کوردی           عربی

به‌ڵگه‌کانی یه‌که‌مین؛ کۆنگره‌ی"ته‌ڤگه‌ری ئازادی کۆمه‌ڵگای کوردستان" "ته‌ڤگه‌ری ئازادی"‌

06/12/2014

Wednesday‌

به‌ڵگه‌کانی
یه‌که‌مین؛ کۆنگره‌ی"ته‌ڤگه‌ری ئازادی کۆمه‌ڵگای کوردستان"
"ته‌ڤگه‌ری ئازادی"





ناوی نامیلکه‌: به‌ڵگه‌کانی ته‌ڤگه‌ری ئازادی کۆمه‌ڵگای کوردستان (ته‌ڤگه‌ری ئازادی)
چاپ: یه‌که‌م ـ ساڵی 2014
شوێنی چاپ: سلێمانی
تیراژ: 4000 دانه‌
له‌بڵاوکراوه‌کانی کۆمیته‌ی راگه‌یاندنی ئازاد (2)




مافی چاپ و بڵاوکردنه‌وه‌:
 بۆ(کۆمیته‌ی راگه‌یاندنی ئازاد)ی ته‌ڤگه‌ری ئازادی پارێزراوه‌

بۆ رای گشتی ‌و ده‌زگاکانی راگه‌یاندن
راگه‌یاندنی ده‌ستپێشخه‌ری ته‌ڤگه‌ری ئازادی


له‌ رۆژگاری ئه‌مڕۆماندا ته‌واوی کۆمه‌ڵگاکانی مرۆڤایه‌تی له‌ناو گێژاوێکی قووڵ ‌و قه‌یرانی هه‌مه‌لایه‌ن‌و مه‌ترسیداردا ده‌ژین. هۆکاری بنچینه‌یی ئه‌و دۆخه‌ش خودی سیسته‌می هه‌ژموونگه‌رایی جیهانه‌ که‌ نه‌ک ته‌نیا توانستی چاره‌سه‌رکردنی قه‌یران‌و گرفته‌کانی خۆیو کۆمه‌ڵگای نه‌ماوه‌و له‌ هه‌موو رووێکه‌وه‌ به‌ بنبه‌ستبوون گه‌یشتووه‌، به‌ڵکو خۆی بووه‌ به‌ سیسته‌می گێژاوو قه‌یرانه‌کان. له‌ پێناو له‌سه‌رپێ مانه‌وه‌ی خۆشیدا وه‌ک سروشت‌و کاره‌کته‌ری سه‌ره‌کی خۆی په‌نای بردۆته‌ به‌ر توندوتیژی ‌و شه‌ڕ و پێکدادانه‌کانه‌وه‌. له‌ده‌رئه‌نجامدا ئه‌وه‌ش قه‌ڵاچۆکردن ‌و کۆمه‌ڵکوژی، کۆچبه‌ری، وێرانکاری سروشت، هه‌ژاریو بێکاری، نادادی کۆمه‌ڵایه‌تیو ناسۆری دیکه‌ی لێکه‌وتۆته‌وه‌. ئه‌وه‌ش دۆخێکی دروست کردووه‌ که‌ ئیتر به‌رگه‌گرتنی ئه‌سته‌مه‌. بۆیه‌ ئێستا مرۆڤایه‌تی ئازادیخواز له‌ناو تێکۆشان‌و لێگه‌ڕین دایه‌ بۆ رزگاربوون له‌و گێژاو و قه‌یرانانه‌ی له‌ئارادان.
ئه‌و دۆخه‌ی که‌ خۆرهه‌ڵاتی ناوینیش تێیدایه‌ ده‌ره‌نجام‌و ره‌نگدانه‌وه‌یه‌کی روونی ئه‌و گێژاوه‌یه‌ که‌ سیسته‌می باڵاده‌ستی جیهانی تێی که‌وتووه‌ و هه‌وڵده‌دات به‌سه‌ر ته‌واوی مرۆڤایه‌تیدا بیسه‌پێنێت. چونکه‌ سیسته‌مه‌ تیۆکراتی، ئۆتۆکراتی ‌و ئۆلیگارشییه‌ ستاتۆپارێزه‌کانی ناوچه‌که‌ به‌رهه‌م‌و پارچه‌یه‌کی دانه‌بڕاو و ئۆرگانی سیسته‌می هه‌ژموونگه‌رایی جیهانین که‌ به‌سه‌ر گه‌لانی ناوچه‌که‌دا سه‌پێنراون.
به‌هۆی راستینه‌ مێژوویی ـ کلتوویه‌که‌ی، هه‌روه‌ها پێگه‌ ژیۆپۆلیتیک‌و ژیۆستراتیژیه‌که‌یو ده‌وڵه‌مه‌ندی سه‌رچاوه‌ سروشتیه‌کانی وزه‌وه‌ خۆرهه‌ڵاتی ناوین بۆته‌ مه‌یدانی سه‌ره‌کی ناکۆکی، ململانێ ‌و شه‌ڕو پێکدادانه‌کانی جیهان. بۆیه‌ رێکه‌وت نییه‌ که‌ له‌ رۆژی ئه‌مڕۆماندا زۆرترین ئاڵوگۆڕ‌و سه‌راوبن بوون به‌خۆیه‌وه‌ ده‌بینێت. له‌ راستینه‌ی ره‌وشی ئێستای ناوچه‌که‌دا سیسته‌می باڵاده‌ستی جیهانی رووبه‌ڕووی هه‌ڵوه‌شانه‌وه‌ ده‌بێته‌وه‌. له‌و چوارچێوه‌یه‌شدا ئه‌مڕۆ ناکۆکی، ململانێ‌و شه‌ڕو پێکدادانه‌کانی نێوان زلهێزه‌کانی جیهان، رژێم‌و هێزه‌ ستاتۆگه‌راکان‌و ته‌ڤگه‌ره‌ ئازادیخوازه‌کانی ناوچه‌که‌ به‌ به‌رزترین ئاستی خۆی گه‌یشتووه‌. سه‌رجه‌م گه‌لان، باوه‌ڕی، ئایین‌و مه‌زهه‌به‌کان له‌سه‌ر بنه‌مای سیاسه‌تی په‌رتکه‌ ـ زاڵبه‌ به‌گژ یه‌کتره‌وه‌ نراون‌و به‌ ده‌ستی یه‌کتر له‌ناو ده‌برێن. به‌راده‌یه‌ک ده‌مارگیریو شۆفێنیزمی میللیگه‌رایی ـ ئایینگه‌رایی هاوشێوه‌ی داعش فووی تێکراوه‌، راستینه‌ی به‌یه‌که‌‌وه‌ ژیانی هه‌زاران ساڵه‌ی نێوانیان که‌وتۆته‌ ژێر هه‌ڕه‌شه‌وه‌ و چه‌ندین کلتوور رووبه‌رووی له‌ناوچوون بوونه‌ته‌وه‌. ئه‌مه‌ش ئه‌و دۆخه‌یه‌ که‌ گوزارشت له‌ قووڵاییو کوشنده‌یی ئه‌و گێژاو‌و قه‌یرانانه‌ ده‌کات که‌ له‌پێناو نه‌هێشتنیو رزگاربوون لێی، تێکۆشان ئه‌رکێکی ژیانیو ده‌ست لێبه‌رنه‌دراوه‌.
عێراق‌و باشوری کوردستان به‌هه‌مان شێوه‌ی خۆرهه‌ڵاتی ناوین له‌ناو ئاڵوگۆڕێکی ریشه‌ییدایه‌. له‌پێناو مانه‌وه‌و خۆسه‌پاندن‌و قۆرخکردندا هێزو رژێمه‌ ستاتۆ پارێزه‌کان ‌و زلهێزه‌ پاوانخوازه‌کان عێراق‌و باشوری کوردستانیان کردۆته‌ مه‌یدانی شه‌ڕو پێکدادانی خوێناویو تاقیگه‌ی پڕۆژه‌ ستراتیژیه‌کانیان. له‌م پێناوه‌دا به‌ هه‌موو شێوه‌یه‌ک له‌ هه‌وڵی سه‌رکوتکردن‌و تێکشکاندنی ئیراده‌ی ئازادی گه‌لان دان.
کوردستانیش به‌هۆی پاشخانه‌ مێژووییه‌که‌ی، پێگه‌ جیۆستراتیژیه‌که‌یو ده‌وڵه‌مه‌ندی کلتوره‌ مه‌عنه‌ویه‌که‌ی ‌و سه‌رچاوه‌ سروشتیه‌کانیه‌وه‌ ئه‌مڕۆ بۆته‌ چه‌قی ئه‌و ململانێیانه‌‌و چاره‌نووسی سیسته‌می ده‌سه‌ڵاتگه‌رایی ‌و ئاینده‌ی گه‌لان له‌سه‌ر ئه‌م خاکه‌ یه‌کلایی ده‌بێته‌وه‌. له‌م سۆنگه‌وه‌ رێکه‌وت نییه‌ که‌ به‌ ناوی ته‌واوی مرۆڤایه‌تییه‌وه‌، ئه‌مڕۆ کوردان‌و کوردستان له‌جه‌نگی به‌ره‌نگاربوونه‌وه‌ی کۆنه‌په‌رستیو فاشیزمی میللیگه‌رایی ـ ئاینگه‌رایی داعش ی ئامرازی ده‌ستی داگیرکه‌ران له‌ سه‌نگه‌ری هه‌ره‌ پێشه‌وه‌دایه‌و به‌رگری له‌ که‌رامه‌تی ته‌واوی مرۆڤایه‌تی ده‌کات.
هه‌ڵبه‌ته‌ ئه‌م دۆخه‌ش له‌ کاتێکدایه‌ که‌ ئێراق‌و باشوری کوردستان به‌ ده‌ست گێژاوێکی قووڵ ‌و قه‌یرانی هه‌مه‌لایه‌نه‌وه‌ ده‌ناڵێنێت. ده‌ستوه‌ردانێکی هه‌مه‌چه‌شنه‌ی هێزه‌ جیهانییو هه‌رێمیه‌کان له‌ئارادایه‌. ئه‌مه‌ش له‌پاڵ خۆرهه‌ڵاتی ناوین ئێراقیشی بۆ دوو به‌ره‌ی شیعه‌ و سوننه‌ دابه‌شکردووه‌. رژێمی ناوه‌ندی ـ مه‌زهه‌بگه‌رایی به‌غدادیش دۆخه‌که‌ی قووڵتر‌و ئاڵۆزتر کردووه‌. بۆیه‌ شانبه‌شانی کێشه‌ی ده‌ستوری ـ یاسایی، ئه‌مڕۆ ئێراق تووشی قه‌یرانی سیاسی، ئابووری، کۆمه‌ڵایه‌تی، کلتوری ‌و ئه‌خلاقی قووڵ بۆته‌وه‌. سه‌ره‌کیترینی ئه‌و قه‌یران‌و کێشانه‌ش له‌گه‌ڵ هه‌رێمی باشوری کوردستان له‌ئارادایه‌ که‌ ئه‌وانیش کێشه‌کانی ده‌ستوور، خاک (ماده‌ی 140)، نه‌وت، بودجه‌‌و پێشمه‌رگه‌ن.
له‌ باشوری کوردستانیش سه‌رباری ئه‌وه‌ی 22 ساڵ زیاتره‌ په‌رله‌مان ‌و حکومه‌تی هه‌رێم له‌سه‌ر کارن، به‌ڵام تا ئێستا دۆخی بێ سیسته‌می زاڵه‌. هه‌رێم بێ ده‌ستووره‌ و تا ئێستا زۆربه‌ی یاساکانی سه‌رده‌می رژێمی به‌عس کاریان پێده‌کرێت. که‌ بێگومان زۆربه‌یان له‌ خزمه‌تی به‌رژه‌وه‌ندی چینێکی دیاریکراودان‌و له‌گه‌ڵ دیموکراسیو ئازادیه‌کاندا ناکۆکن‌و سه‌رچاوه‌ی ناعه‌داله‌تی کۆمه‌ڵایه‌تین.
به‌ درێژایی ئه‌و(22) ساڵه‌ی حوکمڕانی سیسته‌مێکی سیاسی ئاوانه‌کراوه‌ له‌ خزمه‌تی کۆمه‌ڵگای باشوری کوردستاندا بێت. به‌هۆی زاڵبوونی ئه‌قڵیه‌تی ته‌سکی حزبایه‌تی په‌رله‌مان بێ رۆڵ‌و ئیفلیجکراوه‌‌و ئه‌سیری ئه‌جندا‌و سیاسه‌تی حزبایه‌تییه‌‌و نه‌بووه‌ به‌ مه‌رجه‌ع‌و ئۆرگانی یاسادانان‌و چاودێری، ده‌سه‌ڵاتی دادوه‌ریش له‌لایه‌ن هێزه‌کانی ده‌سه‌ڵاته‌وه‌ قۆرخکراون‌و زیاتر له‌به‌رژه‌وه‌ندی ده‌وروبه‌رێکی دیاریکراودا کار ده‌که‌ن. حکومه‌ته‌ یه‌ک له‌دوای یه‌که‌کانیش له‌ جیاتی پێشخستنی سیاسه‌ت ‌و به‌رنامه‌یه‌کی نیشتمانی ـ نه‌ته‌وه‌یی ‌و دامه‌زراوه‌یی، ئه‌قڵیه‌ت ‌و به‌رژه‌وه‌ندی ‌و ئه‌جندای حزبایه‌تی ته‌سکیان به‌ بنه‌ما گرتووه‌.
له‌م چوارچێوه‌یه‌شدا سیسته‌می په‌روه‌رده‌و فێرکردن خاوه‌ن به‌رنامه‌یه‌کی ستراتیژی درێژخایه‌ن‌و به‌ گوێره‌ی واقیعی کۆمه‌ڵگا نییه‌. بۆیه‌ ناتوانێ رۆڵ له‌ دروستکردنی تاک‌و کۆمه‌ڵگایه‌کی هۆشیار، ئازاد‌و خاوه‌ن ئیراده‌دا ببینێ. سیسته‌می ته‌ندروستیش به‌ هه‌مان شێوه‌ له‌جیاتی بینینی رۆڵی بنه‌ڕه‌تی خۆی، زیاتر وه‌ک که‌رتێکی بازرگانیو به‌ده‌ستهێنانی قازانج مامه‌ڵه‌ی له‌گه‌ڵ ده‌کرێت. له‌م سۆنگه‌یه‌وه‌ ره‌نگدانه‌وه‌ی خراپی له‌سه‌ر دۆخی ته‌ندرستی تاک‌و کۆمه‌ڵگا هه‌بووه‌. له‌ژێر ناوی گه‌یشتن به‌ ئابووری سه‌ربه‌خۆ پرۆسه‌یه‌کی ناشه‌فافی دۆزینه‌وه‌، ده‌رهێنان، پاڵاوتن‌و فرۆشتنی نه‌وت به‌ڕێوه‌ ده‌چێت که‌ زیاتر له‌ چوارچێوه‌ی تاڵانکردنی سه‌رچاوه‌‌و سامانی گه‌ل‌و نیشتمان ده‌خولێته‌وه‌، قازانج‌و خێره‌که‌ی بۆ ده‌وڵه‌ت‌و کۆمپانیا ده‌ره‌کیه‌کان‌و ناوه‌ندێکی ده‌سه‌ڵاتدار‌و ده‌ستڕۆیشتوی باشوری کوردستانه‌‌و زیان‌و به‌ڵاکه‌شی بۆ گه‌له‌ که‌ له‌ ناهه‌موارترین دۆخی ئابوریدا ده‌ژیت. له‌ژێر ناوی ئابووریو بازاڕی ئازاده‌وه‌ سیسته‌مێکی تاڵان‌و سه‌رمایه‌ی قۆرخکاری له‌ به‌رژه‌وه‌ندی چه‌ند بنه‌ماڵه‌و ده‌ورو به‌رێکی به‌رته‌سک زاڵکراوه‌. شانبه‌شانی گه‌وره‌کردنی سوپای بێکاران کۆمه‌ڵگا‌و تاکی کوردستان له‌ خاک‌و ره‌نج دابڕێنراوه‌، هه‌وڵی دروستکردنی کۆمه‌ڵگایه‌کی به‌رخۆر‌و مشه‌خۆر دراوه‌، له‌میانی بچووککردنه‌وه‌‌و چۆڵکردنی لادێ‌و گونده‌کان ئابوری راسته‌قینه‌ (کشتوکاڵ‌و ئاژه‌ڵداری) له‌ناوبرا‌وه‌، وابه‌سته‌کی ئابوری کراوه‌ به‌ واقیعێکی سه‌پێنراو. به‌مجۆره‌ نامۆبوونی مرۆڤ به‌رامبه‌ر ناوه‌رۆکی خۆیو به‌کۆمه‌ڵگابوون به‌ به‌رنامه‌ کاری له‌سه‌ر کراوه‌. له‌میانی په‌یڕه‌وکردن‌و ده‌رخستنی یاسای زیاتری پیاوسالاری سیسته‌می ره‌گه‌زپه‌رستی کۆمه‌ڵگا قووڵتر کراوه‌ته‌وه‌، ئه‌وه‌ش کێشه‌ی ئه‌خلاقی ـ کۆمه‌ڵایه‌تی زیاتر‌و لێک هه‌ڵوه‌شانه‌وه‌ی خێزان‌و زیادبوونی رێژه‌ی ته‌ڵاق‌و کۆمه‌ڵکوژیه‌کی بێده‌نگ‌و شاراوه‌ی ژنانی له‌گه‌ڵ خۆیدا هێناوه‌.
