کوردی           عربی
تاكۆر زه‌رده‌شتی

تاڵ یان شیرین‌




تاڵ یان شیرین ئه‌مه‌یە، مانیفستۆی ڕاسته‌قینه‌ی‌ چه‌مکی‌ نامرۆڤایه‌تی‌ و خیانه‌ت به‌رامبه‌ر شه‌ڕی‌ مرۆڤایه‌تی‌ و نیشتمانی‌

سیسته‌می‌ حکومه‌تی‌ کوردی‌ که‌ ده‌یان ساڵه‌ بڕیاره‌کانی‌ له‌ ژێر ئاڵا و سیسته‌می‌ ده‌سه‌ڵاتی‌ تورکی‌ فاشیست ده‌گێڕێت دۆخێکی هێناوه‌ته‌ ئاراوه‌ که‌ ڕه‌نگدانه‌وه‌ی‌ وشه‌ی‌ خیانه‌ت قه‌ت دیمه‌نی‌ چه‌په‌ڵ و ناشیرینی‌ جارانی‌ له‌ مێشکی‌ کۆمەڵگەی‌ باشوور به‌تایبه‌ت بادیناندا نه‌ماوه‌.
به‌رهه‌مێکی‌ به‌دیهێناوه‌ که‌ دوای‌ نزیک له‌ سێ ده‌یه‌ ساڵان ئه‌مه‌یه‌: 
له‌ناوبردنی‌ بڕوا و به‌ستنی‌ کۆمەڵگەی‌ باشوور به‌تایبه‌ت بادینان به‌ خۆیه‌وه‌، ئه‌مه‌ له‌کاتێکه‌ که‌ بۆ خۆشی له‌ژێر باسک و باڵی‌ ئیراده‌ی‌ دوژمنانه‌وه‌ قه‌ت ئیراده‌یه‌کی‌ سه‌ربه‌خوی‌ نه‌بووه‌ و نیه‌، بێ واتاکردنی‌ ڕاستیه‌کان به‌ ڕاگه‌یاندنێک که‌ ته‌نیا کار و خه‌باتی‌ له‌ پێناو شاردنه‌وه‌ی‌ ڕاستیه‌کان بووه‌، خولقاندنی‌ تڕس به‌ڕه‌نگێکی‌ به‌رفراوان له‌ دڵی‌ هه‌ر تاکێکی‌ کومه‌ڵگا بگره‌ له‌ نوسەر و ئه‌دیب، مامۆستای‌ ئایینی‌، مامۆستای‌ په‌روه‌رده‌یی‌ و ڕۆژنامه‌وانان. به‌شیوازی‌ کوشتن،   ڕه‌شه‌کوژکردن، تیرۆری‌ ده‌یان و سه‌دان مامۆستای‌ ئایینی‌ و ئه‌دیب و سیاسه‌تمه‌دار و ڕۆژنامه‌وان له‌ ماوه‌ی‌ ته‌واوی‌ مێژووی‌ سه‌روه‌ری‌ خۆی‌، که‌ بووه‌ به‌ هۆی‌ ئه‌مه‌ که‌ کۆمه‌لگای‌ سڤیل و سیاسی‌ و ڕۆناکبیری‌ و هونه‌ری‌ و په‌روه‌رده‌یی‌ له‌ به‌رامبه‌ر وتنی‌ ڕاستیه‌کان خۆیان بپارێزن.
