کوردی           عربی

سه‌مای زه‌مه‌نی سوور‌

06/01/2018

Wednesday‌

گۆتیام ئازادی

زستانێكی شوم، زه‌مانێكی تون به‌ باروتی بێ باكی. تێیدا وشه‌كان خه‌وتون، دڵه‌كان بێ زریكه‌ن، ئاواته‌كان شه‌خته‌به‌ستوو. دنیا هه‌نارێكی نه‌ماوه‌ بۆ ژین، به‌یانیه‌كان تینون و شه‌ونمێكیان نیه‌ بۆ لێوی جوانی. سه‌رده‌می خنكانی ئۆركه‌ستراكانه‌‌. ئیدی مرۆڤ له‌ ئێواره‌ی هه‌ر جه‌ژنێكی نه‌هاته‌دا، له سه‌رابی‌ دیموكراسی دا جه‌جاڵی ده‌بێت. باغه‌كان وه‌جاخ كوێر، نه‌سرینه‌كان خۆكوژ، هه‌موو ئاڵاكان درۆ له‌ ناوچه‌وانیاندا ده‌شه‌كێته‌وه‌. كانیه‌كان، قژی سپیایان به‌دیار لێوه‌ برینداره‌كانی به‌رده‌ لاپاڵم لێكه‌وتووه‌كانی باوه‌شیاندا ده‌هۆننه‌وه‌. خۆر، له‌ وڵاتی عه‌جه‌مه‌وه‌ تا ڕۆم تۆراوه‌و هه‌موو به‌یانیه‌ك تف له‌ زه‌مه‌نی ئاده‌میانی جه‌هه‌ننه‌می شه‌ڕ ده‌كات. له‌م ئاخره‌ زه‌مانه‌دا، كه‌ پڕه‌ له‌ جه‌سته‌ی بێ سه‌ر، له‌ باڵای بێ چاو، له‌ خوێنی وشكه‌وه‌نه‌بوو، له‌ وێرانه‌، له‌ لاپاڵم و سنور. ئاخرین، په‌له‌قاژه‌كان، هاواره‌كان، سه‌ڵاكان و شه‌ڕه‌كان ده‌هۆڵی خۆیان ده‌كوتن. ئاخرین فیله‌كانی كۆتا مه‌یدانه‌كانی شه‌ڕ خۆیان به‌ یه‌كداده‌كێشن. له‌ قوڵایی ئه‌م كسپه‌ بێگانه‌یه‌دا، گه‌ردوون له‌ یه‌ك هه‌ناسه‌ی نه‌سرانیدا، له‌م زستانی زه‌مه‌نه‌دا، هیوای نه‌شئه‌ی ژیان گه‌وره‌ ده‌كات. ئیدی هێلكه‌دانی خۆی بۆ سروه‌ی سیوه‌یلای ناو دڵی مارگرێته‌ كوردستانیه‌كان كردۆته‌وه‌، له‌گه‌ڵ هه‌لهه‌له‌كانی كوبانی جوتده‌بێت و ده‌یه‌وێت به‌ سه‌مایه‌ك له‌ سور ئاوسبوونی زه‌مه‌ن به‌ ئازادی بژه‌نێت. سه‌ماێك به‌ ڕه‌نگی چیاگه‌ر به‌ بۆنی نوجان له‌ نارینی گوڵه ‌قه‌یسیه‌كی به‌هاری شۆڕشدا.

