڕێکەوتنانەی لەگەڵ وڵاتانی دراوسێ و ئاسایکردنەوەی پەیوەندییەکان لەگەڵ ناوەنددا و بە پێی ستانداردە نێودەوڵەتییەکان چارەسەری گرفتی موچەی هاوڵاتیان بکرێت.
3. لە بوواری کۆمەڵایەتیدا بۆ ئەوەی ڕێگری لە کۆچی گەنجان بگیرێت، چارەسەری پرسی سیاسیی و ئابووری گرنگە،  هەروەها ئاراستەکردنی گەنجان لەسەر بنەمای پرەنسیپە زانستی و ستانداردە نێودەوڵتییەکان، پێشخستنی هەلی کار و دابین کردنی سۆشیال بۆ هاوڵاتیان. لە پێناو چارەسەر کردنی پرسی ژن هاوسەنگی ڕەگەزی و بەشداری ژن لە پۆستە ئیداریەکاندا، لەبەر چاو بگیرێت، لە دادگادا دۆزی ژنان بە حەقی یاسایی خۆیان بگەیەنرێن.

4. سەبارەت بە دۆخی خۆپیشاندانەکان  توڕەی چین و توێژەکانی کۆمەڵگا بەتایبەت گەنجان، لەبەرامبەر ئەو نادادی و گەندەڵی و بەهەدەردانی سامانی نیشتمانی و نەبووونی مووچە و بێ ئاکامبووونی سازانی سیاسیی، نەبووونی خزمەتگوزاری، سازشکردن لەسەر مافی هاوڵاتیان، بووونەتە هۆکاری ناڕەزایی و خۆپیشاندان، بۆ ئەمەش پێشنیار دەکەین: پێویستە داواکاری خۆپیشاندەران لەناو ململانێی حیزبیدا بنپێ نەخرێت و دەبێت لەجیاتی چالاکی پچڕ پچڕ و هەڕەمەکی و جودا جودای چین و توێژە ستەملێکراو و مافخوراوەکان، با سەرجەم چین و توێژەکان بەشێوەیەکی جەماوەری و بەیەکەوە و بە بەرنامەی هاوبەشی جەماوەری خۆپیشاندانە دیموکراتییەکانیان پەرەپێبدەن. هەموو تەقەکردن و شەهید بووونێک و هێرشکردنی دەزگای ئەمنی و چەکدارییەکان بۆ سەر خۆپیشاندەران وەکو تاوانی کۆمەڵکوژی بژمێردرێت. هەروەها وەڵامدانەوەی داواکاری خۆپیشاندەران بکرێتە نەریت بۆ چارەسەرکردنی کێشەکان. پێویستە جەماوەری خۆپیشاندەر دەستبەجێ (ئەنجوومەنی دیموکراتی جەماوەر)ی لەهەموو شار و شارۆچکەکانیان لە کەسێتییە چالاکوانە خۆڕاگر و دڵسۆزەکان پێک بێنن، هەروەها بەردەوامی دان بەخۆپیشاندان و ناڕەزایی جەماوەری و دیموکراتییەکان تاکو رێگانەدرێت دەسەڵات بەئارەزووی خۆی مامەڵە لەگەڵا پرسەکاندا بکات.



چه‌ند هه‌واڵكی تر

‌كەجەكە: چالاکییەکانمان لە ناو تورکیادا چڕ دەکەینەوە...

‌زه‌هرا یوسف: ژنانی ئێزیدی بوونه‌ته‌ نمونه‌ بۆ ژنانی ئێراق و كوردستان...

‌محه‌مه‌د عه‌بدوڵا: ئه‌وانه‌ی پڕوپاگه‌نده‌ی ریفڕاندۆم ده‌كه‌ن بۆخۆیان ن...

‌بایك:گەنجانی باشور بەبەشداربوونیان بۆناو پەكەكە وەڵامی كۆمەڵكوژی هەولێ...

‌هاوڕێ جەبار:ئەنفال بۆ سڕینەوەی ناسنامەی گەلی کورد بوو...

‌حه‌سه‌ن جودی: ئه‌وه‌ی له‌شه‌نگال ده‌گوزه‌رێ كورتكراوه‌ی شه‌ڕێكی جیهانی...

‌محه‌مه‌د عه‌بدوڵڵا؛ له‌ئێستادا هاوپه‌یمانییه‌ك له‌سه‌ر بنه‌مای ی...

‌لوقمان حه‌سه‌ن: "كێشه‌ی حیزبه‌كان ته‌نها ده‌سه‌ڵاته‌"...

‌"AKP لە باكور و PDK لەباشوور دژایەتی بەرژەوەندییەكانی گەلی كورد دەكەن ...

‌شیلان شاکر: کێشه‌ ئه‌قڵیه‌تێکه‌ باوه‌ڕی به‌وه‌ نیه‌ که‌ ده‌سه‌ڵات‌ ته‌...

‌عەدنان کەریم: گەریلا، شەڕڤان و پێشمەرگە چاو و رۆحی منن...

‌عه‌لى هه‌ڵۆ : ده‌بێت په‌رله‌مان کاربکات له‌سه‌ر ده‌رخستنى ناوى PKK له‌...

12
په‌ڕه‌یله‌ 2
ژماره‌ی بابه‌ت

كه‌ش و هه‌وا

فەیسبووك