 بوو به‌ هۆی‌ ئه‌وەی که‌ مرۆڤە بی ویژدانه‌کان و درۆیین و به‌رژه‌وه‌ندیپه‌رست و کۆله‌سیفه‌ت ببنه‌ خاون پله‌ و پایه‌ و ئیداره‌ و په‌روه‌رده‌ و ئه‌رکداری‌ ئایینی‌، که‌ نه‌ک ته‌نیا ڕاستیه‌کان ناخه‌نه‌ بەر‌چاوی‌ ڕای‌ گشتی‌، به‌ڵکو به‌ هه‌موو شیوازێک پێچه‌وانه‌ی‌ ڕاستیه‌کانی‌ سه‌ر به‌ وژدانی‌ مرۆڤایه‌تی‌ و کوردایه‌تی‌ و ئایینی‌، ته‌نیا به‌رژه‌وه‌ندی‌ خۆیان ده‌پارێزن و بووه‌ به‌ هۆی‌ ئه‌وەی که‌ کۆمه‌لگا به‌ره‌و چاره‌نوسی‌ هه‌رێمێکی‌ بێ وژدان، بی دادوه‌ری‌، درۆیین، بێ ئیراده‌، نه‌خولقکار، بێ هه‌ڵوێست و نه‌خوێنده‌واری‌ ڕه‌وشتی‌، نه‌خوێنده‌واری‌ هونه‌ری‌، نه‌خوێنده‌واری‌ سیاسی‌، نه‌خوێنده‌واری‌ ئه‌ده‌بی‌، و کوردایه‌تی‌ بڕوات. 
له‌ کۆمەڵگەیه‌کی‌ به‌م شێوه‌یه‌ دا به‌ سپۆنسه‌ری‌ گەلان، مافیاکانی‌ کوردی‌ ڕانتچی‌ و دز، ده‌ره‌نجام بوو به‌ ئه‌وه‌ی‌ که‌ خیانه‌ت کردن ئه‌وها ئاسایی‌ ببینرێت که‌ توانایی‌ جه‌بهه‌دانانی‌ هه‌بێت و له‌شکه‌ری‌ هه‌بێت و هه‌ڵگری‌ ناوه‌کانی‌ گه‌له‌ری‌ و نه‌ته‌وه‌یی‌ بێت، که‌ به‌م هۆیه‌شه‌وه‌ توانی‌ له‌لایه‌ن پیسترین و دڕنده‌ترین دوژمنی‌ گه‌لی‌ کورد هێز و پشتگیری‌ ده‌یان ساڵان بۆ دژایه‌تی‌ کردنی‌ تاکه‌ هێزی‌ ڕاسته‌قینه‌ی‌ گه‌لی‌ کورد به‌ده‌ست بێنێت. 
شێواز و چه‌مکی‌ سیاسی‌ ده‌سه‌ڵاتدارانی‌ هه‌رێم دۆخێکیان هێنایە ئاراوه‌ که‌ چیتر خیانه‌ت و بێ هه‌لوێستی‌ به‌رامبه‌ر نرخه‌کانی‌ نه‌ته‌وه‌یی‌ هیچ شه‌رمێک به‌خووه‌وه‌ نه‌گرێت و به‌ڕه‌وایه‌تی‌ له‌سه‌ر ناو و نرخ و به‌هاکانی‌ کورد و له‌ناو خاکی‌ کورد کارێک بکه‌ن که‌ به‌ ساڵان دوژمن نه‌یتوانێت بیکات.
ڕه‌وایه‌تی‌ به‌ فرۆشتنی‌ به‌ها و سه‌رمایه‌کانی‌ گه‌له‌ری‌ و سروشتی‌ درا، ڕه‌وایه‌تی‌ به‌ چۆڵکردنی‌ چه‌په‌ره‌کانی‌ به‌رگری‌ له‌ شه‌ڕه‌ف درا و ژن و منداڵی‌ کورد ڕاده‌ستی‌ دوژمنان کرا به‌بێ هیچ شه‌رمێک، به‌ڕه‌وایه‌تی‌ سه‌رمایه‌ و ده‌سکه‌وته‌کانی‌ نه‌ته‌وه‌یی‌ کورد له‌پێناو به‌رژه‌وه‌ندی‌ تاک به‌کار هێنرا، به‌جاران گوله‌ له‌ سنگی‌ گه‌نجانی‌ شۆڕمه‌ند و نه‌ته‌وه‌یی‌ کورد وه‌شێنرا، ئه‌زموونه‌کان و به‌رهه‌مه‌کانی‌ که‌ به‌خوێنی‌ سه‌دان ساڵان به‌ده‌ست هاتبوون به‌بێ هیچ شه‌رمێک له‌ده‌ست دران، پشتگیری‌ کردن له‌ دڕنده‌ترین و پیسترین و نه‌جوامێرترین و دێرین ترین دوژمنی‌ ڕه‌سه‌نایه‌تی‌ کورد و هه‌بوونی‌ ناوی‌ کورد که‌ تورکی‌ فاشیست و ئه‌ردۆغانه‌ یه‌کێک له‌ دیمه‌نه‌کانی‌ هه‌ره‌ ڕه‌شی‌ خیانه‌تی‌ مێژووی‌ کورده‌ که‌ له‌ ناو مێشکی‌ کومه‌ڵکا جێگیر کرا و ڕه‌وایه‌تی‌ پێدرا.