زه‌مه‌ن ده‌ڵێت: ئه‌وه‌ 24 جار مه‌هتاب هاته‌ سوژده بۆ چیاگه‌رێك له‌ نوجان‌، نه‌فه‌سه‌ سوره‌كانی وه‌ختی لێكدانی باڵی سه‌ماكه‌ره‌كان به‌ده‌م باوه‌ گه‌شتنه‌وه‌ چیا. به‌ڵام ئێمه‌ هه‌ر لێرا، گۆزه‌كانمان نه‌نارد بۆ كانی، خه‌یاڵه‌كانمان ئاورشێنگ نه‌كردو گوڵه‌ قه‌یسیه‌كمان نه‌نا به‌ سنگی لاپاڵمه‌ جه‌رگ بڕه‌كانه‌وه. دوو ساڵ به‌ر له‌ ئێستا بوو، گروپێك گه‌نجی شۆڕشگێڕ له‌ سوری ئامه‌د، قه‌ڵای دمدمیان كرده‌وه‌ به‌ داستانێكی زیندوو له‌ ڕۆحی مێژووی تێكۆشان دژی داگیركاری له‌ كوردستان دا. به‌ڵام ئێمه‌ هه‌ر له‌ ده‌نگی مۆته‌كه‌ ده‌هۆڵی دوژمن ڕاده‌چڵه‌كێین. دوو ساڵ پێش ئێستا خه‌یاڵی ئیمپراتۆری ته‌جه‌ به‌ قه‌ناسه‌كه‌ی نوجان و به‌رخۆدانی عه‌گیدانه‌ی هه‌ڤاڵانی ڕوخا. به‌ڵام ئێمه‌ هێشتا ناوازه‌یی شه‌فه‌قمان بۆ نادیاره‌! سه‌یره!‌ ئێمه‌ چۆن مه‌خلوقێكین كه‌ له‌ چاوه‌كانی چیاگه‌ردا فه‌رق به‌ به‌هه‌شت ناكه‌ین، دڵی هۆگر ناكه‌ینه‌ مه‌نزڵی فیداكاری و له‌ كانی به‌رخۆدێری زیلان تێر تێر ئاو بۆ ئاودێری شۆڕش له‌ كۆڵنانێین! چه‌ند بێ دڵ بووین كه‌ دوو ساڵ پێش ئێستا ئه‌م دڵه‌ نازدارانه‌ی نیشتیمانمان ته‌نهیا هێشتووه‌! له‌ به‌رامبه‌ر ئه‌م تاوانه‌ چۆن مێژوو دادگاییمان ده‌كات؟ نازانم‌. چۆن وه‌ڵام ده‌ده‌ینه‌وه‌؟ نازانم. به‌ڵام باش ده‌زانم ئه‌م شۆڕشگێڕانه‌ له‌ به‌هاری گه‌لێكیتر بڕوانایه‌ هه‌موو وڵات بۆیان ده‌بووه‌ مافوری ژیان. بۆ تاڵێك له‌ قژی ئه‌وان ئاسمانیان ده‌هێنایه‌ سه‌ر زه‌وی و زه‌ویان ده‌كرده‌ جه‌هه‌نه‌م.

ئه‌وان، پارێزوانانی ئاری، به‌ ته‌نیاو بێ دوو دڵی، به‌ ڕۆح و به‌رخۆدانی گه‌وره‌ی خه‌یری دورموش و عه‌لی چیچه‌كه‌كان، ده‌وڵه‌تی داگیركه‌ری توركیان به‌چۆكدا دا. ‌ 107 ڕۆژ له‌ كۆڵانه‌كانی سوری ئامه‌د دا به‌رامبه‌ر تانك، تۆپ و هه‌زاران عه‌سكه‌ری دوژمن به‌رخۆدانیان كرد. ئه‌وان سپارتاكانی ڕۆمایان تێپه‌ڕاند و بوونه‌ ئه‌و شه‌ڕوانانه‌ی به‌رامبه‌ر چه‌كی ناتۆ كۆڵانه‌و كۆڵان به‌ شه‌ڕی ده‌سته‌و یه‌خه‌ هه‌ناسه‌یان بۆ شۆڕشی ئازادی گه‌لێك ده‌چڕی. مێژووێكی ناوازه‌یان بۆ گروری شۆڕشی ئازادی مرۆڤایه‌تی ده‌نوسی و ئێمه‌ له‌ كاتی خۆیدا نه‌مانخوێنده‌وه‌! ئه‌و ده‌نگه‌ زوڵاڵه‌ی سه‌ركه‌وتنمان نه‌بیست و نه‌مانكرده‌ ته‌پڵی زه‌مه‌نێك. ئه‌وان چه‌رخی دوونیایه‌كیان گۆڕی و سه‌رده‌مێكی تریان ده‌ستپێكرد و گه‌شتنه‌ پله‌یه‌كی تری تێكۆشان، ئێمه‌ له‌ پاشدا ماین، پاشدامانێك تا قوڕقوڕاگه‌ شه‌رمی لێناین. ئه‌وان كۆتاییه‌كی موهته‌شه‌م بوون بۆ زۆر سه‌ره‌تای كه‌ ده‌بێت ئێمه‌ ئیدی به‌رگه‌ی ته‌نیایی و پێشه‌نگیه‌كانیان بگرین. ئه‌وان موهته‌شه‌م بوون چونكه‌ بێ باكانه‌ له‌ ته‌نیابوونیان شۆڕشگێڕیان هێنایه‌ قۆناغێك له‌ سه‌ركه‌وتن زیاتر هه‌نگاوێكی تری نه‌بێت.

