کوردی           عربی
ئامانج هەرتەلی

بائامانجمان پاراستنی نەتەوەبێت!!!‌



ئێمەی کورد هەمیشە بەو شتەی کەعەقڵمان پێیەوە بەنج دەکرێت هەربەوشتەش دەکوژرێین.

کاتێک تورکیای ئەکەپە بەناوی ئاین خۆی میکیاج دەکات، کۆمەڵێک کەسی بئ ئامانج و دوای دەکەون یا پاڵپشتی ستەمکاریەکانی دەکەن، بئ ئاگان لەوەی ئامانجی ئۆردۆغانی ئیسلام پەروەرو کەمال ئەتاتورکی کۆمۆنیست پەروەر یەک ئامانجە، ئامانجی هەردووکیان باڵاکردنی دەوڵەتی تورک و زاڵکردنی تورکە لەخودی تورکیادا. کۆمەڵ کوژکردن و لەناوبردنی گەلەکانی تری ناو تورکیایە بەتایبەتیش گەلی کورد. لەکاتێکدا ئۆردۆغان لەکوێ تورکێکی فاشی نەتەوەپەرست هەبێت، داکۆکی لێدەکات و پاڵپشتی دەکات گرنگ نیە ئەو تورکە خاوەنی چ ئاینێکە، بەڵکو ئەوە گرنگە ئەوەیە لەلای داکۆکی لەنەتەوەی تورک بکات. بەدرێژای زەمەن دەستەڵاتدارانی تورک لەسەر یەک ڕێچکە کاریان کردوە ئەویش گەشەپێدان و باڵاکردنیی گەلی تورکە بەسەر گەلانی ناوچەکە بەهەر نرخێک بێت.

   بۆیە لەئێستادا ئەوەی پێویستە کورد بیکات  پێش هەموو شتێک واز لەبەرژەوەندی  شەخسی و حیزبی و بیرورابهێنێت، خۆی ئامادە بکات  بەرامبەر ئەو مەترسیانەی لەئێستادا ڕووبەرووی کورد دەبنەوە، گەلی کورد لەبەردەم کۆمەڵکوژیەکی گەورەدایە. لەبەردەم لەناوچونی گەورەی پیاوێکی درندەی وەک ئۆردۆغاندایە. ئەو ئۆردۆغانەی لەهەر شوێنێک کوردێک هەبێت دژیەتی پێش هەموو کەس ئەو کوردانەی لە کۆشکەکەی خۆی پێشوازیان ڵێدەکات، بەڵام کاتێک بەرامبەر بەدووژمنی دەرەکی پێویستە یەکبگرن، ناکرێکت ئەوەش لە بیربکرێت کە دووژمنی ناوەخۆ خۆمان کەگەندەڵیە، پێش دووژمن بەرامبەر بەم دووژمنە بوەستینەوە تاوەکو بەسەردوژمندا ئاسان سەرکەوین.

    دوای ئەوەی ڕووی ڕاستی هەموو ئەوانە کە خۆیان بە دۆست و لە لێدوانەکانیاندا پاڵپشتی گەلی  کوردیان دەکرد دەرکەوت بە تایبەتی ئەمریکاو رووسیا. کورد تەنها بۆ پاراستنی بەرژەوەندیەکانی خۆیان ویستویانە.  ئەگەر هیچ کاتێک کورد بەرژەوەندیەکانی ڕیگای پێنەدابێت یەکگرتوو بێت پێویستە لە ئێستادا واز لە بەرژەوەندیەکانی حیزبی و کەسی بهێنێت. لەپێناو پاراستنی بەرژەوەندی گەلی کورد و کۆمەڵکوژی گەلی کوردا یەکبگرێت.

     لەکاتی پەلاماردانیدا دووژمن بۆ سەر کورد و کۆمەڵکوژی کردنی ناپرسێت کێ سەربەکام حیزبەو کامە لەسەر چ دینێکە؟ ئەوەی بەلایەوە گرنگە کوشتنی کوردێکە. بۆیە سیاسەتی دۆست و دوژمن لەسەر گەلی کورد یەک شتە، ئەویش بەدیهێنانی ئامانجەکانیانە. ئێمەش پێویستە ئامانجی نەتەوەی بپارێزین، بۆ ئەوەی رێگری لە لەناوچون و کۆمەڵکوژی نەتەوەمان بگرین، ئەوەی بەلایەوە ئاسییە پێش هەموو کەس بەرژەوەندی ئەوانە دەکەوێتە خەتەر و لەناوچون، کاتێکیش دوژمن هانت دەدات بۆ لەناوبردنی گەلەکەت هەر بەو بەنجەش دەتکوژێ جا ئەم بەنجە ئاینی بێت کاتێک لەسەدا۹٥ نەتەوەکەت هاودینی پیاوێکی وەک ئۆردۆغانە. هەر بەو فتوایەی هاودینە نەتەوەکەت دەکوژێ تۆش لەناو دەبات. یاخود لەپێناو ئەو بەرژەوەندیەی کە دەتەوێت هاو نەتەوەکەت بفرۆشی بەدڵنیای لەدواساتدا دەیکات بە ژەهرو دەرخواردت دەداتەوە.