ڕه‌وایه‌تی‌ به‌ شه‌ڕ له‌به‌رامبه‌ر ئه‌و هێزه‌ درا که‌ تاکه‌ هیوا و ئومێدی‌ هه‌ر چوار لای کوردستان بوون و تاکه‌ که‌له‌می‌ ناو چاوانی‌ دوژمنانه‌، تاکه‌ هێزێک که له‌بۆ‌ دوژمنان بووه‌ به‌ جێگای‌ ترس و خۆفێکی‌ گه‌وره‌، که‌ هه‌ر له‌م پێناوه‌شدا ڕێگه‌یان دا به‌ دروستبوونی‌ گرووپ و حزب و ده‌سه‌ڵات و هێزی‌ بچووکی‌ کوردی‌ به‌مه‌رجی‌ له‌ناو بردن و دژایه‌تی‌ به‌رامبه‌ر ئه‌م ئیراده‌یه‌ گه‌وره‌یه‌. 
له‌ ترسی‌ ئه‌م ئیراده‌یه‌ چه‌ته‌کان ئاوا و گه‌وره‌ بوون که‌ بینیمان گه‌یشتنه‌ ئاستی‌ به‌رپاکردنی‌ ڕێفرادۆمی‌ سه‌ربه‌خۆیی‌ که‌ به‌ له‌ناوچوونی‌ هه‌موو شت کوتاییان پێ هات.
هه‌موو کوردێک له‌ بادینان به‌چاوی‌ خۆیان  ئه‌م حه‌قیقه‌تانه‌ ده‌بینن، به‌ڵام ڕێگایه‌ک جیا له‌ ڕاکردن به‌رده‌م ئه‌م حه‌قیقه‌تانه‌ نادۆزنه‌وه‌، چونکه‌ پێشتر له‌ماوه‌ی‌ نێزیک له‌ ئه‌م سێ ده‌هه‌ ساڵه‌ کار له‌سه‌ر ئه‌مه‌ کراوه‌ و ئیراده‌ و سیاسه‌تی‌ سروشتی‌ کۆمه‌لگەیان نه‌هێشتووه‌. 
ڕێگایه‌ک جیا له‌ خۆسووتاندن، خوه‌کوژی‌، نه‌خۆشی‌ ده‌روونی‌ و جه‌ڵته‌ و ڕاکردن به‌ر به‌ خنکانی‌ ڕێگای‌ جیهانی‌ ده‌ره‌وه‌ی‌ ڕۆژهه‌لاتی‌ ناوین، و دیسان پله‌ په‌رستانی‌ به‌رژه‌وه‌ندی‌ په‌رست و ئۆپۆرتونیست و نه‌خۆشی‌ ده‌رۆنی‌ که‌ چیتر که‌مینه‌ن له‌سه‌ر ئاستی‌ باشوور، واز له‌م بێ شه‌رمیه‌ی‌ خۆیان نه‌هێناوه‌ و به‌رده‌وامی‌ ده‌ده‌نه‌ هه‌مان ڕێباز که‌ جیا له‌ شه‌رمه‌زاری‌ و نه‌هامه‌تی‌ و وێرانی‌ هیچ به‌رهه‌مێکی‌ تری‌ نابێت.