باشوری کوردستان چ وه‌ک کۆمه‌ڵگا چ وه‌ک ده‌سه‌ڵات له‌ دۆخی ئێستایدا له‌ناو گێژاوێکی گشتگیری زهنی، سیاسی، ئابوری، کۆمه‌ڵایه‌تیو کولتوری دایه‌. رووداوه‌کانی شه‌نگال‌و دواتریش له‌ لوتکه‌دا مایه‌پوچبوونی دۆخی سیاسی، سه‌ربازی، دبلۆماسی، ئابوریو ئه‌منی ده‌سه‌ڵات‌و سیسته‌می ده‌سه‌ڵاتگه‌رێتی ئاشکرا کرد.
له‌ئاکامی ئه‌و مایه‌پوچبوونه‌ و به‌رده‌وامی گه‌نده‌ڵی و تاڵانکاریه‌کان له‌لایه‌ن ده‌سه‌ڵاته‌وه‌، ناڕه‌زاییه‌کانی گه‌ل له‌جاران زیاتر بووه‌، هه‌روه‌ها به‌هۆی جێگرتنی هێزه‌کانی پێشووتری ئۆپۆزسیۆن له‌ده‌سه‌ڵاتدا ئه‌مڕۆ پێویستی به‌ هێزێکی ئۆپۆزسیۆنی چالاک و پۆزه‌تیف هه‌یه‌.
به‌ له‌به‌رچاوگرتنی ئه‌و راستیانه‌ ‌و پێویستیه‌کانی ئه‌و قۆناخه‌ نوێیه‌ی تێیدا ده‌ژین سه‌رله‌نوێ پێویستی به‌ پێداچوونه‌وه‌ی سه‌رجه‌م بواره‌ زهنی، سیاسی، ئابووری، کۆمه‌ڵایه‌تی، دبلۆماسی، په‌روه‌رده‌یی، ته‌ندروستی ‌و کلتوریه‌کانی باشوری کوردستان‌و ده‌ستپێکردنی قۆناخێکی نوێی خه‌بات‌و تێکۆشان هه‌یه‌ تا سیسته‌م، چه‌مک، ئه‌قلیه‌ت‌و شێوازی نوێ به‌ بنه‌ما بگرێت. له‌و چوارچێوه‌یه‌دا ئێمه‌ وه‌ک کۆمه‌ڵێک که‌سایه‌تی سیاسی، کولتووری، کۆمه‌ڵایه‌تی، چالاکوانی خه‌باتی رێکخراوه‌ییو مه‌ده‌نیو ژنان له‌میانی پێشخستنی ده‌ستپێشخه‌ری ته‌ڤگه‌ری ئازادی، تێکۆشانی ئازادیو دیموکراتیخوازانه‌ی خۆمان بره‌و پێده‌ده‌ین.
ده‌سپێشخه‌ریه‌که‌مان وه‌ک ته‌ڤگه‌رێکی نوێ که‌ هه‌ڵقوڵاوی پێویستیه‌کانی دۆخی بابه‌تیو خۆیی خودی باشوری کوردستان‌و ئه‌و ره‌وشه‌ چاره‌نووسسازه‌یه‌ که‌ تێیدا گوزه‌ر ده‌کات، خاوه‌ن جیهانبینیو رێبازی تایبه‌تی خۆیه‌تی، که‌ ئه‌ویش به‌رهه‌می لێگه‌ڕینه‌ زهنی ‌و کۆمه‌ڵایه‌تی ‌و سیاسیه‌کانی خودی کۆمه‌ڵگای کوردستانه‌. خۆی له‌ بۆته‌ی مۆدێلێکی نوێی رێکخستنی ته‌یار ده‌کات‌و به‌ پێشه‌نگایه‌تی ژنان‌و گه‌نجانی ئازادیخواز‌و به‌شداری چالاکانه‌ی سه‌رجه‌م چین‌و توێژه‌کانی دیکه‌ تێده‌کۆشێت. به‌ تێڕوانینی ئێمه‌ ده‌سه‌ڵاته‌کان کاتین‌و ده‌گوزه‌رێن، به‌ڵام کۆمه‌ڵگا هه‌میشه‌ییو جێگیره‌، بۆیه‌ چاره‌سه‌رکردنی ریشه‌یی کێشه‌و قه‌یرانه‌کان له‌بنیادنانی سیسته‌می کۆمه‌ڵگایه‌کی ئازاد ‌و دیموکراتدا ده‌بینین که‌ به‌ توانست‌و وزه‌ شاراوه‌کانی خودی کۆمه‌ڵگا به‌ دیدێت نه‌ک ته‌وه‌ره‌ی ده‌سه‌ڵات ‌و ده‌سه‌ڵاتگه‌ری.
له‌و بڕوایه‌داین هه‌نگاوی یه‌که‌می چاره‌سه‌رکردنی کێشه‌و قه‌یرانه‌کانی باشوری کوردستان به‌ جێگیرکردنی سیسته‌مێکی دیموکراسی گه‌لدا تێپه‌ڕ ده‌بێت، ده‌ستورێکی دیموکراتیش ده‌توانێ بناخه‌ی ئه‌و سیسته‌مه‌ جێگیر بکات، ده‌ستورێک له‌ چوارچێوه‌ی به‌رژه‌وه‌ندیه‌کانی کۆمه‌ڵگا ‌و به‌رفراونکردنی ئازادیه‌کان بێت ناوه‌رۆکی په‌یماننامه‌یه‌کی کۆمه‌ڵایه‌تی له‌خۆوه‌ ده‌گرێت، بۆیه‌ پێش هه‌ر شتێک پێویسته‌ گۆڕانکاریه‌کی ریشه‌یی له‌خۆوه‌ بگرێت، په‌رله‌مان بکات به‌ مه‌رجه‌ع ‌و ده‌سه‌ڵاتی یاسادانان، بڕیاردان ‌و چاودێریکردن، له‌وچوارچێوه‌یه‌شدا ده‌سه‌ڵاته‌کانی دادوه‌ری ‌و جێبه‌جێکردن به‌ ناوه‌رۆک‌و رۆڵی راسته‌قینه‌ی خۆیان بگه‌یه‌نێت.
له‌و چوارچێوه‌یه‌شدا هه‌رێمی کوردستان ببێته‌ خاوه‌ن به‌رنامه‌یه‌کی سیاسی نیشتمانی ـ نه‌ته‌وه‌یی، کۆتایی به‌ ده‌ستێوه‌ردانی وڵاتانی دراوسێ بهێنێت، له‌جیاتی په‌یوه‌ندییه‌کی وابه‌سته‌یی ـ پاشکۆیی، په‌یوه‌ندی دراوسێیی له‌سه‌ر بنه‌مای هاوسه‌نگی ‌و به‌رژه‌وه‌ندی هاوبه‌شی هه‌ردوولایه‌ن بێت‌و دژی به‌شه‌کانی دیکه‌ی کوردستان‌و هێزه‌ سیاسیه‌کانی نه‌بێت. هه‌ر له‌م چوارچێوه‌یه‌شدا هێزی پێشمه‌رگه‌ وه‌ک هێزێکی پڕۆفشناڵی به‌رگری نیشتمانی پۆشته‌و په‌رداخ رێکبخرێت.
ئێمه‌ له‌و بڕوایه‌داین که‌ ئابوری راسته‌قینه‌‌و خودبژێوی په‌یوه‌ستی بوژانه‌وه‌ی لادێکان‌و په‌ره‌پێدانی کشتوکاڵ ‌و ئاژه‌ڵدارییه‌، بۆیه‌ هه‌ڵمه‌تێکی گه‌ڕانه‌وه‌ بۆ خاک‌و لادێ پێویستییه‌کی ژیانیو ده‌ست لێبه‌رنه‌دراوه‌. بێگومان که‌رتی وه‌به‌رهێنان‌و سامانی وزه‌ (نه‌وت‌و غاز) فاکته‌رێکی سه‌ره‌کی بوژانه‌وه‌ی ئابورین، به‌ڵام به‌ مه‌رجێک له‌ قۆرخکاریو پاوانخوازی دووربن، پرۆسه‌که‌یان بۆ رای گشتیو لایه‌نه‌ په‌یوه‌ندیداره‌کان، شه‌فاف‌و کراوه‌بێت، ره‌نگدانه‌وه‌ی راسته‌وخۆ و به‌رچاوی له‌سه‌ر بوژانه‌وه‌ی ئاستی گوزه‌ران‌و ره‌خساندنی هه‌لی کاری یه‌کسان بۆ سه‌رجه‌م چین‌و توێژه‌کانی کۆمه‌ڵگا هه‌بێت. شانبه‌شانی ئه‌مانه‌ش پێشخستنی سیسته‌مێکی پیشه‌سازی گرنگه‌ که‌ به‌رهه‌مهێنانی کاڵای به‌کارهێنان و پاراستنی ژینگه‌ به‌بنه‌ما بگرێت. 
له‌هه‌مان چوارچێوه‌دا سیسته‌مێکی نه‌خشه‌ بۆ کێشراو ‌و ستراتیژی بواری په‌روه‌رده‌‌و فێرکردن له‌ خزمه‌ت پێگه‌یاندنی کۆمه‌ڵگا‌و تاکێکی هۆشیار، ئازاد ‌و خاوه‌ن ئیراده‌ پێشبخرێت. که‌رتی ته‌ندر‌وستی له‌ که‌رتێکی بازرگانیو به‌ده‌ستهێنانی قازانجه‌وه‌ بکرێت به‌ بوارێکی خزمه‌تکردن به‌ ته‌واوی چین‌و توێژه‌کان به‌بێ جیاوازی. 
ئێمه‌ له‌و بڕوایه‌داین که‌ کێشه‌کانی نێوان هه‌رێم‌و به‌غداد له‌ رێی دیالۆگ‌و دانوستانه‌وه‌ چاره‌سه‌ر ده‌بێت، به‌مه‌رجێک جێگیرکردنی پایه‌کانی سیسته‌می فیدڕالیو جێبه‌جێکردنی ده‌ستور له‌ خۆوه‌ بگرێت ‌و به‌بێ هیچ سازشکارییه‌ک کێشه‌ی ناوچه‌ جێ ناکۆکه‌کان به‌ گوێره‌ی راستینه‌ی مێژووییو دیمۆگرافیی چاره‌سه‌ر بکرێت. کێشه‌ی نه‌وت‌و بودجه‌‌و پێشمه‌رگه‌ش هه‌مان چوارچێوه‌ له‌خۆوه‌ بگرێت. 
به‌کورتی سه‌باره‌ت به‌ سه‌رجه‌م ئه‌و کێشه‌و قه‌یرانانه‌ی له‌ باشوری کوردستان له‌ ئارادان پرۆژه‌ی تایبه‌ت‌و دیاریکراومان هه‌یه‌‌و له‌ کات‌و شوێنی خۆیدا رایده‌گه‌یه‌نین.
ده‌ستپێشخه‌ریه‌که‌مان خۆی به‌ جێگره‌وه‌ و ئه‌ڵته‌رناتیڤی هیچ هێزێکی دیکه‌ دانانێت؛ به‌ڵکو وه‌ک ته‌ڤگه‌رێکی سیاسی ـ کۆمه‌ڵایه‌تی بۆ کاری هاوبه‌ش له‌گه‌ڵ سه‌رجه‌م هێز‌و لایه‌نه‌ سیاسیه‌کان کراوه‌ین تا به‌یه‌که‌وه‌ بتوانین کێشه‌ نه‌ته‌وه‌یی، ئابووری، کۆمه‌ڵایه‌تی، سیاسیه‌کان‌و مه‌سه‌له‌کانی ئازادیو دیموکراسی چاره‌سه‌ر بکه‌ین.
ئێمه‌ وه‌ک ده‌ستپێشخه‌ری ئه‌مڕۆ له‌ حزووری ئێوه‌ی به‌ڕێزدا ده‌ستپێکردنی کار‌و خه‌باتی خۆمان راده‌گه‌یه‌نین ‌و له‌ماوه‌یه‌کی کورتیشدا کۆنگره‌ی دامه‌زراندنی ته‌ڤگه‌ره‌که‌مان ده‌به‌ستین. لێره‌دا رووی بانگه‌وازیمان ئاراسته‌ی سه‌رجه‌م هێز‌و لایه‌نه‌ سیاسیه‌کانی کوردستان، رێکخراوه‌کانی کۆمه‌ڵی مه‌ده‌نی و دام‌و ده‌زگاکانی راگه‌یاندن‌و ته‌واوی گه‌له‌که‌مان ده‌که‌ین که‌ هه‌موومان به‌یه‌که‌وه‌ ده‌توانین گه‌له‌که‌مان له‌و دۆخه‌ ئاڵۆزه‌ی ئێستا رزگار بکه‌ین‌و به‌و دۆخ و ئاسته‌ی بگه‌یه‌نین که‌ شایسته‌یه‌تی.
له‌کۆتاییدا سڵاو له‌ته‌واوی گه‌لی کوردستان ‌و بنه‌ماڵه‌ی سه‌ربه‌رزی شه‌هیدان، سڵاو له‌و پێشمه‌رگه‌ ‌و شه‌ڕڤان ‌و گه‌ریلایانه‌ ده‌که‌ین که‌ له‌جه‌له‌ولاوه‌ تا که‌رکوک، له‌مه‌خموره‌وه‌ تا شه‌نگال، له‌ ره‌بیعه‌وه‌ تا سه‌رێکانی ‌و کوبانێ له‌سه‌نگه‌ره‌کانی رووبه‌رووبوونه‌وه‌ به‌رگری له‌ گه‌ل ‌و نیشتمان‌و که‌رامه‌تی نه‌ته‌وایه‌تیمان ده‌که‌ن.





