کوردی           عربی
مه‌حمود عه‌بدوڵڵا

کۆمەڵگەی باشور کۆمەڵگەیەکی تەسلیم بووە‌

 

 

کۆمەڵگەی ئێمە ئاوس بووە  بە کۆمەڵێک قەیران و هەر ڕۆژ ە قەیرانێک لەدایک دەبێت ،کە سەر چاوەی سەرجەم قەیرانەکان زهنییەتە ،بەبێ گۆڕینی زهنیەت ناگەین بە سپێدەیەکی باشتر،بەڵکو ڕۆژ بەڕۆژ لە داڕوخان نزیک دەبینەوە.

بەجۆرێک کە کارلێک و نمونە کۆمەڵایەتییەکان بونیان نامێنێت و کۆمەڵگە نوقمی نائارامی و بێچارەیی دەبێت.

 هەم زهنیەتی گروپی دەسەڵاتدار،هەم زهنیەتی کۆمەڵگا، زهنیه تێکن دورن لە وەی کە مرۆڤ بتوانێت ئۆمێدیان لەسەر هەڵچنێت، لەلایەک گروپی دەسەڵاتدار تێڕوانینیان بەرامبەر بەکۆمەڵگە خێڵەکیانە و دیکتاتۆرانە ونادیموکراتیانەیە ،لەلایەکیترەوە تێڕوانینی کۆمەڵگا بۆدەسەڵات ناعەقڵانی و ناهۆشیارانەیە، خراپترین بۆچونی کۆمەڵگە سەبارەت بەدەسەڵات ئەوەیە کە مادام دەسەڵات دەسەڵاتی کوردییە دەبێت بەرگری لێبکرێت و لەهەمو حاڵەتێکدا لەدەسەڵاتی داگیرکەر باشتره!بێگومان ئەم تێگەیشتنە زۆر ساویلکانەیە: چونکە زۆر لەکۆمەڵگەکان لەبەرامبەر دەسەڵاتی بیانیدا توانای یەکگرتن و شۆڕشیان  زۆرترە و لەبەرامبەر دەسەڵاتە خۆماڵیەکاندا بێچارەن. ئەوەی کە دەسەڵاتی کوردی توانیویەتی بەرامبەر کۆمەڵگە ئەنجامی بدات هیچ داگیر کەرێک نەیتوانیوە ئەنجامی بدات،لەهەموو سەردەمێکدا لەناوکۆمەڵگەی کۆردستاندا ڕۆحی هاوکاری و یاخیبون زیاتربووە، لەبەرامبەر ستەمکاریدا . ئەوەی ئەمڕۆ دەیبینین بێباکییەکە بڵاو بۆتەوە لەناو کۆمەڵگەدا، بێباکییەک کە بە تەواوی مانا تەسلیمبونە لە بەرامبەر گروپێکی دەسەڵاتدار کە "لەمێژودا بە بێ کەسێتی "ناودەبرێن،گروپێک کە کاریان  شکاندنی شکۆی انسان و بێڕێزی کردنە  بە خواست و ئامانج و خەونەکانی ئینسان . گروپێک کە "دەبو قاچی کۆمەڵگەبن، بەڵام لەسەری کۆمەڵگە سەریان هێناوەتەدەر"  لەبەر ئەوە مەرجی سەرکەوتنمان بەندە بە گۆڕینی ئەم تێڕوانینە بۆدەسەڵات،دەبێت وا لەهەر دەسەڵاتێکی ستەمکار بڕوانین کە بێگانەیە بەکۆمەڵگا.

دەتوانین بە کورتی ئاماژە بە و شکست و تەسلیمبونەی کۆمەڵگەی کوردی بکەین لەبەرامبەر دەسەڵاتێکدا، کە لەهەموو ڕویەکەوە ڕوبەڕوی شکست بۆتەوە!بڕواناکەم هیچ کۆمەڵگەیەک هەبێت هێندەی کۆمەڵگەی ئێمە کورت بین و ناچالاک بێت ،لەکاتێکدا ئەودەسەڵاتەی حوکمی دەکات هیچ ڕەوایەتییەکی نەماوە، ئەم بێت و بەڵێن و موژدەی ژیانێکی باشتری پێبدات،دەسەڵاتێک کە ڕزیوە، کەچی هێشتا دەتوانێت  وەک ڤایرۆسێک لە سەر جەستەی کۆمەڵگا بژیت .بەڵام وەک ئۆجەلان دەڵێت:"تەنانەت پێگەیشتوترین میوەش پێویستی بەوەیە یەکێک لێی بکاتەوە." هەر چەندە ئەم گروپە دەسەڵاتدارە افلاسیانکرد لە چۆنیەتی بەڕێوەبردنی وڵاتدا ،بەڵام بەهۆی نەبونی  خەونی گەورە و نەبونی بەهایەکی هاو بەش ،هەروەها بەهۆی نە بونی دنیابینی و پارادیمێک بۆژیان و نەبونی کارلێکی کۆمەڵایەتی  جارێکیتر کۆمەڵگەی ئێمە چاوەڕوانە ئەم تاقمە سیاسیە ڕزگاریبکات، بەڕاستی ئەمە شکستی کۆمەڵگەیە تەسلیمبونە بەگروپێکی دەسەڵات دار کە دورە لەوەی بتوانرێت پێی بوترێت دەسەڵات.لە ئەنجامی ئەم فۆرمە لەسیاسەت وردە وردە ئینتیما بۆ کۆمەڵگە لاواز دەبێت و،کاتێک ئینتیماش لاوازدەبێت کۆمەڵگە لەنائارامیدا دەژیت و لەگەڵ مەترسی لەناوچون ڕوبەڕوو دەبێت. 

بێگومان بەدرێژایی بیست و شەش ساڵی ڕابردوو دەسەڵاتی کوردی کاری لەسەر  لاوازکردنی کۆمەڵگە کردووە لەبەرامبەر خۆیدا. ئەم دەسەڵاتە بێڕەحمانە کاری لەسەر دابەشکردن، بەحیزبیکردن، نە هێشتنی ئینتیمای کۆمەڵایەتی،بێمتمانەیی و بێ ئیرادەیی  کۆمەڵگا کردووە. دەیان ڕێکخراو ی پاشکۆیان خزاندۆتە گۆڕەپانی چالاکی مەدەنییەوە،کە بەناوی ڕێکخراوی مەدەنی وپیشەییەوە چالاکی دەکەن ،بەڵام لە ڕاستیدا زۆرینەیان لە کاتی پێویستدا دەبن بەدەمڕاستی ئەم دەسەڵاتە فاشیلە، دیارترین نمونەش یەکێتی مامۆستایانە  ،ئەمڕیکخراوەو هاوشێوەکانیان لەمپەرن لەبەردەم کۆمەڵی مەدەنی و پەرەسەندن و گەشەکردنی کۆمەڵگەدا. دەسەڵاتێک گاڵتە بەخواست و داوکاری پەروەردەکاران بکات دەسەڵاتێکە هیچ پەیامێکی بۆئایندە پێنییە،دەسەڵاتێکە زەمینە بۆستەمکارییەکی گەورەتردەکات و بەتەمایە ئایندەش وەک ئێستای کۆمەڵگە وێران بکات و هیچ باکی بە پەروەردەکردنی نەوەکانی داهاتوش نییە.

چەند وتارێکی تر

كه‌ش و هه‌وا

فەیسبووك