      بویە ئەوەی ئەمڕۆ بەرامبەر گەلەکەمان لە خۆرئاوای کوردستان ڕوودەدات، سەلمێنەری راستیەکە تائەم ساتە یەکنەگرتوی کورد وایکردوە کەدۆستەکانیشمان بەتوندی دەستمان نەگرن، کاتێک دەبینێت لەپێناوی بەرژەوەندی پۆستێکی حیزبی، یان بۆ فەرزکردنی حیزبێک بەسەر ئەوەیتردا، دەستی دوژمنەکەی دەگرێت، بەناچاری زۆر بەئاسانی لەبەرامبەر دوژمنەکەتد دەستبەردار دەبێت لەپێناوی بەرژەوەندیەکانی خۆیدا.  

کاتێک تورکیا پەلاماری عەفرین دەدات بەشێک لە ئێمەی کورد هاوسۆز بووین بۆ تورک ، کاتێک کوردستانی باکور لەگەڵ زەوی تەخت دەکات بەڵام دوای ئەوەی چەند جندرمەیەک دەکوژرێن بۆ پرسەو  دڵنەوای دەچنە تورکیاو بەیاننامە دژی هاونەتەوەکەی دەردەکەن ئەمە وادەکات کورد بەچاوێکیتر سەیربکرێت.  

  کاتێکیش ئەمریکا دوای ئەوەی کاری بەکورد نەما لە سوریا هاوشێوەی ڕوسیا دەستی کوردی بەردا، تورکیاش هەڕەشەی کۆمەڵکوژیمان لێ بکات  لە خۆرئاوای سوریا. هەروەها تورکیا ئەوەی نەشاردۆتەوە کەدژی کیانی کوردیە لەهەرشوێنێک بێت، دژیەتی کردنی خۆرئاواو بێ هەڵوێستی باشور لەبەرامبەر تورکیادا. وادەکات دوای کۆمەڵکوژی کورد لەخۆرئاوا ئەگەر بۆی سەربگرێت ئەوا بەدڵنیای سەرەی باشوری کوردستانیش دێت، چونکە ئەم پارچەیە وەک سەرچاوەی پاڵپشتی بۆ بەهێزی هەر سێ بەشەکەی تری کوردستان دەزانێ،

 هەروەها ترسی لە خۆرهەڵاتیشە لە ئەگەری کەوتنی ئێران ئەو ناوچەیەش دەکەوێتە دەست کورد ئەوکات تاکە دوژمنی کورد تورک دەبێت، ئەوەی پێشیوایە تورکیا ناتونێ پەلاماری باشور بدات،  ئێستا هاتوە بۆ ناوخاکی باشور و مەخمور بۆردومان دەکات، هەر ئەوەشنا بەڵکو لەکاتی هاتنی داعش بۆ مەخمور نزیکەوتنەوەی لە هەولێر تورکیا بەرامبەر  بەداعش هەڵوێستی نەبوو، هاوکاری نەکرد لە پاراستنی هەولێر. بەڵکو ئەوەی هەولێری پاراست هەڤاڵانی PKKبوون لەمەخموور لەگەڵ کۆمەکی ئاسمانی ئەمریکا، بۆیە ئامانجی ئەمڕۆی هەرتاکێکی کورد ئەوەیە پارێز بەندی لەهەستی نەتەوەی بکات، لەئێستا هەستی بەرژەوەندی و سۆزی ئاینی بەلاوە نێت، چ ئاین و چ بەرژەوەندی لەکاتی باڵابوونی نەتەوەدا خۆشە پیادەیان بکەین، بەڵام بیریشمان نەچیت بەبێ دژایەتی کردنی گەندەڵی و لەناونەبردنی لە هەرێم هەرگیز باشور ناتوانێ داکۆکی لە خۆی بکات و سەرکەوێت.  ئامانجی نەتەوەی پێش ئامانجی تری شەخسی بکەین.

چەند وتارێکی تر

كه‌ش و هه‌وا

فەیسبووك