11 ـ 10 ـ 2014
ده‌ستپێشخه‌ری ته‌ڤگه‌ری ئازادی
 
 




به‌ڕێزان ... ئه‌ندامانی کۆنگره‌ی دامه‌زراندنی"ده‌ستپێشخه‌ری ته‌ڤگه‌ری ئازادی"

ئاماده‌بووانی به‌رێز...
له‌سه‌ره‌تادا به‌ناوی کۆمیته‌ی ئاماده‌کاری ده‌ستپێشخه‌ری ته‌ڤگه‌ری ئازادییه‌وه‌ گه‌رمترین و جوانترین پیرۆزبایی له‌خۆمان و له‌سه‌رجه‌م ئه‌ندامانی کۆنگره‌ و هه‌موو ئه‌و که‌س و گروپانه‌ ده‌که‌ین که‌ به‌شداربوون یان هاوکار بوون له‌سه‌رخستنی ئه‌و هه‌وڵه‌و گه‌یشتن به‌م ئاسته‌ که‌ساته‌وه‌ختی ئه‌نجامدانی کۆنگره‌یه‌. ده‌ستی هه‌موو ئه‌و که‌سانه‌ ده‌گوشین که‌ به‌هه‌ر شێوه‌یه‌ک هاوکار بوون و ئامانجیان سه‌رخستنی ئه‌م کاره‌بووه‌. هاوکاتی ئه‌مه‌ هیوادارین کۆنگره‌ به‌سه‌رکه‌وتویی کاره‌کانی خۆی ئه‌نجام بدات و هیوای چاره‌سه‌ری قه‌یران و کێشه‌کان و ده‌سته‌به‌رکردنی ژیانێکی ئازاد و دیموکرات گه‌شاوه‌ بکات و گوڕ به‌تێکۆشانی دیموکراتی بدات له‌وڵاته‌ خۆشه‌ویسته‌که‌ماندا.

به‌رێزان...
ئێمه‌ وه‌کو ژماره‌یه‌ک که‌سایه‌تی و گروپ وکۆمه‌ڵه‌و پارتی دیموکراتخواز ماوه‌یه‌که‌ هه‌ستمان به‌وه‌ ده‌کرد که‌ گۆڕه‌پانی باشوری کوردستان و ئێراق پێویستی به‌ هه‌وڵ و تێکۆشانی زیاتر هه‌یه‌، پێویستی به‌کۆکردنه‌وه‌ی هه‌وڵه‌کانه‌، پێویستی به‌وه‌یه‌ که‌سه‌رجه‌م تاک، گروپ و پێکهاته‌کان ده‌رفه‌تی زیاتریان بۆ بڕه‌خسێت بۆ خزمه‌تکردن. پێویستی به‌سوود وه‌رگرتنه‌ له‌سه‌رجه‌م رێبازه‌ فکری و سیاسیه‌کان، هه‌تا له‌رێگه‌یانه‌وه‌ بتوانین ئه‌و دۆخه‌ چه‌قبه‌ستووه‌ تێپه‌ڕ بکه‌ین که‌ ئه‌مڕۆ کۆمه‌ڵگاکه‌مان و کێشه‌کان رووبه‌رووی بوونه‌ته‌وه‌. له‌و قه‌ناعه‌ته‌شدا بووین که‌ ده‌بێت هه‌وڵ و تواناکانمان کۆبکه‌ینه‌وه‌ و بیخه‌ینه‌ سه‌ر یه‌ک هه‌تا بتوانین جۆگه‌له‌ ئاسا، له‌یه‌کگرتنمان رووبارێکی مه‌زن دروست بکه‌ین و گوڕوتینێکی مه‌زن بده‌ینه‌ تێکۆشانی دیموکراتی. له‌سه‌ر ئه‌و بنه‌مایه‌ نزیکه‌ی ساڵێکه‌ له‌هه‌وڵی چڕوپڕداین و له‌ده‌رگای زۆر که‌س و گروپ و لایه‌نماندا، سه‌باره‌ت به‌قه‌یران و کێشه‌کان گفتوگۆی به‌رفراوانمان ئه‌نجامدا و له‌ئه‌نجامدا رۆژی"11/10/2014""ده‌ستێشخه‌ری ته‌ڤگه‌ری ئازادی"مان راگه‌یاند. پێش راگه‌یاندنی ده‌ستپێشخه‌ریه‌که‌ و دوای راگه‌یاندنیشی ژماره‌یه‌کی به‌رچاو له‌که‌سانی دڵسۆز و نیشتمانپه‌وه‌ر و په‌یوه‌ندییان پێوه‌ کردین و به‌هه‌وڵی هه‌موو لایه‌ک گه‌یشتینه‌ ئه‌مڕۆ که‌ کۆنگره‌ی دامه‌زراندن ئه‌نجام ده‌ده‌ین.

ئاماده‌بووانی به‌رێز، ئه‌ندامانی کۆنگره‌...
"ده‌ستپێشخه‌ری ته‌ڤگه‌ری ئازادی"، له‌پێناوی چه‌سپاندنی ده‌سکه‌وته‌کانی گه‌له‌که‌مان له‌باشوری کوردستان و ئێراقدا کار ده‌کات و خاوه‌نداری له‌ره‌نج و خه‌باتی ده‌یان ساڵه‌ی گه‌له‌ قاره‌مانه‌که‌مان له‌قۆناخه‌ جیاجیاکاندا ده‌کات و لایه‌نه‌ باشه‌کانی په‌ره‌پێده‌دات و ده‌یکاته‌ به‌های هه‌میشه‌یی، لایه‌نه‌ نه‌رێنی و که‌م وکوڕتیه‌کانیشی بۆ خۆی ده‌کاته‌ په‌ند و ئه‌زموون و خۆی لێ به‌دوور ده‌گرێت و هه‌وڵده‌دات ئه‌ڵته‌رناتیڤی سه‌رکه‌وتویان بۆ بدۆزێته‌وه‌.
ده‌ستپێشخه‌ری ته‌ڤگه‌ری ئازادی په‌رله‌مان، حکومه‌ت، پێشمه‌رگه‌، پۆلیس، ئاسایش، دادگاگان و سه‌رجه‌م دامه‌زراوه‌کانی هه‌رێمی کوردستان و ئێراق به‌به‌رهه‌می ره‌نج و تێکۆشانی گه‌ل و خوێنی شه‌هیدان ده‌بینێ و هه‌وڵده‌دات بیانکات به‌ده‌زگای گه‌ل و نیشتمان و باشتر رۆڵی خۆیان ببینن له‌خزمه‌تکردنی گه‌ل و نیشتماندا. هاوکات تێده‌کۆشین بۆ ئه‌وه‌ی سیاسه‌ت و پرۆسه‌ی سیاسی له‌کاری نوخبه‌ و ده‌سته‌بژێرێک رزگار بکات و کۆمه‌ڵگا بگه‌یه‌نێته‌ ئاستێک که‌سه‌رجه‌م تاکه‌کانی به‌شدارییه‌کی چالاکیان هه‌بێت له‌پرۆسه‌ی سیاسیدا و کۆمه‌ڵگایه‌کی سیاسی و چالاک به‌رهه‌م بهێنێ. له‌م پێناوه‌شدا هه‌وڵده‌دات ئه‌و چه‌مکانه‌ تێپه‌ڕ بکات که‌ پرۆسه‌ی سیاسی وه‌کو پرۆسه‌یه‌کی تایبه‌ت به‌نوخبه‌یه‌ک و پارته‌ سیاسیه‌کان ده‌بینن. یان باوه‌ڕیان به‌هێز و توانای گه‌ل نییه‌ و هه‌میشه‌ چاویان له‌چینی سه‌رده‌ست و نوخبه‌ له‌کوردستاندا سیاسه‌ت مه‌حاڵه‌.
ده‌ستپێشخه‌ری ته‌ڤگه‌ری ئازادی، باوه‌ڕی به‌پێکه‌وه‌ ژیانی ئازادانه‌ی گه‌لان هه‌یه‌ و رێز له‌فره‌ره‌نگی و جیاوازییه‌کان ده‌گرێت، به‌چه‌مکی یه‌کێتی جیاوازییه‌کان کارده‌کات، نه‌ک سڕینه‌وه‌ی جیاوازییه‌کان، یان جیاوازی وه‌کو ناکۆکی و دژایه‌تی بینین. دۆزی گه‌لی کورد وه‌کو یه‌ک دۆز ده‌بینێ و گه‌لی کوردیش وه‌کو یه‌ک گه‌ل ده‌بینێ، هه‌ر بۆیه‌ دۆزی کورد له‌ئێراق دابڕاو نابینێ له‌دۆزی کورد له‌ئێران، تورکیا و سوریا و پێی وایه‌ ده‌بێت هاوته‌ریبی یه‌کتر خه‌بات بۆ چاره‌سه‌ری ئه‌م دۆزه‌ بکرێت. له‌م روانگه‌یه‌وه‌ بۆ سه‌رجه‌م ماف و ئازادییه‌کانی گه‌لی عه‌ره‌ب، تورکمان، ئاشورین کلدانی، سوریانی و ئه‌رمه‌نی، شیعه‌ و سووننه‌ و ئێزیدی، کاکه‌یی و سابئه‌ و شه‌به‌ک و پێکهاته‌ ئاینی و ئاینزاییه‌کانیش تێده‌کۆشێت.
ده‌ستپێشخه‌ری ته‌ڤگه‌ری ئازادی به‌پێشه‌نگایه‌تی ژنان و گه‌نجان و به‌شداری چالاکانه‌ی سه‌رجه‌م چین و توێژه‌ زه‌حمه‌تکێش و ره‌نجده‌ره‌کان تێده‌کۆشێت و کێشه‌ سیاسی، کۆمه‌ڵایه‌تی، ئابووری و جۆراوجۆره‌کان تێکهه‌ڵکێشی یه‌کتر ده‌بینێ و پێی وایه‌ به‌دابڕان له‌یه‌کتر و پینه‌کردن ئه‌وکێشانه‌ چاره‌سه‌ر نابن؛ به‌ڵکو به‌پرۆژه‌ی هه‌مه‌لایه‌ن و به‌رفراوان ئه‌و کێشانه‌ چاره‌سه‌ر ده‌بن.
ده‌ستێشخه‌ری ته‌ڤگه‌ری ئازادی مۆدیلی هاوسه‌رۆکی و هاونوێنه‌رایه‌تی ژن و پیاو له‌به‌رێوه‌به‌رایه‌تی خۆیدا به‌باشترین و گونجاوترین مۆدیل ده‌زانێ، بۆ به‌رێوه‌بردنی کاروخه‌بات؛ چونکه‌ پێ وایه‌ له‌رێگه‌ی ئه‌م مۆدیڵه‌وه‌ چه‌مکی تاکڕه‌وی و ناوه‌ندگه‌رایی که‌م ده‌کرێته‌وه‌ و ده‌توانرێت تێپه‌ڕ بکرێت، هاوکات هاوسه‌نگی نێوان هه‌ردوو ره‌گه‌زی ژن و پیاو له‌به‌رێوه‌بردن وبه‌شداریکردندا دروست ده‌کرێت و ژنان له‌ده‌ره‌وه‌ی سیاسه‌ت و به‌رێوه‌به‌ری نامێننه‌وه‌ و دامه‌زراوه‌کانیش مۆرکی"پیاو"یان لێ ده‌بێته‌وه‌. به‌مشێوه‌یه‌ نمونه‌یه‌کی نوێ له‌سیاسه‌ت و به‌رێوه‌بردندا نیشان ده‌دات.

