کوردی           عربی

تیرۆرکردنی سەردەشت عوسمان و ئازادی رۆژنامەگەری‌

05/05/2019

Sunday‌


زمناکۆ ئیسماعیل

   (سێ) یی مایسی هەموو ساڵێک، رۆژی ئازادی رۆژنامەگەرییە لەجیهان، بەڵام (پێنج) یی مایسی هەموو ساڵێک، رۆژی تیرۆرکردنی رۆژنامەنوس (سەردەشت عوسمان)ە لەهەرێمی کوردستان، لەنێوان ئەو دوو رۆژەدا، یەک لێشاو رۆژنامەنوس هەیە، بە سەدان چەناڵی میدیایی هەیە، بەسەدان رێکخراوی کۆمەڵگای مەدەنی هەیە، سەرجەمیان کۆن لەبارەی ئازادی بۆچون و ئازادی رادەربڕین، بەڵام ئەو گوتارەی، کە زۆربەی ئەو چەناڵ و رێکخراوو رۆژنامەنوسانەی نێو چەناڵەکان، لەگەڵ دەربڕینەکانی سەردەشت عوسمان کۆ ناکاتەوە، راستگۆییە لەبارەی (ئازادی رادەربڕین)، سەردەشت عوسمان راستگۆیانەو ئازایانە رای خۆی دەربڕی، ئەو راستگۆیانە باسی بەچینایەتیکردنی هەرێمی کوردستانی دەکرد، راستگۆیانە ئاماژەی بە بونی مافیای خوێنمژ و چەتەگەری نەوت و  ئەقڵییەتی گرگنی چەکداری حیزب دەکرد، راستگۆیانە باسی لە دروستبونی ئەو دڕندە مەترسیدارە دەکرد، کە پاش خستنی دڕندەکانی بەعس، ووردە ووردە دروستدەبونەوە، ئاخرد نیتچە دەڵێت "ئەوانەی دژ بە دڕندەکان دەچنە جەنگەوە نابێت خۆیان ببنەوە بە دڕندە". بەڵام ئەو هێزو لایەنەی کە سەردەشت عوسمان بەتەنزەوە قسەی لەبارەوە دەکرد، نەک خۆیان ببونەوە بەدڕندە، بەڵکو ببون بە مافی نەوت و چەتەی خوێن و دواجار سەری سەردەشت عوسمان و دەیان گەنجی خێر لەخۆ نەدیوی ئەم هەرێمەیان خوارد.

   هەر لەبەر ئەوەش بوو کە سەردەشت عوسمان لەگوتارێکی تەنز ئامێزدا، ئاماژەی بۆ ئەوە دەکرد، کەسانێک کە هاوڵاتیانی هەرێمەکەیان بەچینایەتی کردوە، ئەگەر هاوڵاتییەکی ئاسایی بیەوێت سنوری خێزانی ئەوان ببڕێت و تێکەڵی خێزان و خانەوادەکەیان ببیت، ئایە ئەوان ئامادەن کە چینایەتییان تێکبشکێنن و ژیان لەگەڵ هاوڵاتییەکی چینی خوار خۆیان پێکبهینن؟!، بێگومان نەخێر، چونکە چینی ئەوان، چینی نەوت دزین و مافیاگەرییە، ئەوان کەسانێکی وەک خۆیان دەوێت و ناتوانن جارێکی دیکە، لەشەپۆلی سیاسی خۆیان، داببەزن و بێنە نێو شەپۆلەکانی خوارەوە، ئەوان لەمەوجی بازرگانی سیاسین، چیتر هاوڵاتی ئاسایی هەرێم، لەئاستی خۆیاندا نابینن، بۆیە پێویستیان بەوەیە، کە چینی خوار خۆیان، وەک مەڕ ببینن و چینی خۆشیان وەک شوان، ئەوان پێویستیان بەوەیە کە خەڵکانی بکوژ و دڕندە لەنێو خۆیاندا بچێنن و بەریبدەنە ئەو خەڵکەی، کە کردویانە بە پێپلیکانەو بەسەریاندا سەرکەوتون بۆ پلەی باڵا.

