کوردی           عربی
سەردار ستار

بۆ یادی 19 ساڵەی شەهیدی سەركردە كاوە عەلی ناسراو بە دكتۆر سیروان‌

پێش 19 ساڵ لەناو گەرمەی شەڕی ناوخۆ لە رۆژی 4ی 10ی 1996 هەڤاڵ دكتۆر سیروان لەگەڵ چوار لەهەڤاڵانی لە گوندی قەمچوخەی دەڤەری قەڵا سێوكەی ناوچەی ئاخجەلەر زۆر بەنامەردانە و بەناحەق شەهیدكران. راستە دوای مانگێك لە خیانەتی 31ی ئاب رووداوی شەهیدبوونی هەڤاڵ د.سیروان و هەڤاڵانی بوو، بەڵام بكەرانی رووداوەكە سەرەڕای ئەوەی دەزانن ئەو گروپە كێن و هەڤاڵ د.سیروانیش ئەچێتە لایان و خۆی ئەناسێنێ، هەمانكات ئەزانن كە ئەو هەڤاڵانە بەبۆنەی هەبوونی پرسەی كەسێكی خەڵكی قەڵاچوخەی شێخ كەریم چوونەتە ئەو دێ یە بەنوێژی نیوەڕۆ ئەو پۆلە هەڤاڵە شەهید دەكەن. لەگەڵ ئەوەی جارێكیتر سەری رێز و نەوازش بۆ شەهید دكتۆر سیروان و هەڤاڵانی دادەنوێنین، هەمانكات نەفرەت و شەرمەزاریش بۆ بكەرانی ئەو رووداوە خیانەتكار و نامەردانەیەش دەنێرین.
د.سیروان ناوێك كە زۆر كەس ئاشنایەتی لەگەڵ هەیە و بەتایبەت هەموو ئەو كەسانەی كە ساڵانی نۆوەت خەریكی تێكۆشانی سیاسی و شۆڕشگێڕ و هەمانكات راگەیاندكار و رۆژنامەنوسی و نووسین بەبێ، ئەوا بێگومان د.سیروانی ناسیوە. هەڤاڵ دكتۆر لەگەڵ ئەوەی لە چەند بوارێك لێهاتووی دیاربوو، هەمانكات كۆڕو كۆبوونەوەی جەماوەری و شۆڕبوونەوە بۆ ناو ناخی خەڵكی زەحمەتكێش و نەتەوەیی و تێكۆشەر، لەسەرووی هەمووشیان گەریلایەكی نەبەرد و كوڕێكی دلێر و خاكی بوو.
بێگومان زۆرجار و زۆركەس لەساڵ یادی ئەو پۆلە شەهیدە قسەی كردوەو نوسینی لەسەر نوسراوە، چونكە بەڕاستی ئەو رووداوە نامەردانە و خائینانەیە بەرامبەر مرۆڤێك كە باوەڕ بەكەسێك دێنێ و دەڵێ كوردم و هاوزمانتم و خۆی رادەستدەكا، تاكو شەڕ لە نێوان براكان روونەدات، بەڵام زۆر بەداخەوە شەهید د.سیروان دووجار بەدەستی بەناو برا لێی دەدەرێت، یەكیان لەپایزی ساڵی 1992 لە دەڤەری حفتانین و بەسەختی بریندار دەبێ و دواتر تووشی كەم ئەندامی دەبێ، جاری دووەمیش هەر بەدەستی هەمان گرووپ و تاقم دیسان بەدەستی بەناو برا بەنامەردی شەهید دەبێ.