له‌دوای له‌دایكبوونی زه‌مه‌نی ئه‌وان، ئیدی بیره‌وه‌ر زه‌نگی زه‌مانێكی له‌ پرشنگی خۆر به‌جێماوی به‌سه‌ر باڵه‌ سه‌حه‌ریه‌كانیه‌وه‌ پێیه‌ بۆ گوڵه‌ هه‌ناره‌ له‌ به‌هار به‌جێماوه‌كانی ئه‌م پایزه‌. چپه‌ی ئاوێكی له‌ دووره‌وه‌ هاتووی ئاوس به‌ ئاسوده‌یی، به‌هارێكی بێ ناڵه‌ی پێیه‌و،‌ ده‌یگه‌یه‌نێته‌‌ سینه‌ی دیاری با كاروانیه‌كان. زه‌مه‌ن ورشه‌ی نه‌فره‌تێكی له‌كۆڵه‌و له‌گه‌ڵ تۆفانی قه‌هری مارگرێته‌كاندا خۆی ده‌كێشێت به‌ بێ شه‌رمی زه‌مانه‌دا. سه‌ماێكی سور له‌ سیوه‌یلای دڵی سواریه‌ چیایه‌كانه‌وه‌ خۆی ده‌تلێنێته‌ ماچی دیجله‌وه‌ و‌ ته‌ڕ ته‌ڕ ده‌ست له‌ ملانی كۆلاره‌ چاوه‌ڕوانه‌كانی سور ده‌بێت. ترپه‌ی فێنكترین له‌ره‌ی دڵ، له‌مدیو دیواره‌كانی مێژووه‌ ئاوازی هه‌ناسه‌یه‌كی نه‌بڕاوه‌ی ناو سه‌مای‌‌ عه‌شقی سه‌رده‌مێك لێده‌ده‌ن له‌ ته‌لیزمی خۆر زیاتر هیچ خونچه‌یه‌ك ناگرێت بۆ ژین. ده‌رگای دڵه‌كان بخه‌نه‌ سه‌ر پشت چاوه‌شینه‌كانی چیاگه‌ر، هه‌ناسه‌كانی نوده‌م لێره‌ن. باوه‌شێك له‌ به‌رخۆدان و كۆڵێك تێكۆشان و ڕۆمانێكیان له‌ سه‌ركه‌وتن پێیه‌. ده‌رگای ماردین بخنه‌ سه‌ر پشت چیاگه‌ر له‌ باخچه‌كانی هاوسه‌ره‌وه‌ به‌ره‌و‌ كۆڵانه‌ ته‌نگه‌كانی "به‌ده‌نه‌‌" سه‌رده‌كه‌وێت، كۆلاره‌ی یه‌كه‌مین مه‌هتابی خۆی بۆ منداڵان هێناوه‌ته‌وه‌.