ئه‌وان به‌ ده‌یان ساڵ ڕێی‌ گه‌لی‌ بادینانیان به‌ره‌و لایه‌ک به‌ڕێکرد که‌ کۆمەڵگە خۆی‌ دوور بگرێت له‌ زانستی‌ سیاسی‌، چه‌مکی‌ کلتوری‌ نه‌ته‌وه‌یی‌ و یێکگرتن و خوڵقکاری‌، لایان وه‌رگێڕا به‌ر به‌ چه‌مکی‌ کۆیله‌تی‌، ترس، بێ ئیراده‌بوون،  گرێدران به‌ کلتوور و نه‌ریتی‌ بێگانه‌ و ڕه‌وا بینینی‌ خیانه‌ت، نه‌یان هێشت ڕێگای‌ ڕاسته‌قینه‌ی‌ خزمه‌ت به‌ گه‌ل و مێژووی‌ نه‌ته‌وه‌ی‌ کورد و ڕێز و حورمه‌ت به‌رامبه‌ر خوێنی‌ شه‌هیدان ڕێگای‌ خۆی‌ بدۆزێته‌وه‌، پسکۆلۆجی‌ و زیهنیه‌تی‌ گه‌لی‌ بادینانیان به‌ر به‌ لاڕێ برا و پێچه‌وانه‌ی‌ ئه‌وه‌ی‌ پێویست له‌ باوریاندا به‌جێ کرا. 

به‌ساڵان ده‌ستی‌ برایه‌تی‌ و هه‌ڤاڵێتی و هاودڵی‌ و هاوپه‌یمانی‌ و هاوسه‌نگه‌ری‌ به‌ پیسترین فاشیستی‌ سه‌رده‌م که‌ تورکی‌ دوژمنی‌ پله‌ی‌ یه‌که‌م و داگیرکه‌ری‌ دێرینی‌ کلتور و زمان و نه‌ته‌وه‌ و مێژوو و ڕه‌گ و ڕیشالی‌ گه‌لی‌ کورده‌ درا. 

حه‌تا بچووکترین دیمه‌نی‌ ئه‌م خیانه‌ته‌ گه‌ر له‌ چوارچێوه‌ی‌  ده‌ست له‌ناو ده‌ستی‌ تورک دا ببینرێت که‌ به‌ پێکه‌نینه‌وه‌ له‌به‌رچاوی‌ ڕای‌ گشتی‌ به‌ساڵانه‌ نمایش ده‌کرێت، گه‌وره‌ترین ده‌ربه‌ له‌ په‌یکه‌ری‌ نه‌ته‌وه‌ی‌ کورد دراوه‌. چونکه‌ ده‌رکه‌وتنی‌ دیمه‌نی‌ سەرکرده‌کانی‌ باشوور شان به‌شانی‌ سه‌رکرده‌کانی‌ تورکی‌ فاشیست له‌به‌ر چاوی‌ ڕای‌ گشتی‌ جیهانی‌ ڕه‌وایه‌تی‌ ده‌درا به‌ هێرشی‌ درندانه‌ بۆ سه‌ر گه‌لی‌ کورد به‌ شیوه‌یه‌کی‌ توندتر و دژوارتر و ڕه‌واتر، که‌ ئه‌م  لاپه‌ڕە ڕه‌شانە هه‌رگیز له‌ مێژوو ناسڕێنه‌وه‌.