شەهید د.سیروان لە ئەورپا دووبارە دەستی بەخەباتی شۆرشگێڕی كردەوەو بەرەو وڵات گەڕایەوە، بەڵام كاروانەكەی لای رێبەر ئاپۆ ناوبەرێكی پەروەردەی ئەكادیمیایی مەعسوم قۆرقمازی داو، شەش مانگ لای رێبەر توێشوەكەی پڕكرد و یەكەم وێستگەشی چەكی شەرەفی گەریلایەتی كردە شان و ئەو مەرامەی بەدیهات كە لەساڵانی هەشتا ئێران و تورانی بۆ دەگەڕا. ناوی دكتۆریش رێبەر ئاپۆ بۆ هەڤاڵ سیروانی دانا وەك رەخنەیەك بۆ سیاسەتمەدارانی باشور، رێبەر ئاپۆ گوتبووی "چیە ئەو هەموو سیاسەتمەدارانی باشور پاشناویان دكتۆرە، تۆش لەم ڕۆ بەدواوە با دكتۆر سیروانی ئێمە بیت". هەڤاڵ سیروانیش قسەی رێبەر ئاپۆ ناشكێنێ و بۆیە پاشناوی دكتۆر هەڵەگرێ، ئەگەرنا هەڤاڵ سیروان بەشی پزیشكی نەخوێندوە.
بەهۆی برینداربوونی بەسەختی، بۆیە گۆڕەپانی گەریلایەتی بەجێدێڵێ و خۆی تەرخان دەكات بۆ خەباتی سیاسی و راگەیاندنی، بۆیە لە هەریەك لە گۆڤاری دەنگی سەرخۆبوون و رۆژنامەی وڵات بەچالاكی كاردەكات، بابەت و وتاریش بۆ هەموو ئۆرگانەكانی رێكخستن ئەنێرێ. لەخەباتی سیاسیدا لەگەڵ ئەوەی ئەندامی دامەزرێنەری پارتی ئازادی كوردستان"پاك"و یەكێتی نەتەوەی دیموكراتی كوردستان"ی ن د ك"یە، هەروەها یەكەم سكرتێری یەكێتی نەتەوەی دیموكراتی كوردستانیش بوو.
من خۆم هەڤاڵ دكتۆرم لە كۆتای ساڵی 1993 و سەرەتای ساڵی 1994 لە كامپی زەڵێ لە گوندی توژەڵەم بینی، بەبۆنەی خولێكی پەروەردەی ئێمە كۆمەڵێك هەڤاڵی شاربووین چووبووین بۆ ئەوێ، یادیان بەخێر هەڤاڵان ئارام شەقڵاوەیی و مامۆستا یاساشمان لەگەڵ دابوو، هەڤاڵ دكتۆر وانەیەكی پێداین بەناوی "ئەركەكانمان لە خەباتی جەماوەریدا"، كۆتا جاریشم لە 1ی ئەیلولی 1996 لەچیای گارەم بینی ئەو كاتەی ئێمە لەگەڵ پۆڵێك لەهەڤاڵان بەرەو گۆڕەپارنی رێبەرایەتی دەڕۆویشتین بۆ بینینی پەروەردە. ئەمە دوا دیدارم بوو لەگەڵ هەڤاڵ دكتۆر سیروان، رۆژی 5ی 10ی 1996 رێبەر ئاپۆ هات و هەواڵی شەهیدبوونی هەڤاڵ دكتۆر سیروانی پێڕاگەیاندین، گووتی" دكتۆر سیروان بۆ ئێمە وەك شەهید حەقی قەرار بەهادارە، چونكە شەو رۆژ لەناو خەباتی بێ وچاندابوو، ئێمە وەك چۆن پەیمانی سەركەوتنمان بە شەهید حەقی داوە، هەمان پەیمان بە هەڤاڵ دكتۆر سیروانیش دەدەین".
بێگومان ئەو تێكۆشانەی شەهید دكتۆر سیروان و هەڤاڵانی دەستی پێكرد ئێستا بەشێك لەخەونەكانی لە رۆژئاوا و بەشێكی لە باكور و بەشێكی لە رۆژهەڵات و بەشێكیشی لە باشوری كوردستان جێبەجێ بووە، واتا بڵندبوونی رۆحی یەكێتی نەتەوەیی و خۆبەڕێوەبردنی گەل و بەهێزبوونی هێزی پاراستنی گەل و هەموو ئەو دەستكەوتانەی شۆڕش بەجێهێنانی ئامانجی شەهیدانە، بێگومان تەنها بە كوردستانێكی ئازاد و خۆبەڕێوەبەری دیموكراتیانە دەتوانرێ قەرزی شەهیدان بدرێتەوەو پەیامەكانیان بگاتە ئەنجام.


كه‌ش و هه‌وا

فەیسبووك