ئه‌ندامانی به‌رێزی کۆنگره‌...
"ته‌ڤگه‌ری ئازادی"وا بیرناکاته‌وه‌ که‌ مێژوو له‌ئێمه‌وه‌ ده‌ست پێده‌کات، به‌ڵام پێ وایه‌ که‌ ده‌توانێت مۆرکی خۆی له‌مێژووی کۆمه‌ڵگا بدات. ئه‌م ته‌ڤگه‌ره‌ له‌هه‌موو پێکهاته‌ و گروپ و لایه‌نێکی ئازادیخواز و دیموکراتخوازه‌کانه‌وه‌ که‌سانی تێکۆشه‌ر به‌شدارییان تێیدا کردووه‌. هه‌ر بۆیه‌ به‌رێزه‌وه‌ سه‌یری خه‌بات و تێکۆشانی سه‌رجه‌م ئه‌و که‌س و گروپانه‌ ده‌کات، میراسی ئه‌وان به‌به‌شێک له‌میراسی خۆی ده‌زانێت، به‌ڵام ئه‌م ده‌ستپێشخه‌رییه‌ نابێته‌ به‌رده‌وام و درێژه‌ پێده‌ری هیچ گروپ و لایه‌نێک به‌ته‌نیا. له‌خه‌بات و تێکۆشانیشیدا خاوه‌نی شێواز و رێبازی خۆی ده‌بێت. هه‌ربۆیه‌ پێویسته‌ سه‌رجه‌م ئه‌ندامانی ئه‌م ته‌ڤگه‌ره‌ به‌م هه‌ست و به‌رپرسیارییه‌وه‌ هه‌ڵسوکه‌وت بکه‌ن. ئێمه‌ش وه‌کو ئه‌و که‌سانه‌ی که‌ له‌کۆمیته‌ی ئاماده‌کاری و ده‌ستپێشخه‌رییه‌که‌دا خه‌باتمان کردووه‌، هه‌وڵمانداوه‌ به‌م به‌رپرسیارییه‌وه‌ هه‌ڵسوکه‌وت بکه‌ین. له‌ناو ئه‌و که‌سانه‌ی که‌ په‌یوه‌ندییان پێوه‌ کردووین بۆ به‌شداریکردن له‌م ده‌ستپێشخه‌رییه‌دا"150"که‌سایه‌تیمان دیاری کرد بۆ بوونه‌ ئه‌ندام له‌کۆنگره‌ی دامه‌زراندندا و هه‌وڵمانداوه‌ پێوانه‌کانی ته‌ڤگه‌ره‌که‌ ره‌چاو بکه‌ین له‌دیاری کردنی ئه‌ندامه‌کاندا و بێگومان که‌سان و تێکۆشه‌رانی زیاتر هه‌بوون که‌ شایسته‌ی ئه‌وه‌ن به‌شداری ئه‌م کۆنگره‌یه‌ ببن، به‌ڵام به‌هۆکاری جیاجیا هه‌رئه‌وه‌نده‌ گونجاو بینرا و بێگومان خه‌باتی ئاینده‌ی ئه‌م ته‌ڤگه‌ره‌ ده‌رفه‌ت بۆ هه‌موو ئه‌و تێکۆشه‌رانه‌ دروست ده‌کات که‌ رۆڵی خۆیان ببینن.
ئێمه‌ وه‌کو کۆمیته‌ی ئاماده‌کاری ده‌ستپێشخه‌رییه‌که‌ له‌چوارچێوه‌ی ئه‌و گفتوگۆیانه‌ی به‌رێوه‌مان بردووه‌، په‌یماننامه‌یه‌کی ئاماده‌کردووه‌ بۆ ئه‌وه‌ی ئه‌م کۆنگره‌یه‌ تاوتۆی بکات و بڕیاری لێ بدات و ببێته‌ په‌یماننامه‌ی کاری ئه‌م ته‌ڤگه‌ره‌ و پرۆژه‌ بڕیارێکیشمان ئاماده‌کردووه‌، بۆ ئه‌وه‌ی ببێته‌ پرۆژه‌ی کاروخه‌باتی ئه‌م ته‌ڤگه‌ره‌ له‌دوو ساڵی ئاینده‌دا. هاوکاتی ئه‌مانه‌ سه‌رجه‌م پێداویستیه‌ ماددی و کردارییه‌کانی کۆنگره‌که‌مان ئاماده‌کردووه‌ و لێره‌دا ئێمه‌ ئه‌رکی خۆمان ته‌واو ده‌که‌ین و داواتان لێ ده‌که‌ین که‌ دیوانی سه‌رۆکایه‌تی کۆنگره‌ هه‌ڵبژێرن بۆ به‌رێوه‌بردنی کاری کۆنگره‌.
دووباره‌ هیوای سه‌رکه‌وتن بۆ کۆنگره‌ ده‌خوازین و ده‌ڵێین سڵاوی له‌گیانی پاکی سه‌رجه‌م شه‌هیدانی کوردستان، ئه‌وانه‌ی به‌گیانی خۆیان ئه‌مڕۆیان خولقاند، به‌تایبه‌تیش سڵاو له‌به‌رخۆدانی کۆبانێ.

کۆمیته‌ی ئاماده‌کاری
کۆنگره‌ی ده‌ستپێشخه‌ری ته‌ڤگه‌ری ئازادی
17/10/2014



بڕیاره‌کانی
یه‌که‌مین کۆنگره‌ی دامه‌زراندنی
ته‌ڤگه‌ری ئازادی کۆمه‌ڵگای کوردستان
(ته‌ڤگه‌ری ئازادی)

ته‌ڤگه‌ره‌که‌مان هه‌ر له‌گه‌ڵ یه‌که‌م هه‌نگاوی دامه‌زراندنیدا؛ له‌پێناو جێبه‌جێکردنی ئه‌رکه‌کان و گه‌یشتن به‌ ئامانجه‌کانیدا له‌یه‌که‌م کۆنگره‌یدا به‌بڕیاره‌وه‌ خۆی ده‌گه‌یه‌نێته‌ کارنامه‌یه‌کی هه‌مه‌لایه‌ن و پرۆژه‌ی جیاواز. له‌م چوارچێوه‌یه‌دا هه‌م له‌بواری رێکخستنیدا، هه‌میش له‌بواره‌ نه‌ته‌وه‌یی و نیشتمانییه‌کاندا، هه‌روه‌ها له‌بواری سیاسی، به‌رگری، ئابووری، کۆمه‌ڵایه‌تی، رۆشنبیریی، ژینگه‌پارێزی و به‌ڕێوه‌به‌رێتییه‌ خۆجێییه‌کان و خه‌بات و تێکۆشانی پێشه‌نگانه‌ی ژنان و گه‌نجاندا؛ بڕیاری کرداری وه‌رده‌گرێت. له‌سه‌ر ئه‌م بنه‌مایه‌ به‌م بڕیارانه‌ی خواره‌وه‌ یه‌که‌م قۆناخی تێکۆشانی خۆمان ده‌ستپیده‌که‌ین:

یه‌که‌م: له‌بواری رێکخستنیدا
1ـ رێکخستنی (هه‌رێمه‌کان، شاره‌کان، شارۆچکه‌کان) کۆنفرانسی ساڵانه‌ی خۆیان به‌ڕێوه‌ ببه‌ن و ئه‌نجوومه‌نی خۆیان ئاوابکه‌ن.
2ـ ته‌ڤگه‌ری ژنان و ته‌ڤگه‌ری گه‌نجان له‌پێناو خۆبه‌رێکخستنی خۆیاندا کۆنگره‌ی خۆیان به‌ڕێوه‌ ده‌به‌ن.
3ـ ئاواکردنی کۆمینی جڤاکی له‌هه‌موو ئه‌و شوێنانه‌ی توانستی ئاواکردنی هه‌یه‌.
4ـ هه‌موو ئه‌ندام و لایه‌نگرانی ته‌ڤگه‌ره‌که‌مان له‌هه‌ر چین و توێژێک و له‌هه‌ر کار و پیشه‌یه‌کدا بن، خۆیان بگه‌یه‌ننه‌ ئاستی رێکخستنی تایبه‌ت به‌خۆیان.
5ـ هه‌موو ئه‌ندام و لایه‌نگرانی ته‌ڤگه‌ره‌که‌مان که‌ خاوه‌ن پێکهاته‌ی جیاوازن، له‌چوارچێوه‌ی کۆنگره‌ و کۆنفرانسی خۆیاندا رێکخستنی تایبه‌ت به‌خۆیان ئاوا بکه‌ن. 
6ـ کردنه‌وه‌ی ئه‌کادیمیایه‌کی په‌روه‌رده‌یی له‌ئاستی ناوه‌ندیدا.
7ـ کار و خه‌باتی راگه‌یاندنی بیستراو، بینراو و نووسراوی ته‌ڤگه‌ره‌که‌مان بگه‌یه‌نرێته‌ ئاستی ده‌زگاییبوون.
8ـ بۆ رێزگرتن له‌ شه‌هیدانی رێگای ئازادی کوردستان په‌رتووکێک له‌سه‌ر ژیان و تێکۆشانی ته‌واوی شه‌هیدان ئاماده‌ و چاپ بکرێت.

دووه‌م: له‌بواری نه‌ته‌وه‌یی و نیشتمانیدا
بۆ ئه‌وه‌ی گه‌له‌که‌مان له‌ئاستی نه‌ته‌وه‌یی و نیشتمانیدا ببێته‌ خاوه‌ن ده‌زگا مه‌رجه‌عییه‌کانی خۆی و ستراتیژییه‌کی نه‌ته‌وه‌یی و نیشتمانی هاوبه‌ش له‌نێوان لایه‌نه‌ سیاسییه‌کان هه‌بێت؛ پێویسته‌ لایه‌نه‌ سیاسییه‌کان به‌رژه‌وه‌ندی باڵای نه‌ته‌وه‌یی و نشتمانی به‌ بنه‌مای کار و خه‌باتیان وه‌ربگرن و له‌چوارچێوه‌ی په‌یماننامه‌یه‌کی نه‌ته‌وه‌یی ـ نیشتمانی ـ دیموکراتی بێنه‌ لای یه‌ک و به‌ ستراتیژی سیاسی هاوبه‌ش تێکۆشان بکه‌ن. هه‌روه‌ها بۆ ئه‌وه‌ی کێشه‌کانی باشووری کوردستان له‌گه‌ڵ ده‌سه‌ڵاتی ناوه‌ندی ئێراقدا چاره‌سه‌ر بکرێت ده‌ستوورێکی دیموکراتی به‌مه‌رجێکی بنچینه‌یی ده‌بینین. بۆ چاره‌سه‌رکردنی پرسی هه‌موو ئه‌و ناوچه‌ کوردستانییانه‌ی نه‌گه‌ڕاونه‌ته‌وه‌ بۆ سه‌ر هه‌رێمی کوردستان پرۆژه‌یه‌کی دیموکراتی پێویسته‌، که‌ راستینه‌ی مێژوویی و جوگرافی و چاندی و دیموگرافی و به‌یه‌که‌وه‌ ژیانی ئازادانه‌ی گه‌لان به‌بنچینه‌ وه‌ربگرێت. له‌م پێناوه‌دا:
1ـ هه‌موو هه‌وڵێکمان بۆ به‌ستنی کۆنفرانسێکی نه‌ته‌وه‌یی ته‌رخان ده‌که‌ین. له‌م چوارچێوه‌یه‌دا پرۆژه‌یه‌کی نه‌ته‌وه‌یی دیموکراتی ئاماده‌ ده‌که‌ین. 
2ـ پشتیوانی ته‌واو له‌ تێکۆشان و به‌رخۆدانی گه‌له‌که‌مان و هه‌وڵه‌ ئاشتیخوازییه‌کان بۆ چاره‌سه‌ری دیموکراتیانه‌ی پرسی کورد له‌پارچه‌کانی دیکه‌ی کوردستان ده‌که‌ین. 
3ـ به‌هه‌موو شێوه‌یه‌ک پشتیوانی له‌ به‌رگری و به‌رخۆدانی شکۆمه‌ندانه‌ی پێشمه‌رگه‌ و شه‌ڕڤان و گه‌ریلا گیانبازه‌کانی کوردستان ده‌که‌ین که‌ دژ به‌ هێرشه‌ دڕنده‌ییه‌کانی چه‌ته‌کانی داعش و ئه‌وانه‌ش که‌ پشتیوانی و هاوکاری ئه‌و گروپه‌ سه‌رلێشێواوانه‌ ده‌که‌ن له‌سه‌نگه‌ری که‌رامه‌ت و به‌رگریکردن دان. به‌تایبه‌تی به‌رخۆدانی گه‌له‌که‌مان و شه‌ڕڤانه‌ بوێره‌کانی یه‌په‌گه‌ و یه‌په‌ژه‌ له‌ کۆبانێ و ته‌واوی رۆژئاوای کوردستا،ن که‌ ئیدی بۆته‌ ناسنامه‌ی به‌رخۆدانڤانێتی گه‌لی کوردستان له‌جیهاندا.
4ـ پرۆژه‌یه‌کی ده‌ستووری بۆ ئێراقێکی کۆنفیدراڵی دیموکراتی ئاماده‌ ده‌که‌ین که‌ ماف و ئازادی گه‌لی کوردستان و گه‌لانی دیکه‌ی ئێراق مسۆگه‌ر بکات.
5ـ پرۆژه‌یه‌کی دیموکراتی بۆ چاره‌سه‌ری پرسی ناوچه‌ کوردستانییه‌کانی ده‌ره‌وه‌ی هه‌رێمی کوردستان (زوممار، شه‌نگال، که‌رکوک، دووزخورماتوو، خانه‌قین، به‌دره‌، جه‌سسان، زرباتیه‌...هتد) ئاماده‌ ده‌که‌ین.
6ـ کار بۆ ئازادی هه‌موو زیندانیانی سیاسی کوردستان له‌ زیندانه‌کان و ئاشکراکردنی چاره‌نووسی هه‌موو ئه‌وانه‌ی به‌هۆکاری سیاسی و له‌شه‌ڕه‌ ناوخۆییه‌کاندا بێسه‌روشوێن کراون ده‌که‌ین.
سێیه‌م: له‌بواری سیاسه‌تی دیموکراتیدا
له‌پێناو بونیادنانی سیسته‌مێکی سیاسی جڤاکی دیموکراتیدا په‌ره‌دان به‌ سیاسه‌تی دیموکراتی و تێکۆشانی جه‌ماوه‌رییانه‌ و به‌ده‌زگاییبوونی دیموکراتی پێداویستی سه‌ره‌کیین. له‌م پێناوه‌دا: 
1ـ خه‌باتی ئۆپۆزسیۆنبوونی رادیکاڵانه‌ی دیموکراتی ته‌ڤگه‌ره‌که‌مان له‌سه‌ر بنه‌مای ئۆپۆزسیۆنێتی پۆزه‌تیڤ ده‌ستپێده‌که‌ین و له‌ به‌ره‌ی گه‌ل و ئازادیخوازان و دیموکراتیخوازاندا تێکۆشانمان به‌ره‌وپێشه‌وه‌ ده‌به‌ین.
2ـ کار بۆ پێشخستنی به‌ره‌یه‌کی نه‌ته‌وه‌یی دیموکراتی له‌ که‌سێتی ئازادیخواز، لایه‌نه‌ سیاسییه‌ دیموکراتیخوازه‌کان و رێکخراوه‌ جڤاکییه‌کان ده‌که‌ین.
3ـ به‌شداری له‌هه‌ر کۆڕبه‌ندێکی سیاسی ده‌که‌ین که‌ به‌رژه‌وه‌ندییه‌ نه‌ته‌وه‌یی و نیشتمانییه‌کانی گه‌لی کوردستان به‌ بنه‌ما وه‌ربگرێت. 
4ـ بۆئه‌وه‌ی تێگه‌یشتنێکی راست و دیموکراتیانه‌ بۆ رۆڵی ئایین و ئایینزا و ته‌ریقه‌ته‌کان له‌سه‌ر تاک و کۆمه‌ڵگادا بێته‌دی و مه‌ترسییه‌کانی هه‌موو جۆره‌ توندڕه‌وی و ده‌مارگیرییه‌کی ئایینی و ئایینزایی رێگیریی لێبکرێت پرۆژه‌ و هه‌وڵ و تێکۆشانی دیموکراتیانه‌مان په‌ره‌پێده‌ده‌ین.