هه‌ستن ئه‌ی یاران كۆشكه‌كان بته‌قێننه‌وه‌، په‌نجه‌ره‌ی دوپشكه‌كان بهێننه‌ خواره‌وه، ڕاپه‌ڕن، تا ئه‌نقه‌ره‌ ڕامه‌وه‌ستن،‌ هۆگر له‌ پێشتانه‌وه‌یه‌. تازه‌ له‌ كوبانێ هاتۆته‌وه‌، ئاسۆی گه‌لێكی نه‌به‌زیوی پێیه‌ بۆ به‌رۆكی هه‌مووتان. بیرتان نه‌چێ له‌م ڕاپه‌ڕینه‌ دره‌نگماوه‌دا وه‌ك ماچێك بۆ داوای لێبووردن له‌ سه‌ماكه‌رانی ئازادی، وێنه‌كانی سه‌روه‌تیش به‌قه‌د داغ كاپی سور گه‌وره‌ بكه‌ن و بیبه‌ن له‌گه‌ڵ خۆتان. بیبه‌ن تا كاتێك یڵماز باوه‌شی كرد به‌ هۆگردا ببنه‌وه‌ سیانه‌ سواریه‌كه‌ی جاران و ئه‌سپه‌ شێكه‌ی خۆیان له‌ شه‌قامه‌ ئازاده‌كانی شاردا ببه‌زێنن. وێنه‌كه‌ی سه‌روه‌تیش به‌رن، تا ئێشی نیشتیمان، كزه‌ی دووری هه‌ڤاڵ، خۆڵه‌مێشی له‌دوای سیوه‌یلا به‌جێمان، به‌هار بگرێته‌وه‌ و زریكه‌كانی دووریش خه‌نده‌ بگرنه‌وه‌.‌ هه‌ستن فوو به‌ نه‌فحی سوردا بكه‌ن، دنیا به‌سه‌ر ئاجوجوماجوجه‌كاندا بڕوخێنن. وه‌ك سه‌ماكه‌رانی سور، تانكه‌كان وردوپرد بكه‌ن، به‌ شوعله‌ی خه‌یاڵه‌ سه‌حه‌ریه‌كان شه‌وه‌ پڕ له‌ مه‌رگه‌كان بدڕن. وه‌ك نوجان به‌ قه‌ناس مۆسیقا بۆ مژده‌ ئه‌زه‌لیه‌كان لێ بده‌ن و كڵاوی كۆشك به‌ فیشه‌كی نه‌به‌زین بێننه‌ خواره‌وه‌. وه‌رن ئه‌ی لاوانی نیشتیمان با‌ له‌شه‌وێكی باراناوی ئامه‌ددا به‌یادی هارون ئاگرێكی به‌رخۆدان له‌سور هه‌ڵگرسێنین، ئاورنگی چیایی به‌ ئاگری دڵی دایكاندا بڕژێنین. له‌جێی چیاگه‌ر له‌گه‌ڵ منداڵانی هه‌ژاردا یاری بكه‌ین، دڵی ژین ئاوپرژێن بكه‌ین. به‌ تاسه‌ی قژه‌ لوله‌كانی زیلان، له‌ چیاكانی كوردستان هه‌ڵپه‌ڕكێیه‌ك له‌ هه‌ناوی به‌فرا بكه‌ین. وه‌رن با له‌ جێی خه‌مگین تێرپێبكه‌نین و له‌ مۆڕاڵێكی گه‌ریلادا گۆرانیه‌ك‌ به‌ هه‌موو هێزی دڵمان بۆ ئه‌و ڕۆحانه‌ بڵێین كه‌ ئێستا له‌سه‌ر سوره‌كانی ئامه‌د چاوه‌ڕوانی سه‌مای ئاگرینی ئارته‌شه‌كه‌ی ئێمه‌ن تا جه‌ژنی ئازادیان به‌ گوێدا بچرپێنێت.‌

وه‌رن له‌مه‌ زیاتر دره‌نه‌گ نه‌مێنن، هه‌لهه‌له‌ بكێشن، شه‌قام له‌باوه‌ش بگرن، هه‌رچی به‌ردی نیشتیمانه‌ به‌سه‌ر فاشیزما بپهێننه‌ خواره‌وه‌. ده‌رگاكانی جه‌هه‌ننه‌م دابخه‌ن و خودا ده‌مامكداره‌كان له‌ ناویدا بخنكێنن. هه‌موو دزه‌كانی ته‌مه‌نی ئاشتی به‌ مۆلۆتۆفه‌كانتان خه‌فه‌ بكه‌ن. هه‌موو ئه‌و ترومبێلانه‌ی سه‌رنشین بۆ كۆشكه‌كان كۆ ده‌كه‌نه‌وه‌ له‌ ئاگر بئاڵێنن. هه‌موو ئه‌و بانقانه‌ی پێخه‌فی داگیركه‌ری گه‌رم ده‌كه‌ن سه‌ره‌وژێر بكه‌ن. به‌ ڕۆحی لاز كه‌ماله‌كانی سه‌رده‌می ئه‌وینه‌ ئاورینگیه‌كانی به‌هاری گه‌لان باوه‌ش به‌ ئازادیدا بكه‌ن.