له‌م چوارچێوه‌یه‌ش دا ده‌سه‌ڵاتی‌ شکستخواردووی‌ باشوور به‌پێی‌ سیاسه‌ت و ئابوری‌ و به‌رێوه‌به‌رایەتی‌ چه‌وتی‌ ڕابردوو پشتگیری‌ نه‌ته‌وه‌یی‌ گه‌لی‌ باشووری‌ یه‌کجار له‌ده‌ست داوه‌ و ته‌نیا زه‌خت و زۆڕی‌ هێزه‌ ئه‌منیه‌کانیان و به‌حه‌شاردانی‌ ئه‌و هه‌موو هێز و بنکه‌ و سوپای‌ سه‌ربازی‌ و سیخوری‌ تورکی‌ داگیرکه‌ر له‌ناو بادینان چیتر وه‌کو داگیرکه‌رێک له‌ باشوور ده‌بینرێت و نه‌ک وه‌کو هێزیکی‌ کوردی‌، که‌ نه‌ک ته‌نیا له‌خزمه‌تی‌ نه‌ته‌وه‌ی‌ کورد دا نیه‌ به‌ڵکو به‌ ملکه‌چی‌ خزمه‌تی‌ هێزی‌ داگیرکه‌ری‌ تورک زیاتر ئه‌زموون و به‌رژه‌وه‌ندیه‌کانی‌ گه‌لی‌ کورد ڕووبه‌ڕووی‌ کوسپ و مه‌ترسی‌ و تێکچوون ده‌کات، که‌چی‌ بۆ هه‌ر که‌سێک سه‌لمێنرا که‌ ده‌وله‌تی‌ تورک ده‌سه‌ڵاتدارانی‌ باشوور سه‌ره‌ڕای‌ هه‌موو نیه‌تە پاکەکانیان به‌رامبه‌ر به‌ تورک، هه‌رگیز وه‌کو دۆست هاوپه‌یمان نه‌یانبینیوه‌ و ئه‌وانیان وه‌کو خزمه‌تکارێک بۆ پێکهێنانی ئامانجه‌ چه‌په‌ڵه‌کانی‌ خۆیان که‌ له‌ناوبردنی‌ به‌ته‌واوه‌تی‌ گه‌لی‌ کورده‌ به‌کاریان هێناون و نه‌ک چیتر.
به‌ڵام بێگومان ته‌ڤگه‌ری‌ گه‌لی‌ کورد به‌سه‌رده‌که‌وێت و دوژمن و خایینان و ملکه‌چانی‌ دوژمن له‌ناوده‌چن و له‌ ئاینده‌یه‌کی‌ نزیکدا له‌ناو لاپه‌ڕه‌ ڕه‌شه‌کانی‌ مێژووی‌ خیانه‌تی‌ کورد وه‌کو ڕه‌شترین لاپه‌ڕه‌ جێگیر ده‌بێت.
له‌وانه‌یه‌ له‌چوارچێوه‌ی‌ حزبایه‌تی‌ و سیاسی‌ ڕه‌وایه‌تی‌ به‌ ڕه‌هه‌ند و شێوازی‌ جیای‌ پراکتیکی‌ سیاسه‌ت بدرێت، به‌ڵام بۆ هێرشه‌کانی‌ داگیرکارانه‌ی‌ دوژمن بۆ سه‌ر ده‌ڤه‌ره‌کانی‌ ئارامی‌ خوسه‌ری‌ کورد نشین ئه‌ویش به‌شێوه‌یه‌کی‌ دڕندانه‌ و ده‌ره‌وه‌ی‌ یاساکانی‌ مرۆڤایه‌تی‌ له‌سه‌ر ئاستی‌ هه‌رچوار پارچه‌ی‌ کوردستان هه‌رگیز بێده‌نگی‌ له‌ هه‌ر له‌یه‌نێکی‌ کوردی‌ له‌سه‌ر ئه‌مه‌ قه‌بوڵ ناکرێت و وه‌کو هاوده‌نگی‌ له‌گه‌ل دوژمن پێناسه‌ ده‌کرێت و ده‌چێته‌ قالبی‌ خیانه‌تی‌ ئاشکرای‌ نه‌ته‌وه‌یی‌ و عه‌فووش نابێت، به‌تایبه‌ت ڕۆژه‌ڤی‌ عه‌فرین جێگای‌ باسه‌ که‌ ده‌نگ و هه‌لوێستێکی‌ ئه‌رێنیانه‌ له‌لایه‌ن پارتی‌ ده‌سه‌ڵاتداری‌ باشوور که‌ به‌ناو دیموکراتی‌ و کوردستانیه‌ ده‌ناکه‌وێت.