چواره‌م: له‌بواری مافپه‌روه‌ری و ده‌ستووریدا
تا ده‌ستوور و یاساکان له‌ زیهنییه‌تی ده‌سه‌ڵاتخوازێتی و پاوانخوازی پاک نه‌کرێنه‌وه‌ و به‌ زهنییه‌تی دیموکراتی و به‌ها ئه‌خلاقییه‌کان دانه‌ڕێژرێن ناتوانرێت رۆڵیان له‌ پاراستنی ماف و ئازادییه‌کان و دادپه‌روه‌ری و یه‌کسانی هه‌بێت. له‌م پێناوه‌دا:
1ـ له‌پێناو داڕشتنی ده‌ستوورێکی دیموکراتی پرۆژه‌یه‌کی ده‌ستووری پێشکه‌ش به‌ رای گشتی کوردستان و په‌رله‌مانی هه‌رێم ده‌که‌ین. 
2ـ له‌پێناو پێشخستنی هوشیاری مافپه‌روه‌ری دیموکراتی و چاره‌سه‌ری پرسه‌ یاسایی و ده‌ستوورییه‌کاندا کۆنفڕانسێکی مافپه‌روه‌ری سازده‌که‌ین.

پێنجه‌م: له‌بواری به‌رگری خۆییدا
به‌رگری خۆیی له‌هه‌بوون و ماف و ئازادییه‌کانی گه‌لی کوردستان و هه‌بوونی ئیراده‌ و هێزی خۆیی به‌رگریخوازی مافێکی بنچینه‌یی هه‌ر که‌س و ده‌سته‌ و جڤاکێکه‌ و ده‌ستبه‌ردان له‌م مافه‌ گه‌وره‌ترین پێشێلکارییه‌. به‌رگری ره‌واش به‌شێکی به‌رگری خۆییه‌. پێشخستنی هوشیاری به‌رگری خۆیی و ره‌وا و رێکخسته‌کردنی جڤاک له‌سه‌ر ئاستی هه‌موو گوند، کۆڵان و گه‌ڕه‌ک و شار و شارۆچکه‌ و هه‌رێمه‌کان و ته‌واوی باشووری کوردستان و دابینکردنی پێداویستییه‌کانی به‌رگریکردن ئه‌رکێکی بنچینه‌ییمانه‌. له‌م پێناوه‌دا:
1ـ له‌چوارچێوه‌ی پرۆژه‌یه‌کی نه‌ته‌وه‌یی و نیشتمانیدا هه‌وڵده‌ده‌ین گه‌ل له‌هه‌موو هه‌رێم و شار و لادێکانیدا خاوه‌ن هێزی خۆیی به‌رگریکردن بێت.
2ـ بۆئه‌وه‌ی هێزی پێشمه‌رگه‌، ئاسایش، ده‌زگای هه‌واڵگری، پۆلیس و سه‌رجه‌م ده‌زگاکانی تر ببنه‌ ده‌زگای هه‌موو وڵات خه‌بات ده‌که‌ین تاکو ئه‌و ده‌زگایانه‌ له‌سه‌ر بنه‌مای وڵاتپارێزی سه‌رله‌نوێ دروستبکرێنه‌وه‌. 
3ـ کارده‌که‌ین بۆ وه‌ده‌رنانی هه‌موو هێزه‌ سه‌ربازی و ده‌زگا هه‌واڵگرییه‌کانی ده‌وڵه‌تان و ئه‌و ده‌زگایانه‌ی به‌ناوی دیکه‌وه‌ دامه‌زراون و زیان به‌ ئاسایشی نه‌ته‌وه‌یی و نیشتمانیمان ده‌گه‌یه‌نن.

شه‌شه‌م: له‌بواری ئابووری و کارگێڕییدا
بۆئه‌وه‌ی تاک و کۆمه‌ڵگای کوردستان به‌رهه‌مهێن و خۆبژێو بن، پێشخستنی هوشیاری ئابووری هه‌ره‌وه‌زکاری ژینگه‌پارێزی و په‌ره‌دان به‌ ئابووری هه‌ره‌وه‌زکاری بنه‌مای سه‌ره‌کییه‌. هه‌روه‌ها پێشخستنی سیسته‌می کۆنفیدراڵی دیموکراتی و خۆبه‌ڕێوه‌به‌رێتی دیموکراتی کۆتایی به‌ ناوه‌ندگه‌رایی و پاوانخوازی دێنێت. له‌م پێناوه‌دا:
1ـ له‌چوارچێوه‌ی کۆنفرانسێکی گشتیدا پرۆژه‌یه‌ک بۆ بنبڕکردنی گه‌نده‌ڵی ئاماده‌ ده‌که‌ین. له‌هه‌ر هه‌رێم و شارێکیشدا کۆنفرانسی تایبه‌ت به‌ پرسی گه‌نده‌ڵی به‌ڕێوه‌ ده‌به‌ین.
2ـ کار بۆ سه‌رله‌نوێ رێکخستنه‌وه‌ی سیسته‌می کارگێڕی له‌ باشووری کوردستان و ئێراق ده‌که‌ین که‌ کۆنفیدراڵی دیموکراتی و خۆبه‌ڕێوه‌به‌رێتی دیموکراتی به‌بنه‌ما وه‌ربگیرێت و ناوه‌ندێتی که‌م بکاته‌وه‌، سنووره‌ کارگێڕییه‌کان به‌گوێره‌ی هاوسه‌نگی و راستینه‌ی دیموگرافی دانیشتوان رێکبخرێنه‌وه‌.
3ـ کۆمه‌ڵه‌ی هه‌ره‌وه‌زکاری له‌ئاستی هه‌رێم و شار و شارۆچکه‌ و لادێکاندا ئاوا ده‌که‌ین و له‌به‌رامبه‌ر به‌ هه‌موو پرۆژه‌ ئابوورییه‌ پاوانخوازییه‌کان تێکۆشان ده‌که‌ین. 
4ـ کار بۆ خۆماڵیکردن و به‌ نیشتمانیکردنی سامانی نه‌وت و گاز و سه‌رجه‌م وزه‌ و کانه‌ سروشتییه‌کان و هه‌موو بواره‌کانی به‌رهه‌مهێنان و وه‌به‌رهێنان، ته‌ندروستی، خوێندن و گه‌یاندن ده‌که‌ین. 
5ـ بۆ چاره‌سه‌رکردنی کێشه‌ی زه‌ویه‌ کشتوکاڵی و موڵکدارییه‌کان و گه‌ڕاندنه‌وه‌ی مافی موڵکێتی بۆ جوتیاران پرۆژه‌یه‌کی چاکسازی کشتوکاڵی ئاماده‌ ده‌که‌ین.
6ـ کاری جددی بۆ ئاوه‌دانکردنه‌وه‌ی گونده‌کان و گه‌ڕانه‌وه‌ بۆ گونده‌کان ده‌که‌ین و له‌بواری کشتوکاڵی و ئاژه‌ڵداریدا ده‌بینه‌ خاوه‌ن پرۆژه‌ی هه‌ره‌وه‌زکاری.
7ـ کار بۆ گه‌ڕاندنه‌وه‌ی سه‌رجه‌م موڵک و سامانه‌ گشتییه‌کانی گه‌ل و وڵات ده‌که‌ین که‌ ده‌ستیان به‌سه‌ردا گیراوه‌ و کراون به‌ موڵکی شه‌خسی یان حزبی.

حه‌وته‌م: له‌بواری کۆمه‌ڵایه‌تیدا
بونیادنان و پێشخستنی هه‌ر کۆمه‌ڵگایه‌کی دیموکرات، ئازاد، دادپه‌وه‌ر و یه‌کسان هوشیاری و له‌سه‌ر بناخه‌ی رێکخسته‌بوون و تێکۆشانی سه‌رجه‌م چین و توێژه‌کانی کۆمه‌ڵگا دێته‌دی. له‌م پێناوه‌دا:
1ـ بۆئه‌وه‌ی بێکاری نه‌مێنێت و ژیان و مافه‌کانی کرێکار و ره‌نجده‌ران بپارێزرێن تێکۆشان ده‌که‌ین و به‌ پێویستییه‌کی گرنگی ده‌بینین که‌ یاسای مسۆگه‌ری کۆمه‌ڵایه‌تی و ته‌ندروستی (الچمان الاجتماعی و الصحی) بۆ هه‌موو که‌سێک له‌هه‌ر ته‌مه‌نێکدا بێت دابڕێژرێت و جێبه‌جێ ببێت. 
2ـ کار بۆ به‌دیهێنانی پرۆژه‌ی "په‌روه‌رده‌ی جڤاکی دیموکراتی" له‌ئاستی هه‌رێم و شار و گه‌ڕه‌ک و لادێکاندا ده‌که‌ین.
3ـ کار بۆ پاراستنی ژیان و ته‌ندروستی منداڵان و جێگیرکردنی سیسته‌مێکی په‌روه‌رده‌یی پێشکه‌وتوو له‌ دایه‌نگه‌ و باخچه‌ی منداڵان و خوێندگای سه‌ره‌تایی و نه‌شونمای سروستیانه‌ی منداڵان ده‌که‌ین و رێگیری له‌هه‌موو جۆره‌ کارپێکردنێکی منداڵان ده‌که‌ین.
٤. کار بۆ مسۆگه‌رکردنی ژیان و ته‌ندروستی پیر و په‌ککه‌وته‌ و خاوه‌ن پێداویستییه‌ تایبه‌ته‌کان ده‌که‌ین و ئه‌زموون و توانسته‌کانیان به‌هه‌ند وه‌رده‌گرین. 
5ـ کار بۆ گۆڕینی سیسته‌می ته‌ندروستی و دابینکردنی بیمه‌ی ته‌ندروستی به‌گوێره‌ی پێوه‌ری سه‌رده‌میانه‌ ده‌که‌ین.
6ـ بۆ نه‌هێشتنی کرێچێتی و کێشه‌ی نیشته‌جێبوون په‌ره‌ به‌ پرۆژه‌ هه‌ره‌وه‌زییه‌کان ده‌ده‌ین.
7ـ بۆئه‌وه‌ی ژیان و که‌رامه‌تی هه‌موو ئه‌وانه‌ی ئاواره‌ی باشووری کوردستان بوون بپارێزرێت و له‌هه‌مانکاتدا رێژه‌ی ئاواره‌کان کاریگه‌ری نه‌رێنی له‌سه‌ر سروشتی دیموگرافی و چاندی و پێکهاته‌ی نه‌ته‌وه‌یی کۆمه‌ڵگا نه‌کات و که‌مترین قورسایی ئابووری و کۆمه‌ڵایه‌تی و سیاسی به‌سه‌ر کۆمه‌ڵگادا هه‌بێت، کاری جددی ده‌که‌ین و پرۆژه‌ی تایبه‌ت ئاماده‌ ده‌که‌ین.

هه‌شته‌م: له‌بواری په‌روه‌رده‌ و فێرکاری (خوێندن)دا
په‌روه‌رده‌ و فێرکاری پرۆسه‌یه‌کی گرنگی کۆمه‌ڵگابوون و دیموکراتیزه‌بوونه‌، پێشکه‌وتن و گه‌شه‌کردنی هه‌ر وڵات و کۆمه‌ڵگایه‌ک به‌نده‌ به‌ئاستی پێشکه‌وتوویی سیسته‌می په‌روه‌رده‌ و فێرکارییه‌که‌یه‌وه‌. له‌م پێناوه‌دا:
1ـ به‌هه‌ماهه‌نگی له‌گه‌ڵ که‌س و ده‌زگای شاره‌زا کار بۆ پرۆژه‌ی ئاواکردنی سیسته‌مێکی هاوچه‌رخی په‌روه‌رده‌یی و فێرکاری ده‌که‌ین که‌ راستینه‌ی نه‌ته‌وه‌یی و نیشتمانی و پره‌نسیپه‌کانی ئازادی و دیموکراتی به‌ بنه‌ما وه‌ربگرێت. 
2ـ به‌ ئامانجی ئاواکردنی سیسته‌مێکی پێشکه‌وتووی بواری په‌روه‌رده‌ و فێرکاریدا؛ کار بۆ زیادکردنی بودجه‌ی بواری په‌روه‌رده‌ و فێرکردن ده‌که‌ین، که‌ له‌(١٠%)ی کۆی بودجه‌ی گشتی ساڵانه‌ که‌متر نه‌بێت.

نۆیه‌م: له‌بواری چاند و هونه‌ریدا
چاندی دیموکراتی و هونه‌ری ئازاد بناخه‌ی کۆمه‌ڵگایه‌کی ئه‌خلاقی و سیاسییه‌. بۆیه‌ پاراستنی زمان و شێوه‌زاره‌ زگماکییه‌کانی جڤاکی کوردستان و په‌ره‌پێدانی چاندی جڤاکی دیموکراتی و هونه‌ر و ئه‌ده‌بیاتی ئازادیخواز له‌ ئه‌رکه‌ بنچینه‌ییه‌کانمانه‌. له‌م پێناوه‌دا: 
1ـ له‌به‌رامبه‌ر به‌ هه‌موو ئه‌و شاڵاوه‌ چاندی و راگه‌یاندنییه‌ی که‌ به‌ئامانجی سڕینه‌وه‌ و قڕکردنی ناسنامه‌ی چاندی گه‌له‌که‌مان به‌ڕێوه‌ ده‌برێن تێکۆشانی جددی و هه‌مه‌لایه‌نه‌ ده‌که‌ین.
2ـ له‌هه‌موو هه‌رێم و شار و لادێکاندا ده‌زگای جڤاکی بۆ کار و خه‌باتی چاندی و هونه‌ری دابمه‌زرێنرێت.
3ـ کۆنفڕانسێکی تایبه‌ت به‌ پاراستنی زمان و شێوه‌زاره‌کانی کوردستان به‌ڕێوه‌ ده‌به‌ین.
4ـ کۆنفڕانسێک بۆ به‌رگریکردن له‌ چاند و هونه‌ری ره‌سه‌نی کوردستان رێکده‌خه‌ین.
5ـ هه‌ڵمه‌تی تایبه‌ت بۆ پاراستنی شوێنه‌واره‌کانی کوردستان و که‌له‌پوور و فۆلکلۆری کورده‌واری و گه‌لانی دیکه‌ی کوردستان به‌ڕێوه‌ ده‌به‌ین.
6ـ ساڵانه‌ میهره‌جانی چانده‌ جیاوازه‌کانی کوردستان به‌ڕێوه‌ ده‌به‌ین.
 