كێ وه‌ك ئێوه‌ قاره‌مانی جوان و نازداری هه‌یه‌؟ له‌ خاكی كێ دا شۆڕشگێڕه‌كان به‌ دیار شۆڕشه‌وه‌ كه‌زی سپی زه‌مانه‌ی فیدایی بوون ده‌هۆنننه‌وه‌. كام جوانه‌دڵ، له‌ كام خاك ده‌توانێت 40 ساڵ بێ ماندوبون له‌ حوجره‌یه‌كی تاریكدا گۆرانی بۆ به‌یانیه‌كی پڕ خۆر بڵێت؟ كێ له‌ پێناوی ڕۆژێك كه‌ له‌ گونده‌كه‌یدا ته‌ماشای ئه‌ستێره‌كان بكات به‌ گیانی خۆی ئاوازی دواڕۆژی سه‌ركه‌وتن ده‌نوسێت؟ ئه‌ی نیشتیمان به‌ گروره‌وه‌ له‌ جه‌نگه‌كه‌ت بڕوانه، چونكه‌ شه‌ڕوانانی تۆ تاقانه‌ی ئه‌م دنیایه‌ن؟ نه‌ بۆنی به‌هاریان، نه‌ ڕه‌نگی زه‌مه‌نیان، نه‌ خۆری ئاسۆیان خۆڵی لێ ده‌نیشێت. ئه‌وان جوانترین شۆڕشگێڕن كه‌ له‌به‌رۆكی ئه‌م نیشتمانه‌ دراوه‌. ده‌ هه‌سته‌و چۆپیه‌كه‌ی چیاگه‌ر هه‌ڵگره‌، به‌ بۆنی گوڵه‌ قه‌یسیه‌كانی سه‌ر كه‌زیه‌كه‌ی نوجان فاشیزم له‌گه‌ڵ زه‌وی به‌ر پێی جه‌میلا ته‌خت بكه‌. له‌ هه‌ر چوار لاوه‌ منداڵه‌كانت بێ گۆڕ ده‌كه‌ن، پرچی لولی به‌هاری ته‌مه‌نیان پڕ خوێن ده‌كه‌ن، ئه‌گه‌ر نه‌بینه‌ وڵاتێك له‌ سه‌ماكه‌رانی سور ئیدی زه‌مان چه‌رخێكیتر ئاوڕ له‌ گۆنای پڕ خوێنت ناداته‌وه‌. چاوه‌ڕوانی چیت وا سواره‌كانت كۆتاییه‌ موهته‌شه‌مه‌كه‌یان بۆ هۆناوی، هه‌سته‌و بڕۆ بۆ ئه‌نقه‌ره‌ و تابووتی فاشیزم هه‌ڵبگره‌.

ئه‌سمه‌رترین خاك، منداڵه‌كانی تۆ ده‌مێكه‌ كڕێوه‌و‌ به‌سته‌ڵه‌كیان بڕیوه‌و سه‌رده‌مێكی پڕ له‌ خۆریان له‌ كۆڵه‌. بنواڕه‌ سواره‌ زاگرۆسیه‌كانت هاتن ده‌یانه‌وێت نوقڵانه‌ی جه‌ژن له‌ بورجی كه‌چی ببه‌خشنه‌ منداڵان. ئه‌سمه‌ره‌كه‌م بۆ وا خه‌مبار دیاری؟ ئه‌ی نازانی ئاسۆ دوای تاریكترین ساته‌كانی شه‌و له‌دایكده‌بێت؟ دایه‌ گیان به‌رزترین هاواره‌كان دوای قوڵترین بێده‌نگیه‌كان شه‌پۆلی خۆیان ده‌گه‌یه‌ننه‌ باره‌گای خودا. ئه‌م گه‌له‌ چیاگه‌ره‌و نابه‌زێت، نوجانه‌ و‌ به‌هاری لێ ناچێت. هۆگره‌ و‌ ته‌نها قاقای لێ ده‌بارێت. ئیدی سنگی تۆ مۆزه‌خانه‌ی سه‌مای مه‌یدانی جه‌نگه‌كانه‌. ئۆركه‌سترای خاكه‌ بێ سنوره‌كانه‌‌. باخی گوڵه‌ یاسه‌مینه‌كانی حه‌لاج،مانی و مه‌زڵومه‌كانه. ئه‌ی نیشتیمان منداڵه‌كانت كلیلی چیاكانیان سه‌رله‌نوێ كه‌شف كرده‌وه‌ و ئیدی كوردستانێكی ئازاد بۆ جیهانێكی پڕ ئاشتی له‌ ڕۆژهه‌ڵاتی ناوه‌ڕاستدا ڕاستیه‌كی ئه‌به‌دیه‌. ئه‌سپی سوری ئینانا له‌ ئیمرالی باڵی گرتووه‌و له‌گه‌ڵ ژه‌هری ده‌سه‌ڵات له‌ شه‌ڕێكدایه‌ كه‌ كوبانێ، سور، جزیره‌و شه‌نگال ده‌مێكه‌ زه‌نگی سه‌ركه‌وتنه‌كه‌ییان بۆ لێداوه‌. قڕاڵه‌كان له‌و ده‌شته‌دا سه‌ریان له‌ لاشه‌ی نیشتیمانی گه‌لان جیا ده‌كرێته‌وه‌ كه‌ به‌ كه‌ل‌له‌ی مرۆڤ قه‌ڵایان تیا دروست كرد. مرۆڤایه‌تی له‌ باوه‌شی تۆدا هه‌قانیه‌تی دۆزیه‌وه‌. له‌ باوه‌شی تۆدا تامی سه‌ركه‌وتنی ئازاده‌یی خۆی، ژیان ده‌كاته‌وه‌. تۆ هیوای چونكه‌ ئاپۆی نیشتیمانی، ده‌لالی، به‌درانی. پێبكه‌نه‌ به‌ ڕه‌نگی جواننی قاقاكانی چیاگه‌ر، به‌ غروره‌وه‌ له‌ شه‌قامبه‌ به‌ وێنه‌ی بوێری نوجان. شه‌ڕكه‌ربه‌ ئه‌ی نیشتیمان، هاوتا‌ی شه‌ڕه‌كه‌ری هۆگر و زیلان. ئازادی چاوه‌ڕێته‌ تا له‌ به‌رۆكی جیهانی بده‌یت. ده‌ هه‌سته‌ با بچین بۆ ئه‌نقه‌ره‌، بۆ ئه‌و خاڵه‌ی ده‌ستمان پێكرد، پاشان بێینه‌وه‌ بۆ ئامه‌د و له‌سه‌ر سوری ئامه‌د له‌ سه‌وزی چاوه‌كانی چیاگه‌ردا مشتێك مژده‌ی شیرین له‌ ده‌سته‌كانی ڕێبه‌ر ئاپۆدا به‌ منداڵانی سور ببه‌خشین. ده‌ ڕاپه‌ڕن له‌ مێژه‌ ئازادیتان هه‌ق كرد.