   لەسەر ئەو بۆچونە سیاسییە تەنز ئامێزەی کە سەردەشت عوسمان لەگوتارێکدا، بنەماڵە سیاسییەکانی هەرێمی پێ تەڕکرد، ئەو گەنجە خوێنگەرمە تیرۆرکرا، بەڵام ئەوەی کە مایەوە، ئەو رۆژنامەنوس و چالاکوانانەی نێو رێکخراوەکانی نزیک لەحیزبە مافیاگەرییەکانە، کە گوێی خۆیان لێخەواندوەو هیچ لەبارەی ئەو حیزب و بەرپرسانەوە ناڵێن بەگوتەی خۆیان "تا نانبڕاوو ژیان فەوتاوو نەبن". ئەوانەی کە سەردەشت عوسمانیان تیرۆرکرد، ئێستا خاوەنی میدیاو چەناڵی میدیایی خۆیانن، خاوەنی رۆژنامەنوس و پەیامنێرو کامێرامانن، خاوەنی دەربڕینی هەواڵ و راپۆڕتن، ئێستا ئەوان زانیاری پەخش دەکەن، ئەوان بنەمای کاری رۆژنامەگەری،  بەگوێیی ئەو خەڵکەدا دەچریکێنن، ئەوان باسی ئازادی رۆژنامەگەری دەکەن، ئەوان باس لەبونی ئازادی را دەربڕین دەکەن، وەک ئەوەی ئەوان نەبوبن کە سەردەشت عوسمانیان تیرۆر کرد بێت، وەک ئەوەی کە ئەوان نەبوبێتن کە سۆرانی مامە حەمەو کاوە گەرمیانی و وویدات حوسێن و دەیان کەسی دیکەی رۆژنامەنوسیان دابێتە بەر رێژنەی فیشەک و قەڵتانی خوێنیان نەکردبن. 

   ئەمڕۆش لە سایەی حوکمی ئەو دەسەڵاتدارە سیاسییانەو لەپاش نۆ ساڵ لەتیرۆرکردنی سەردەشت عوسمان، شکستی سیاسییان دەبینین و دەبیستین، قەیرانی دەسەڵاتدارییان لەسەر سکی برسی هاوڵاتییانەوە بە ئاشکرا دەبینین، چەوسانەوەو ستەمکارییان لەنێو یەکە ئیداری و کۆمەڵایەتی و سیاسی و فەرهەنگی ئەم هەرێمەدا دەبینین، بەڵام ئەوەی کە بوە بە ماکیاژکاری ئەو ستەمکارییە، ئەو کەسانەن کە لەنێو ماشێنی میدیایی بکوژانی سەردەشت عوسماندا کار دەکەن، گەرەکیانە ناشیرینیەکانی ئەو دەسەڵاتە، بەکارە رۆژنامەنوسییەکانیان بشارنەوەو لەو ڕوانگەشەوە بانگی ئازادی رۆژنامەگەری و ئازادی رادەربڕینو ئازادی بۆچونی جیاوز، بەگوێی هاونیشتیمانیاندا دەدەن، ئەوانە لەڕێگای پارەی زەبالاحی قوتی خەڵکەوە بون بەرۆژنامەنوسانی رامکراو، بەڵام ئەوەی کە بوەتە سومبولی ئازادی رادەربڕین، سەردەشت عوسمانی تیرۆرکراوە، سۆران و کاوەو وویدات و دەیان قەڵەمی زیندووی ئەم گەلەیە، سەردەشت عوسمان و هاوڕێ تیرۆکراوەکانی، بەتەنها پەڵەیەک نین بەناوچاوی ئەو سیاسیانەی کە دەستیان هەبوە لە ووێرانکردنی ئەم هەرێمە، بەڵکو تیرۆرکردنی ئەوان، پەڵەیەکی ناشیرنە بەناوچاوی ئەو رۆژنامەنوس و میدیاکارانەی، کە بونەتە ماکیاژکاری دەسەڵات و بە کاری راگەیاندن هەوڵی درێژکردنەوەی حوکمی ستەمکارییان ئەدەن، ئالێرەوە دەبێت رۆژی ئازادی رۆژنامەگەری لەهەرێمی کوردستان، وەک درۆیەکی شاخدار ببینین، وەک ماسکێک ببینین، کە روخساری ناشیرینی، ستەمکارە حیزبەکانییەکانی هەرێمی پێداپۆشراوە.


چه‌ند هه‌واڵكی تر

‌پەکەکە ئەبێت چی بکات؟...

‌كه‌ركوك و داگیركردنی خاكی كوردستان...

‌داعش ودوو سه‌رۆكی درۆزن...

‌ناکرێت و نابێت، کوردستانی ڕۆژهەڵات ئەمە لەبیربکات!...

‌سیستەمی سەرۆکایەتی و گۆڕینی بۆ پەڕڵەمانی، لەڕوانگەی (نەوشیروان مستەفا)...

‌تكایه‌ ئه‌و شانۆگه‌رییه‌ راگرن...

‌ئیرهابی فیکری و شەڕی کۆنە قین...

‌ئایا سه‌رۆكی‌ هه‌رێم پێویسته‌؟...

‌١٤ى تەمووز و ٨ى تشرینى دووەم دوو مێژووى بەرەنگاربوونەوەى فاشیزم...

‌ئایا قوباد چی لەنێچیر ئەچێت؟...

‌تۆ تەنها تەماشای ئەو تاقە وێنەیە بکە!...

‌پۆستی سەرۆک کۆمار لە نێوان بەهار و پایزدا!...

په‌ڕه‌یله‌ 11
ژماره‌ی بابه‌ت

كه‌ش و هه‌وا

فەیسبووك