له‌ چوارچێوه‌ی‌ دیمه‌نی‌ ئه‌مڕۆی‌ عه‌فرین پێویسته‌ هه‌ر شتێک به‌ئاشکرا و به‌ ڕۆناکی‌ ببینرێت، له‌کاتێک که‌ وه‌ک جاران له‌ مێژووی‌ کورد دا به‌ناوی‌ ئایه‌تی‌ قورئان، کورد ئه‌نفال کرا ئه‌مڕۆش هیچ جیاوازیه‌کی‌ نیه‌، ئایینداران له‌سه‌ر ئاستێکی‌ جیهانی‌ دژ به‌ کورد که‌وتونه‌ سه‌ر پێ که‌ به‌داخه‌وه‌ ڕووبه‌ڕووی‌ بێ هه‌لوێستی‌ مه‌ڵاکان و ئاییندارانی‌ کورد له‌ باشوور ده‌بێت، به‌بێ ئه‌وه‌ی‌ مسقاڵێکی‌ شه‌رم و حه‌یایه‌کی‌ خودایی‌ و مرۆڤایه‌تیان هه‌بێت، بێ ده‌نگن و به‌رامبه‌ر ته‌نانه‌ت ئایینه‌که‌یان بانگه‌شه‌یه‌کیان نیه که‌ چۆن به‌کار دێت بۆ له‌ناوبردنی‌ مه‌زڵومترین و پاکترین نه‌ته‌وه‌ی‌ سه‌ر زه‌وی‌، له‌مه‌ خراپتر هیچ دادگایه‌ک به‌ نوێنه‌رایه‌تی‌ نه‌ته‌وه‌ی‌ کورد نه‌بێت که‌ ئه‌مانه‌ ڕاکێشی‌ دادگا بکرێن.
عه‌فرین ئه‌مرۆ گۆڕه‌پانی‌ مێژووی‌ هه‌زاران ساڵه‌ که‌ ته‌واوی‌ مێژووی‌ کورد تیا ده‌بینرێت.
عه‌فرین کوتایی‌ ئه‌نجامی‌ بوون و نه‌بوونی‌ کورده‌.
عه‌فرین بانگی‌ هاواری‌ ئه‌و کچ و ژنانه‌یه‌ که‌ له‌ مێژووی‌ هه‌زاران ساڵه‌ی‌ کورد دا تاڵان و کڕین و فرۆشتنیان پێ کراوه‌.
عه‌فرین به‌رده‌وامی‌ مێژووی‌ مه‌یدانی‌ چوارچرایه‌، دڵۆپی‌ خوێنی‌ شه‌هیدانی‌ شۆڕه‌شی‌ مه‌هاباده‌ و قازی محه‌مه‌دانی‌ سه‌رده‌من.
عه‌فرین به‌رده‌وامی‌ شه‌ڕی‌ مرۆڤایه‌تیه‌ له‌به‌رامبه‌ر ئیمپڕاتۆریه‌کانی‌ خوێنخواری‌ له‌به‌رامبه‌ر کوردان له‌ ته‌واوی‌ مێژوو.
عه‌فرین هه‌مان هەڵەبجەیە که‌ ئه‌مڕۆ به‌ ڕه‌نگێکی‌ سه‌رده‌میانه‌ له‌ گۆڕی‌ مردن سه‌ریهلداوه‌، سه‌ریهلداوه‌ له‌ مردنی‌ ده‌ستی‌ دوژمنان، مردنی‌ ده‌ستی‌ خایینان که‌ به‌ده‌یان ساڵ له‌سه‌ر ناسنامه‌ی‌ ئه‌و خواردیان و دزیان و تاڵانی‌ کردن و فرۆشتن و ده‌نگی‌ ڕاستیه‌کانی‌ ئه‌م گه‌له‌ سه‌رکوت کردن.