ده‌یه‌م: له‌بواری ژینگه‌پارێزی و شاره‌وانی دیموکراتیدا
ژینگه‌پارێزی و خۆبه‌ڕێوه‌به‌رییه‌ خۆجێی و دیموکراتییه‌کان دوو ستوندی بنچینه‌یی بونیادنانی سیسته‌می جڤاکی دیموکراتیین. بۆیه‌ پێشخستنی هوشیاری ژینگه‌پارێزی، به‌داموده‌زگابوونی سیسته‌می دیموکراتی له‌ئاستی جڤاکیدا، مۆدێلی شاره‌داری دیموکراتی ژینگه‌پارێز، هاوسه‌نگی له‌نێوان گوند ـ شار و دا له‌ ئه‌رکه‌ بنچینه‌ییه‌کانمانه‌. له‌م پێناوه‌دا: 
1ـ کار بۆ سه‌وزایاییکردنی ژینگه‌ی وڵات ده‌که‌ین، به‌تایبه‌تی شوێنی نیشته‌جێبوون، که‌ ‌رێژه‌ی رووبه‌ری سه‌وزاییه‌که‌ی که‌متر نه‌بێت له‌(20%)ی کۆی رووبه‌ری شوێنی نیشته‌جێبوون.
2ـ سه‌باره‌ت به‌ هوشیاری ژینگه‌یی و مۆدێلی شاره‌وانی دیموکراتی کۆنفرانسێک رێکده‌خه‌ین و پرۆژه‌ی شاره‌وانی دیموکراتی ئاماده‌ ده‌که‌ین.

یازده‌هه‌م: له‌بواری ماف و ئازادییه‌کانی ژناندا
1ـ له‌پێناو رزگارکردنی هه‌موو ئه‌و ژنانه‌ی گروپی چه‌ته‌کانی داعش رفاندوونی تێکۆشانی هه‌مه‌لایه‌نه‌ به‌ڕێوه‌ده‌به‌ین.
2ـ له‌پێناو به‌رگریکردن له‌ ژیان و که‌رامه‌تی ئاواره‌کان به‌گشتی و ژنان و منداڵان به‌تایبه‌تی تێکۆشانی هه‌مه‌لایه‌نه‌ به‌ڕێوه‌ده‌به‌ین.
3ـ چه‌ند پرۆژه‌یه‌کی تایبه‌ت سه‌باره‌ت به‌ دۆخی ژنان ئاماده‌ ده‌که‌ین له‌وانه‌: پرۆژه‌ یاسای هه‌موارکردنه‌وه‌ی ئه‌و یاسانه‌ی که‌وا جیاکاری نه‌رێنی ره‌گه‌زیان به‌ بنچینه‌ وه‌رگرتووه‌، وه‌ک: یاسای باری که‌سێتی، یاسای سزادان، یاسای کار و یاسای دژ به‌ له‌شفرۆشی. پرۆژه‌ یاسایه‌ک سه‌باره‌ت به‌ ژنکوژی و بڕینه‌وه‌ی سزای هه‌تاهه‌تایی بۆ هه‌ر ژنکوژێک، به‌مه‌رجێک هیچ لێبوردنێکی گشتی و تایبه‌ت نه‌یگرێته‌وه‌. پرۆژه‌ یاسایه‌ک بۆ چه‌سپاندنی رێژه‌یه‌ک که‌ که‌متر نه‌بێت له‌ %40 بۆ ژنان له‌سه‌رجه‌م کاروباری ده‌زگاکانی هه‌رێمدا. پرۆژه‌ یاسایه‌ک بۆئه‌وه‌ی له‌هه‌موو دامه‌زراوه‌کاندا سه‌رۆک یان جێگره‌که‌ی ژن بێت، یاخود سیسته‌می هاوسه‌رۆکی په‌یڕه‌و بکرێت.

دوازده‌م: له‌بواری کار و خه‌باتی گه‌نجاندا
ده‌ستپێکردنی هه‌ر چه‌شنه‌ گۆڕانکارییه‌ک پێویستی به‌ به‌رپاکردنی شۆڕشێکی زیهنی و ویژدانی و گۆڕانکاری له‌ که‌سێتیدا هه‌یه‌. ئه‌مه‌ش به‌ سیسته‌مێکی دیموکراتی په‌روه‌رده‌ی جڤاکی هه‌یه‌ و له‌سه‌رووی هه‌موویانه‌وه‌ به‌پێشه‌نگایه‌تی گه‌نجان دێته‌دی. له‌م پێناوه‌دا:
1ـ ئه‌کادیمیایه‌کی سیاسی جڤاکی تایبه‌ت به‌ گه‌نجان ئاواده‌که‌ین.
2ـ بۆ نه‌هێشتنی هه‌ژاری، بێکاری، مشه‌خۆری و ته‌شه‌نه‌سه‌ندنی مادده‌ هۆشبه‌ره‌کان؛ له‌نێو کۆمه‌ڵگا به‌گشتی و له‌نێو ریزه‌کانی گه‌نجاندا به‌تایبه‌تی، تێکۆشانی جددی ده‌که‌ین و له‌هه‌موو ئاست و شوێنێکیشدا کۆمه‌ڵه‌ی هه‌ره‌وه‌زی ئاواده‌که‌ین. 
3ـ بۆ پێشخستنی توانست و به‌هره‌ی گه‌نجان له‌ بواره‌کانی سیاسه‌تی دیموکراتی، چاند و هونه‌ر، وه‌رزش و بواره‌کانی دیکه‌ی ژیاندا رێکخستنی پێویست پێشبخرێت.
٤. بۆ پێشه‌نگایه‌تیکردنی گه‌نجان له‌ به‌رگریکردن له‌ گه‌ل و وڵاتدا له‌چوارچێوه‌ی به‌رگری خۆیی و ره‌وادا هوشیاری به‌رگریکردن و خۆرێکخسته‌کردنی گه‌نجان له‌ ئاستی هه‌رێم و شار و لادێکاندا به‌بنچینه‌ وه‌رده‌گرین.


په‌سندکراوی
یه‌که‌مین کۆنگره‌ی دامه‌زراندنی
ته‌ڤگه‌ری ئازادی کۆمه‌ڵگای کوردستان
17.10.2014
سلێمانی




به‌لاغی کۆتایی
یه‌که‌مین کۆنگره‌ی دامه‌زراندنی
ته‌ڤگه‌ری ئازادی کۆمه‌ڵگای کوردستان

ئێمه‌ وه‌ک کۆمه‌ڵێک که‌سێتی سیاسی، رۆشنبیری و کۆمه‌ڵایه‌تی، رێکخراوی کۆمه‌ڵایه‌تی و پارتی سیاسی دوای ئه‌وه‌ی له‌ رێکه‌وتی ١١ی تشرینی یه‌که‌می ٢٠١٤دا له‌ کۆنفرانسێکی رۆژنامه‌وانیدا و به‌ئاماده‌بوونی ده‌یان که‌سێتی سیاسی و رۆشنبیری ده‌ستپێشخه‌رییه‌کمان به‌ناوی "ده‌ستپێشخه‌ری ته‌ڤگه‌ری ئازادی" راگه‌یاند، له‌رێکه‌وتی ١٧ی هه‌مان مانگیشدا به‌ئاماده‌بوونی ١٥١ ئه‌ندامی جڤاتی گشتی، وه‌ک نوێنه‌ری سه‌رجه‌م شار و شارۆچکه‌کانی باشووری کوردستان، له‌ژێر دروشمی" له‌پێناو تاکێکی ئازاد و کۆمه‌ڵگایه‌کی دیموکراتدا" یه‌که‌مین کۆنگره‌ی دامه‌زراندنمان له‌ سلێمانی به‌ڕێوه‌برد و له‌کۆنگره‌دا به‌کۆی ده‌نگ بڕیاری دامه‌زراندنی "ته‌ڤگه‌ری ئازادی کۆمه‌ڵگای کوردستان"مان دا. له‌ کۆنگره‌که‌دا جڤاتی گشتی به‌چڕوپری ره‌وشی جیهان و رۆژهه‌ڵاتی ناوین به‌ گشتی و دۆخی سیاسی و کۆمه‌ڵایه‌تی و ئابووری و په‌روه‌رده‌یی و رۆشنبیری و به‌رگری و بواره‌کانی دیکه‌ی ژیانی کۆمه‌ڵگای باشووری کوردستان و ئێراقی تاوتوێکرد و گه‌یشته‌ چه‌ند ئه‌نجام و بڕیارێکی گرنگ. هه‌روه‌ها دوای په‌سندکردنی په‌یماننامه‌ی ته‌ڤگه‌ری ئازادی و پرۆژه‌ بڕیاره‌کان، له‌هه‌ڵبژاردنێکی دیموکراتیانه‌دا هاوسه‌رۆکی ته‌ڤگه‌ری ئازادی هه‌ر یه‌ک له‌ به‌ڕێزان"شیلان شاکر و محه‌مه‌د عه‌بدوڵڵا" و ده‌سته‌یه‌کی به‌ڕێوه‌به‌رایه‌تی گشتی له‌ ١٥ ئه‌ندامی کۆنگره‌ هه‌ڵبژێردران. 
له‌دایکبوونی ته‌ڤگه‌ره‌که‌مان له‌کاتێکدایه‌ که‌ له‌چوارچێوه‌ی پیلانگێڕییه‌کی دژه‌ کورد و کوردستاندا گروپی چه‌ته‌کانی داعش به‌ پشتیوانی و هاوکارییه‌کی گه‌وره‌ی ده‌وڵه‌تی داگیرکاری تورکیا و چه‌ندین ده‌وڵه‌ت و هێزی جیهانی و ناوچه‌یی دیکه‌ په‌لامارێکی داگیرکارانه‌ی کوردستانیان ده‌ستپێکردووه‌ و به‌هه‌موو دڕنده‌ییه‌که‌وه‌ له‌هه‌وڵی قڕکردنی گه‌لی کوردستان دان. گه‌لی کوردستانیش له‌هه‌موو ئاسته‌کاندا، به‌تایبه‌تی له‌ باشوور و رۆژئاوای کوردستاندا؛ پێشمه‌رگه‌ و شه‌ڕڤان و گه‌ریلا دلێره‌کانی کوردستان به‌رگری و به‌رخۆدانێکی مێژوویی و نه‌وازه‌یان نواندووه‌، به‌تایبه‌تی له‌ کۆبانێدا گه‌ل و شه‌ڕڤانه‌کانی یه‌په‌گه‌ و یه‌په‌ژه‌ به‌رخۆدانێکیان نواندووه‌ که‌ له‌هه‌موو مێژووی مرۆڤایه‌تیدا نموونه‌یه‌کی نه‌وازه‌یه‌. بۆیه‌ کۆبانێ ئیتر مێژووێکی پڕشنگداری تۆمار کرد و داهاتووێکی شکۆداریشی بۆ گه‌له‌که‌مان مسۆگه‌ر کرد. ئیدی به‌رخۆدانی کۆبانێ بۆته‌ سیمبۆلی به‌رخۆدانی گه‌لی کوردستان و ته‌واوی مرۆڤایه‌تی، سیمبۆلی به‌رگریکردن له‌ که‌رامه‌ت و ژیانی ئازادانه‌ی گه‌لی کوردستان. ئه‌مه‌ش ئه‌رکی ئێمه‌ی له‌به‌رامبه‌ر به‌ ئه‌رکه‌ نه‌ته‌وه‌یی و نیشتمانییه‌کانی ته‌ڤگه‌ره‌که‌مانی روونتر و مه‌زنتر کردووه‌.  
هه‌روه‌ها دامه‌زراندنی ته‌ڤگه‌ره‌که‌مان "ته‌ڤگه‌ری ئازادی" له‌کاتێکدایه‌ که‌ سیسته‌می باڵاده‌ستی جیهانی له‌نێو گێژاوێکی قووڵی بونیادی دایه‌ و ته‌واوی کۆمه‌ڵگاکانی مرۆڤایه‌تیشی په‌لکێشی ئه‌و گێژاوه‌ هه‌مه‌لایه‌نه‌ کردووه‌، له‌پێناو له‌سه‌رپێ مانه‌وه‌ی خۆیشیدا که‌وتۆته‌ نێو ململانێ و جه‌نگێکی خوێناوی جیهانییه‌وه‌ و ناوچه‌ی خۆرهه‌ڵاتی ناوینیشی کردۆته‌ چه‌قی ئه‌و ململانێ و جه‌نگه‌. کوردستان و هه‌ر چوار ده‌وڵه‌تی باڵاده‌ستی سه‌ر کوردستانیش وه‌ک ناوه‌ندی ئه‌م ناوچه‌یه‌ بوونه‌ته‌ گۆڕه‌پانی سه‌ره‌کی یه‌کلاییکردنه‌وه‌ی ململانێ و جه‌نگه‌کان. به‌مه‌ش کاریگه‌ری ته‌واوی ململانێ و جه‌نگه‌ جیهانی و ناوچه‌یی و هه‌رێمییه‌کان راسته‌وخۆ کاریگه‌ری هه‌مه‌لایه‌نه‌ی به‌سه‌ر کوردستان و ئه‌و ده‌وڵه‌ته‌ قه‌واره‌پارێزانه‌دا هه‌یه‌. 
باشووری کوردستانیش وه‌ک به‌شێکی کوردستان و له‌سنووری ئێراقدا گۆڕه‌پانێکی گرنگی ئه‌م دۆخه‌ گێژاوییه‌یه‌ و کاریگه‌ری راسته‌وخۆی جیهان و ناوچه‌که‌ی به‌سه‌ره‌وه‌یه‌. ته‌نانه‌ت هه‌م بۆته‌ گۆڕه‌پانێکی سه‌ره‌کی و هه‌میش بۆته‌ به‌شێک له‌ ململانێ و جه‌نگی نێوان جه‌مسه‌ر و ره‌وته‌ ململانێکار و ناکۆکه‌کان . وێڕای ٢٣ ساڵ ئه‌زموونی ده‌سه‌ڵاتدارێتی له‌ هه‌رێمدا، که‌چی له‌ ئاستی سیسته‌می ده‌سه‌ڵاتدارێتی و دۆخی کۆمه‌ڵایه‌تیدا له‌نێو گێژاوێکی قووڵ و به‌رفراوان دایه‌ و ئیتر سیسته‌می ده‌سه‌ڵاتدارێتی و کۆمه‌ڵگا بۆته‌ سیسته‌می قه‌یران و به‌ڕێوه‌بردنی قه‌یرانه‌کان. ئه‌مه‌ش له‌گه‌ڵ خۆیدا زه‌مینه‌ی گۆڕانکارییه‌کی بنچینه‌یی گه‌وره‌ی له‌هه‌ناوی خۆیدا هه‌ڵگرتووه‌.
ئێمه‌ له‌ کۆنگره‌که‌ماندا؛ گه‌یشتینه‌ ئه‌و راستییه‌ی که‌" هه‌رچه‌نده‌ ناڕه‌زاییه‌ جه‌ماوه‌رییه‌کان له‌به‌رامبه‌ر به‌م دۆخه‌دا تادێت زیاتر و چڕتر ده‌بێته‌وه‌، به‌ڵام ده‌سه‌ڵات به‌هۆی تایبه‌تمه‌ندییه‌ قۆرخکارییه‌که‌یه‌وه‌ هێشتا بێباکه‌ له‌ وه‌ڵامی ئه‌رێنیانه‌ی ناڕه‌زاییه‌ جه‌ماوه‌رییه‌کان. به‌مه‌ش ده‌سه‌ڵات له‌بری بوون به‌ هێزی چاره‌سه‌رکردنی ئه‌و دۆخه‌ گێژاوییه‌ی که‌ خۆی و کۆمه‌ڵگاشی تێخستووه‌، بۆته‌ سه‌رچاوه‌ی کێشه‌ و قه‌یرانه‌کان و له‌هه‌وڵه‌کانی بۆ رزگاربوون له‌م دۆخه‌دا به‌بنبه‌ستی گه‌یشتووه‌. هێز و لایه‌نه‌ ئۆپۆزسیۆنه‌کان به‌هۆی مه‌یلی ده‌سه‌ڵاتخوازێتی و نه‌بوونی ستراتیژ و به‌رنامه‌یه‌کی چاره‌سه‌رئامێز بۆ کێشه‌ و قه‌یرانه‌کان نه‌یانتوانیوه‌ ببنه‌ هێزی چاره‌سه‌ری و له‌گه‌ڵ یه‌که‌م هه‌نگاوی به‌شداربوونیان له‌ ده‌سه‌ڵاتدا بوونه‌ هێزی یه‌ده‌گی ده‌سه‌ڵات و ئه‌و وزه‌ و پشتیوانییه‌ جه‌ماوه‌رییه‌ی به‌ده‌ستیان هێنابوو، خستیانه‌ خزمه‌ت ئیداره‌کردنی کێشه‌ و قه‌یرانه‌کان نه‌ک چاره‌سه‌رکردنیان. به‌مه‌ش ئۆپۆزسیۆنی ده‌سه‌ڵاتخواز ناڕه‌زاییه‌کان و هیوا و داخوازییه‌کانی کۆمه‌ڵگای وه‌ک په‌یژه‌یه‌ک بۆ گه‌یشتن به‌ ده‌سه‌ڵات به‌کارهێنا و دۆخێکی بێ ئۆپۆزسیۆنی له‌ناو په‌رله‌ماندا هێنایه‌کایه‌وه‌. به‌ڵام ئه‌مه‌ نه‌ به‌واتای چاره‌سه‌رکردنی کێشه‌ و قه‌یرانه‌کان دێت و نه‌ ناڕه‌زایی و هیوا و داخوازییه‌کانی کۆمه‌ڵگاش کۆتاییان پێدێت. بۆیه‌ کۆمه‌ڵگا، له‌سه‌رووی هه‌موویانه‌وه‌ چین و توێژه‌ هه‌ژار و ره‌نجده‌ره‌کان، تا گه‌یشتن به‌ ماف و ئازادییه‌کانی خۆیان ده‌ستبه‌رداری تێکۆشانی خۆیان نابن و به‌رده‌وام له‌نێو لێگه‌ڕینی چاره‌سه‌ری دان و له‌میانه‌ی چالاکییه‌ ناڕه‌زاییه‌کانییه‌وه‌ هێزی نوێی گۆڕانکاری و وه‌رچه‌رخان و توانستی چاره‌سه‌ری ده‌ئافرێنن."
له‌سه‌ر ئه‌م بنه‌مایه‌؛ ته‌ڤگه‌ری ئازادی کۆمه‌ڵگای کوردستان که‌ بزووتنه‌وه‌یه‌کی نوێی جڤاکی سیاسی خاوه‌ن جیهانبینی و رێبازی وه‌رچه‌رخانی دیموکراتیانه‌یه‌ له‌پێناو وه‌ڵامدانه‌وه‌یه‌کی راستی ئه‌م دۆخه‌ دژواره‌ی که‌ ئێستا له‌ باشووری کوردستاندا ده‌گوزه‌رێت له‌دایک بووه‌ و به‌م ئامانجه‌شه‌وه‌ تێکۆشانی خۆی ده‌ستپێده‌کات. مسۆگه‌ر ته‌ڤگه‌ره‌که‌مان خۆی به‌ جێگره‌وه‌ یان دژبه‌ری هیچ پارت و لایه‌نێکی سیاسی دیاریکراو نابینێت. به‌ڵام به‌ رۆح و فیکرێکی ئۆپۆزسیۆنی رادیکاڵ و پۆزه‌تیڤ کار و خه‌باتی خۆی به‌ڕێوه‌ ده‌بات، بۆئه‌وه‌ی ببێته‌ هێزی چاره‌سه‌ری کێشه‌ و قه‌یرانه‌کان و به‌شدارێکی چالاک و کاریگه‌ر له‌ بونیادنانی سیسته‌مێکی سیاسی جڤاکی دیموکراتی. سه‌باره‌ت به‌ پرسه‌ زیهنی، سیاسی، جڤاکی، چاندی و ئابوورییه‌کانی کۆمه‌ڵگاش پرۆژه‌ و خه‌باتی چاره‌سه‌رئامێزی خۆی ده‌بێت. 
له‌یه‌که‌مین کۆنگره‌ی جڤاتی گشتی ته‌ڤگه‌ری ئازادیدا له‌میانه‌ی گفتوگۆیه‌کی کراوه‌ و ئازادانه‌دا به‌شێوه‌یه‌کی روون جیهانبینی و رێبازی کار و خه‌باتی ته‌ڤگه‌ره‌که‌مان و ئه‌رک و ئامانجه‌کانی ده‌ستنیشان کرد و مۆدیلێکی نوێی رێکخستنی دامه‌زراند. له‌ کۆنگره‌دا رێبازی کار و خه‌باتی ته‌ڤگه‌ری ئازادیمان ده‌ستنیشان بوو، که‌ به‌ پێشه‌نگایه‌تی ژنان و گه‌نجانی ئازادیخوازه‌ و به‌شداری ژنان له‌هه‌موو بوار و ئاسته‌کانی تێکۆشاندا له‌سه‌ر بنه‌مای به‌شداری هاوبه‌ش و یه‌کسان ده‌بێت و سیسته‌می هاوسه‌رۆکایه‌تی بنه‌مایه‌کی سه‌ره‌کی به‌ڕێوه‌بردنی کار و خه‌باتمانه‌. هه‌روه‌ها دیموکراتیزه‌کردنی تاک و جڤاک بۆ گۆڕان و وه‌رچه‌رخانی دیموکراتی شێوازی بنچینه‌ییمان ده‌بێت. له‌ئاستی هه‌رێم و شار و شارۆچکه‌ و گونده‌کانیشدا سیسته‌می ئه‌نجوومه‌نه‌کان به‌بنه‌ما وه‌رده‌گرین. 
هه‌روه‌ها سه‌باره‌ت به‌ دۆخی سیاسی و ئابووری و کۆمه‌ڵایه‌تی و کولتووری و به‌رگری خۆیی له‌ئاستی نه‌ته‌وه‌یی و نیشتمانی و دیموکراتی و خزمه‌تگوزاریدا چه‌ندین بڕیاری گرنگی وه‌رگرت، گرنگترینیان ئه‌مانه‌ن:

 یه‌که‌م: له‌بواری نه‌ته‌وه‌یی و نیشتمانیدا
١. له‌پێناو یه‌کێتی و یه‌کگرتنه‌وه‌ی جڤاک و خاکی کوردستاندا کۆنفیدراڵی دیموکراتی کوردستان به‌ئامانجی ستراتیژی خۆی ده‌بینێت.
٢.هه‌موو هه‌وڵێکمان بۆ به‌ستنی کۆنفرانسێکی نه‌ته‌وه‌یی ته‌رخان ده‌که‌ین. له‌م چوارچێوه‌یه‌دا پرۆژه‌یه‌کی نه‌ته‌وه‌یی دیموکراتی ئاماده‌ ده‌که‌ین و پشتیوانی ته‌واو له‌ تێکۆشان و به‌رخۆدانی گه‌له‌که‌مان و هه‌وڵه‌ ئاشتیخوازییه‌کان بۆ چاره‌سه‌ری دیموکراتیانه‌ی پرسی کورد له‌پارچه‌کانی دیکه‌ی کوردستان ده‌که‌ین. 
٣. پرۆژه‌یه‌کی ده‌ستووری بۆ ئێراقێکی کۆنفیدراڵی دیموکراتی ئاماده‌ ده‌که‌ین که‌ ماف و ئازادی گه‌لی کوردستان و گه‌لانی دیکه‌ی ئێراق مسۆگه‌ر بکات.
4ـ پرۆژه‌یه‌کی دیموکراتی بۆ چاره‌سه‌ری پرسی هه‌موو ناوچه‌ کوردستانییه‌کانی ده‌ره‌وه‌ی هه‌رێم ئاماده‌ ده‌که‌ین.
5ـ له‌چوارچێوه‌ی پرۆژه‌ی نه‌ته‌وه‌یی و نیشتمانیدا خه‌باتی جددی و هه‌مه‌لانه‌ بۆ پاراستنی زمان و شێوه‌زاره‌کان و شوێنه‌وار و که‌له‌پوور و فۆلکلۆری کورده‌واری و گه‌لانی دیکه‌ی کوردستان ده‌که‌ین.
6ـ به‌هه‌موو شێوه‌یه‌ک پشتیوانی له‌ به‌رگری و به‌رخۆدانی شکۆمه‌ندانه‌ی پێشمه‌رگه‌ و شه‌ڕڤان و گه‌ریلا گیانبازییه‌کانی کوردستان ده‌که‌ین که‌ دژ به‌ هێرشه‌ دڕنده‌ییه‌کانی چه‌ته‌کانی داعش و ئه‌وانه‌ش که‌ پشتیوانی و هاوکاری ئه‌و گروپه‌ سه‌رلێشێواوانه‌ ده‌که‌ن له‌سه‌نگه‌ری که‌رامه‌ت و به‌رگریکردن دان. به‌تایبه‌تی به‌رخۆدانی گه‌له‌که‌مان و شه‌ڕڤانه‌ بوێره‌کانی یه‌په‌گه‌ و یه‌په‌ژه‌ له‌ کۆبانێ و ته‌واوی رۆژئاوای کوردستان که‌ ئیدی بۆته‌ ناسنامه‌ی به‌رخۆدانڤانێتی گه‌لی کوردستان له‌جیهاندا.
7ـ له‌پێناو تێگه‌یشتنێکی راست و دیموکراتیانه‌ بۆ رۆڵی ئایین و ئایینزا و ته‌ریقه‌ته‌کان له‌سه‌ر تاک و کۆمه‌ڵگادا بێته‌دی و مه‌ترسییه‌کانی هه‌موو جۆره‌ توندڕه‌وی و ده‌مارگیرییه‌کی ئایینی و ئایینزایی رێگیریی لێبکرێت پرۆژه‌ و هه‌وڵ و تێکۆشانی دیموکراتیانه‌مان په‌ره‌پێده‌ده‌ین.
دووه‌م: له‌بواری سیاسه‌تی دیموکراتیدا
1ـ خه‌باتی ئۆپۆزسیۆنبوونی رادیکاڵانه‌ی دیموکراتی ته‌ڤگه‌ره‌که‌مان له‌سه‌ر بنه‌مای ئۆپۆزسیۆنێتی پۆزه‌تیڤ ده‌ستپێده‌که‌ین و له‌ به‌ره‌ی گه‌ل و ئازادیخوازان و دیموکراتیخوازاندا تێکۆشانمان به‌ره‌وپێشه‌وه‌ ده‌به‌ین. 
2ـ کار بۆ پێشخستنی به‌ره‌یه‌کی نه‌ته‌وه‌یی دیموکراتی له‌ که‌سێتی ئازادیخواز، لایه‌نه‌ سیاسییه‌ دیموکراتیخوازه‌کان و رێکخراوه‌ جڤاکییه‌کان ده‌که‌ین.
3ـ له‌پێناو داڕشتنی ده‌ستوورێکی دیموکراتیدا پرۆژه‌یه‌کی ده‌ستووری پێشکه‌ش به‌ رای گشتی کوردستان و په‌رله‌مانی هه‌رێم ده‌که‌ین.
4ـ کار بۆ وه‌ده‌رنانی هه‌موو هێزه‌ سه‌ربازی و ده‌زگا هه‌واڵگرییه‌کانی ده‌وڵه‌تان و ئه‌و ده‌زگایانه‌ی به‌ناوی دیکه‌وه‌ دامه‌زراون ده‌که‌ین که‌ زیان به‌ ئاسایشی نه‌ته‌وه‌یی و نیشتمانیمان ده‌گه‌یه‌نن.
5ـ له‌چوارچێوه‌ی پرۆژه‌یه‌کی نه‌ته‌وه‌یی و نیشتمانیدا هه‌وڵده‌ده‌ین گه‌ل له‌هه‌موو هه‌رێم و شار و لادێکانیدا خاوه‌ن هێزی خۆیی به‌رگریکردن بێت.
6ـ بۆئه‌وه‌ی هێزی پێشمه‌رگه‌، ئاسایش، ده‌زگای هه‌واڵگری، پۆلیس و سه‌رجه‌م ده‌زگاکانی تر ببنه‌ ده‌زگای هه‌موو وڵات خه‌بات ده‌که‌ین تاکو ئه‌و ده‌زگایانه‌ سه‌رله‌نوێ دروستبکرێنه‌وه‌.