ئه‌ی نیشتیمان ئیدی ده‌بێت هاوار بكه‌ین و بڵێین چیاگه‌ر گیان، هه‌ڤاڵی نازدارترین شۆڕشگێڕه‌كانی دنیا ده‌مانه‌وێت له‌ شوعله‌ی چاوه‌ ئاسمانیه‌كانی تۆدا به‌ سیوه‌یلای دڵی عاشقی هه‌موو سه‌ماكه‌رانی سور بڵێین: به‌ردی قه‌یلیانتان خسته‌ سه‌ر ئامانجه‌كانی فاشیزم له‌ كوردستاندا و ئیدی خه‌یاڵیان خاوه‌ له‌م وڵاته‌. به‌ڵام ئێمه‌ مێخه‌كی ئازادیمان نه‌دا له‌ به‌رۆكی گۆڕت با بۆ ئێمه‌ ده‌رد بێت، چاوه‌ شینه‌كانت هه‌رگیز بێ یار نابن با بۆ ئه‌وان ده‌رد بێت.

چه‌ند هه‌واڵكی تر

‌سەربازێكی تورك لەسەر سوچی گەڕەكەكەمان و خوێندنگەش لە پایتەخت ...

‌ له‌ بازیان بۆ پشتگیرى عه‌فرین چادر هه‌ڵدرا...

‌نەجیبە عومەر: ڕێبەر ئاپۆ توانی ژنان بکاتە خاوەن ئیرادە...

‌رەژاک"شه‌ره‌ف و ناموس خاک و وڵاته‌، نه‌ک ژن"....

‌بێریڤان محەمە: ێکۆشانی عەفیرن سەرکەوتنی ژنە لە هەموو جیهاندا...

‌هۆکاری شکستەکانی گەلی کورد و سەرکەوتنی...

‌با کۆنفیدڕالیزمی دیموکراتی بکەینە دروشم و بیدەین بەگوێی پاڵەوانەکانی ف...

‌بەسێ هۆزات:پارتی ڕیفراندۆمی کردووەتە ڕۆژەڤ بۆ ئەوەی خۆی ڕزگار بکات...

‌ئەو فیشەکە!...

‌كۆبوونه‌وه‌ی ژنانی كورد كۆتایی هات و كۆمیته‌یه‌ك بۆ ئاماده‌كاری بۆكۆنف...

‌ شاندێكی ژنانی باكور بۆكۆنفرانسی نه‌ته‌وه‌یی ژنی كورد له‌باشوورن...

‌هه‌ڤاڵ زیلان، ئیرادەی ئازاد و هێزی ڕاستیینه‌ی جوانترکردنی ژیانە...

123
په‌ڕه‌یله‌ 3
ژماره‌ی بابه‌ت

كه‌ش و هه‌وا

فەیسبووك