عه‌فرین ناسنامه‌ی‌ ئه‌و ئه‌نفالانه‌یه‌ که‌ خوێنی‌ به‌سه‌دان هه‌زاریان ئه‌مڕۆ له‌ ناوه‌ندی‌ عه‌فرین هاوار ده‌کات و ده‌ڵێت هه‌ڵسێنه‌ سه‌رپێ له‌پێناو به‌رخودانی‌ سه‌رده‌میانه‌، خوێنی‌ شه‌هیدانی‌ ئه‌و ئه‌نفاله‌یه‌ که‌ ناسنامه‌یان به‌ ده‌یان ساڵه‌ بوونه‌ به‌ یاری‌ ده‌ستی‌ هه‌ر بێوژدانێک له‌سه‌ر ناوی‌ خوێنی‌ ئه‌و شه‌هیدانه‌ و پێچه‌وانه‌ی‌ هه‌ر که‌رامه‌تێکی‌ نه‌ته‌وه‌یی‌.
تۆله‌ی‌ هه‌زاران ساڵی‌ ئه‌و خوێنمێژیه‌یه‌ که‌ له‌سه‌ر کوردان پەیڕه‌و کراوە که‌ به‌ده‌ستی‌ کچ و کوڕانی‌ گه‌لی‌ کورد ده‌سێنرێته‌وه‌.
ئه‌و ده‌نگه‌ی‌ که‌ له‌پێناوی‌ عه‌فرین له‌ هه‌ر لایه‌نێک ده‌رنه‌که‌وێته‌وه‌، ئه‌و بانگه‌ی‌ له‌پێناوی‌ به‌رز نه‌بێته‌وه‌،  ئه‌و که‌س و لایه‌نه‌ دووره‌ له‌ شه‌ڕه‌فی‌ مرۆڤایه‌تی‌ و ئه‌وجا کوردایه‌تی‌.
ئه‌و مه‌ڵایه‌ که‌ چڕکه‌ به‌ چڕکه‌ ئه‌مڕۆ هاواری‌ له‌ته‌ک ئه‌م مه‌زڵوومیه‌ته‌ نه‌بێت، ئه‌و زەندیق و مونافیق و ئه‌هریمان و نوێنه‌ری‌ نه‌فره‌ت و له‌عنه‌تی‌ کۆتایی‌ ئه‌م مێژووه‌ن.
ئه‌و سیاسه‌توانه‌ی‌ که‌ بانگی‌ له‌پێناو ڕۆنکردنه‌وه‌ی‌ ئه‌م حه‌قیقه‌ته‌ له‌به‌رامبه‌ر بێده‌نگی‌ جیهانی‌ نه‌بێت، ئه‌و نوێنه‌ری‌ فیعلی‌ دڕنده‌یی‌ ئه‌ردۆغانی‌ نه‌مرود و فرعه‌ون و هێتله‌ر و سه‌دامی‌ سه‌رده‌من.
ئه‌و نوسەر و هونه‌رمەند و هه‌لبه‌ستوانانه‌ی‌ که‌ هه‌ست و سۆزیان له‌پێناوی‌ عه‌فرین نه‌جولێت ئه‌و دره‌وین و دەهۆڵچی‌ دوژمنانه‌ و دووره‌ له‌ کوردبوون و مرۆڤ بوون.
ئه‌مه‌ بانگێکه‌ له‌ تێگه‌ و واته‌ی‌ هاوبیری‌ تاکه‌ پیاوی‌ ساخله‌می‌ سه‌رده‌م که‌ بیست ساڵه‌ له‌پێناو سه‌ر دانەنە‌واندن له‌به‌رامبه‌ر کۆلایه‌تی‌ ده‌ستی‌ نامرۆڤانه‌ترین ڕژێمی‌ سه‌رده‌م له‌ زیندانێکی‌ تاکه‌که‌سی‌ دا تاک و ته‌نیا ئه‌سیره‌.
تاڵ یان شیرین ئه‌مه‌یه‌، مانیفستۆی ڕاسته‌قینه‌ی‌ چه‌مکی‌ نامرۆڤایه‌تی‌ و خیانه‌ت به‌رامبه‌ر شه‌ڕی‌ مرۆڤایه‌تی‌ و نیشتمانی‌.













كه‌ش و هه‌وا

فەیسبووك