سێیه‌م: له‌بواری ئابووری و کارگێڕییدا
1ـ بۆ بنبڕکردنی گه‌نده‌ڵی له‌هه‌موو کایه‌کانی سیسته‌می سیاسی و کارگێڕیدا پرۆژه‌ و خه‌باتی کرداری و جه‌ماوه‌ری په‌ره‌پێده‌ده‌ین. 
2ـ کار بۆ سه‌رله‌نوێ رێکخستنه‌وه‌ی سیسته‌می کارگێڕی له‌ باشووری کوردستان و ئێراق ده‌که‌ین که‌ سیسته‌می کۆنفیدراڵی دیموکراتی و خۆبه‌ڕێوه‌به‌رێتی دیموکراتی به‌بنه‌ما وه‌ربگیرێت و ناوه‌ندێتی که‌م بکاته‌وه‌، سنووره‌ کارگێڕییه‌کان به‌گوێره‌ی هاوسه‌نگی و راستینه‌ی دیموگرافی دانیشتوان رێکبخرێنه‌وه‌.
3ـ له‌به‌رامبه‌ر به‌ هه‌موو پرۆژه‌ ئابوورییه‌ پاوانخوازییه‌ چه‌وسێنه‌ره‌کان تێکۆشان ده‌که‌ین.
4ـ کار بۆ خۆماڵیکردن و به‌ نیشتمانیکردنی سامانی نه‌وت و گاز و سه‌رجه‌م وزه‌ و کانه‌ سروشتییه‌کان و هه‌موو بواره‌کانی به‌رهه‌مهێنان و وه‌به‌رهێنان، ته‌ندروستی، خوێندن و گه‌یاندن ده‌که‌ین.
5ـ بۆ چاره‌سه‌رکردنی کێشه‌ی زه‌ویه‌ کشتوکاڵی و موڵکدارییه‌کان و گه‌ڕاندنه‌وه‌ی مافی موڵکێتی بۆ جوتیاران پرۆژه‌یه‌کی چاکسازی کشتوکاڵی ئاماده‌ ده‌که‌ین.
6ـ کاری جددی بۆ ئاوه‌دانکردنه‌وه‌ی گونده‌کان و گه‌ڕانه‌وه‌ بۆ گونده‌کان ده‌که‌ین و له‌بواری کشتوکاڵی و ئاژه‌ڵداریدا ده‌بینه‌ خاوه‌ن پرۆژه‌ی هه‌روه‌زکاری. 

چواره‌م: له‌بواری کۆمه‌ڵایه‌تیدا
1ـ بۆئه‌وه‌ی بێکاری نه‌مێنێت و ژیان و مافه‌کانی کرێکار و ره‌نجده‌ران بپارێزرێن تێکۆشان ده‌که‌ین و به‌ پێویستییه‌کی گرنگی ده‌بینین که‌ یاسای مسۆگه‌ری کۆمه‌ڵایه‌تی و ته‌ندروستی (الچمان الاجتماعی و الصحی) بۆ هه‌موو که‌سێک له‌هه‌ر ته‌مه‌نێکدا بێت دابڕێژرێت و جێبه‌جێ ببێت. 
2ـ کار بۆ دیموکراتیزه‌کردنی سیسته‌می په‌روه‌رده‌ و فێرکردن له‌هه‌موو ئاسته‌کاندا ده‌که‌ین و پرۆژه‌ی په‌روه‌رده‌ی جڤاکی دیموکراتی له‌ئاستی هه‌رێم و شار و گه‌ڕه‌ک و لادێکاندا پێشده‌خه‌ین.
4ـ کار بۆ پاراستنی ژیان و ته‌ندروستی منداڵان و جێگیرکردنی سیسته‌مێکی په‌روه‌رده‌یی پێشکه‌وتوو له‌ دایه‌نگه‌ و باخچه‌ی منداڵان و خوێندگای سه‌ره‌تایی و نه‌شونمای سروستیانه‌ی منداڵان ده‌که‌ین و رێگیری له‌هه‌موو جۆره‌ کارپێکردنێکی منداڵان ده‌که‌ین.
5ـ له‌پێناو دابینکردنی ژیانێکی ئاسووده‌ و ئارام بۆ پیر و په‌ککه‌وته‌، که‌مئه‌ندام و خاوه‌ن پێداویستییه‌ تایبه‌ته‌کان تێده‌کۆشین. 
6ـ کار بۆ گۆڕینی سیسته‌می ته‌ندروستی و دابینکردنی بیمه‌ی ته‌ندروستی به‌گوێره‌ی پێوه‌ره‌ جیهانییه‌کان ده‌که‌ین.
7ـ بۆ نه‌هێشتنی کرێچێتی و کێشه‌ی نیشته‌جێبوون په‌ره‌ به‌ پرۆژه‌ هه‌ره‌وه‌زییه‌کان ده‌ده‌ین.

پێنجه‌م: له‌بواری ماف و ئازادییه‌کانی ژناندا
1ـ له‌پێناوی ئه‌وه‌ی ژن ناسنامه‌ و ئیراده‌ی خۆی به‌ده‌ست بێنێته‌وه‌ و پێشه‌نگایه‌تی بونیادنانی جڤاکێکی ئازاد و یه‌کسان و دادپه‌روه‌ر بکات تێکۆشانی هه‌مه‌لایه‌نه‌ی خۆمان پێشده‌خه‌ین. 
2ـ چه‌ند پرۆژه‌یه‌کی تایبه‌ت سه‌باره‌ت به‌ دۆخی ژنان ئاماده‌ ده‌که‌ین له‌وانه‌: پرۆژه‌ یاسای هه‌موارکردنه‌وه‌ی ئه‌و یاسانه‌ی که‌وا جیاکاری نه‌رێنی ره‌گه‌زیان به‌ بنچینه‌ وه‌رگرتووه‌، وه‌ک: یاسای باری که‌سێتی، یاسای سزادان، یاسای کار و یاسای دژ به‌ له‌شفرۆشی. پرۆژه‌ یاسایه‌ک سه‌باره‌ت به‌ ژنکوژی و بڕینه‌وه‌ی سزای هه‌تاهه‌تایی بۆ هه‌ر ژنکوژێک، به‌مه‌رجێک هیچ لێبوردنێکی گشتی و تایبه‌ت نه‌یگرێته‌وه‌. پرۆژه‌ یاسایه‌ک بۆ چه‌سپاندنی رێژه‌یه‌ک که‌ که‌متر نه‌بێت له‌(40%) بۆ ژنان له‌سه‌رجه‌م کاروباری ده‌زگاکانی هه‌رێمدا. پرۆژه‌ یاسایه‌ک بۆئه‌وه‌ی له‌هه‌موو دامه‌زراوه‌کاندا سه‌رۆک یان جێگره‌که‌ی ژن بێت، یاخود سیسته‌می هاوسه‌رۆکی په‌یڕه‌و بکرێت.

شه‌شه‌م: له‌بواری ماف و ئازادییه‌کانی گه‌نجاندا
1ـ له‌پێناو نه‌هێشتنی هه‌ژاری، بێکاری، مشه‌خۆری و ته‌شه‌نه‌سه‌ندنی مادده‌ هۆشبه‌ره‌کان له‌نێو ریزه‌کانی گه‌نجاندا له‌هه‌موو ئاست و شوێنێکدا کۆمه‌ڵه‌ی هه‌ره‌وه‌زی ئاواده‌که‌ین. 
2ـ له‌به‌رامبه‌ر به‌ هه‌موو جۆره‌ شاڵاوێکی کولتووری که‌ به‌مه‌به‌ستی شێواندنی که‌سێتی گه‌نج و له‌ده‌ستدانی وزه‌ و توانست و پێشه‌نگایه‌تییه‌ ئازادیخوازییه‌که‌ی گه‌نجان به‌ئامانج وه‌ربگرێت، تێکۆشانی هه‌مه‌لایه‌نه‌ ده‌که‌ین.
3ـ له‌پێناو پێشه‌نگایه‌تیکردنی گه‌نجان له‌ به‌رگریکردن له‌ گه‌ل و وڵاتدا له‌چوارچێوه‌ی به‌رگری خۆیی و ره‌وادا هوشیاری به‌رگریکردن و خۆڕێکخسته‌کردنی گه‌نجان له‌ ئاستی هه‌رێم و شار و لادێکاندا به‌بنچینه‌ وه‌رده‌گرین.
هاوکات له‌گه‌ڵ ئه‌م بڕیارانه‌دا ته‌ڤگه‌ری ئازادیمان گه‌لێک بڕیاری دیکه‌ی وه‌رگرتووه‌ و چه‌ندین پرۆژه‌شمان بۆ یه‌که‌م قۆناخی خه‌بات و تێکۆشانمان ئاماده‌ کردووه‌. مسۆگه‌ر ئێمه‌ له‌خه‌بات و تێکۆشانی خۆماندا په‌روه‌رده‌ی زیهنی دیموکراتی و رێکخستنی جه‌ماوه‌ری و ئیراده‌ی ئازاد به‌ بنه‌ما وه‌رده‌گرین، گه‌ل و جه‌ماوه‌ر به‌ پشتیوانی ماددی و مه‌عنه‌وی سه‌ره‌کی خۆمان ده‌زانین. سه‌رکه‌وتن و به‌ئامانج گه‌یشتنی ته‌ڤگه‌ره‌که‌شمان هه‌ر ته‌نیا به‌ پشتیوانی گه‌ل دێته‌دی.   
له‌ کۆتاییدا ئێمه‌ وه‌ک ته‌ڤگه‌ری ئازادی کۆمه‌ڵگای کوردستان ده‌خوازین له‌ وڵاته‌که‌مان و له‌نێو گه‌له‌که‌ماندا ببین به‌ ته‌ڤگه‌رێکی جێی باوه‌ڕی و متمانه‌ی گه‌له‌که‌مان، ببینه‌ سه‌رچاوه‌ی هیوا و ئیراده‌ و هێزی تێکۆشان و به‌رگریکردن له‌ ماف و ئازادییه‌کانی گه‌ل. له‌م پێناوه‌شدا به‌ باوه‌ڕی و ئیراده‌یه‌کی تۆکمه‌ و به‌ جۆشوخرۆشێکی شۆڕشگێرانه‌وه‌ و به‌ ئه‌شقێکی مه‌زن بۆ ئازادی له‌تێکۆشاندا ده‌بین. ئێمه‌ داوای دۆستایه‌تی و هاوپه‌یمانێتی نه‌ته‌وه‌یی و دیموکراتی له‌هه‌موو لایه‌نه‌ سیاسییه‌ ئازادیخواز و دیموکراتیخوازه‌کان و رێکخراوه‌ کۆمه‌ڵایه‌تییه‌کان و که‌سێتییه‌ وڵاتپارێزه‌کان ده‌که‌ین که‌ به‌هه‌ماهه‌نگی و ته‌بایی له‌پێناو به‌رژه‌وه‌ندی باڵای نه‌ته‌وه‌یی و نیشتمانی و له‌سه‌ر بنه‌مایه‌کی دیموکراتیانه‌ به‌یه‌که‌وه‌ کار و خه‌بات بکه‌ین و ببینه‌ خاوه‌ن پرۆژه‌ و ستراتیژ و به‌ره‌ی نه‌ته‌وه‌یی و دیموکراتی هاوبه‌ش. له‌سه‌ر ئه‌م بنه‌مایه‌؛ بۆئه‌وه‌ی هه‌موومان رۆڵمان له‌ بونیادنانی تاکێکی ئازاد و کۆمه‌ڵگایه‌کی دیموکرات و سیسته‌مێکی سیاسی جڤاکی دیموکراتدا هه‌بێت بانگه‌وازی له‌ گه‌له‌که‌مان به‌گشتی و ژنان و گه‌نجان، چین و توێژه‌ چه‌وساوه‌ و ره‌نجده‌ره‌کان، که‌سێتییه‌ سیاسی و کۆمه‌ڵایه‌تی و رۆشنبیرییه‌کان به‌تایبه‌تی ده‌که‌ین که‌؛ له‌ده‌وری ته‌ڤگه‌ره‌که‌ماندا کۆببنه‌وه‌، تاکو ئیراده‌یه‌کی ئازاد و یه‌کگرتوو نیشان بده‌ین و ژیانێکی ئازاد و دادپه‌روه‌ر و ئاشتی و دیموکرات بونیاد بنێین. 
سڵاو له‌ ته‌واوی گه‌لی کوردستان و بنه‌ماڵه‌ی سه‌ربه‌زری شه‌هیدانی رێگای ئازادی. سڵاو له‌و پێشمه‌رگه‌ و شه‌ڕڤان و گه‌ریلایانه‌ ده‌که‌ین که‌ له‌ جه‌له‌ولاوه‌ تا که‌رکوک، له‌ مه‌خموره‌وه‌ تا شه‌نگال، له‌ ره‌بیعه‌وه‌ تا سه‌رێکانی و کۆبانێ له‌ سه‌نگه‌ره‌کانی رووبه‌ڕوونه‌وه‌دا به‌رگری له‌ گه‌ل و نیشتمان و که‌رامه‌تی نه‌ته‌وه‌ییمان و ته‌واوی مرۆڤایه‌تی ده‌که‌ن.

ده‌سته‌ی به‌ڕێوه‌به‌رایه‌تی
ته‌ڤگه‌ری ئازادی کۆمه‌ڵگای کوردستان
21/10/2014
سلێمانی



به‌ڵگه‌ په‌سه‌ندکراوه‌کانی یه‌که‌مین کۆنگره‌ی دامه‌زراندنی
ته‌ڤگه‌ری ئازادی کۆمه‌ڵگای کوردستان"ته‌قگه‌ری ئازادی"


چه‌ند هه‌واڵكی تر

‌په‌یماننامه‌ی ته‌ڤگه‌ری ئازادیی...

‌ئەنجومەنی گەرمیانی تەڤگەری ئازادیی پرۆژە و پێشنیاری خۆی بۆ ساڵی داهاتو...

‌تێدەکۆشین بەڕۆحییەتی ئەو رۆژانەی کە راپەرینی پێنجی ئازاری تێدا سەرکەوت...

‌17 ی شوبات قۆناغێکی مێژوویی بوو له‌ خه‌باتی جه‌ماوه‌ریی هه‌رێمی كوردست...

‌به‌ڕۆحى به‌رخودانى ئیمراڵى و عه‌فرین پلانگێری نێوده‌وڵەتى 15ی شوبات پو...

‌هه‌ڵوێستی ته‌ڤگه‌ری ئازادیی بۆ ڕه‌وشی هه‌رێمی كوردستان...

‌پرۆژه‌ پێشنیاری په‌سه‌ندکراوی یه‌که‌مین کۆنفرانسی هه‌رێمی گه‌رمیانی ته...

‌پرۆژه‌ پێشنیاری په‌سه‌ندکراوی یه‌که‌مین کۆنفرانسی هه‌رێمی گه‌رمیانی ته...

‌پڕۆژه‌‌ په‌‌سنه‌‌د کراوی یه‌که‌مین کۆنفرانسی هەرێمی کەرکوک...

‌په‌یره‌وى ناوخۆى په‌سه‌ندکراوى یه‌که‌مین کۆنفرانسى هه‌رێمى سلێمانى...

‌په‌یڕه‌وی ناوخۆی ئه‌نجومه‌نی هه‌رێمی راپه‌ڕین...

‌په‌یماننامه‌ی ته‌ڤگه‌ری ئازادی کۆمه‌ڵگای کوردستان (ته‌ڤگه‌ری ئازادی)...

1
په‌ڕه‌یله‌ 1
ژماره‌ی بابه‌ت

كه‌ش و هه‌وا

فەیسبووك