کوردی           عربی
جوتیار كه‌مانگه‌ر

نه‌مانی‌ متمانه‌ به‌ هه‌ڵبژاردن ‌



له‌ده‌ستدانی‌ متمانه‌ به‌ گشتی‌ و له‌ ده‌ستدانی‌ متمانه‌ی‌ ئابووری‌ و سیاسی‌ به‌ شێوه‌یه‌كی‌ تایبه‌تی‌ هه‌ر به‌ شێوه‌ی‌ سروشتی‌ خۆی‌ خێراتر له‌ ده‌ست ده‌چێت به‌لاَم بۆ به‌ ده‌ستهێنانه‌وه‌ی‌ كاتێكی‌ زیاتری‌ پێویسته‌. خه‌ڵكی‌ عیراق و كوردستان به‌تایبه‌ت كه‌ متمانه‌ی‌ به‌ پارته‌ سیاسیه‌كان و كه‌سایه‌تیه‌ سیاسیه‌كان و ده‌سه‌لاَتی‌ سیاسی‌ و حكومه‌ت نامێنێت بێ‌ هۆ نیه‌، له‌به‌ر ئه‌وه‌ی‌ خه‌ڵكی‌ بۆی‌ ڕوون بوه‌ته‌وه‌ كه‌ پارته‌ سیاسیه‌كان و كه‌سایاتی‌ و به‌رپرسی‌ سیاسی‌ ئه‌وه‌نده‌ی‌ كۆشش و هه‌وڵده‌ده‌ن بۆ به‌رژه‌وه‌ندی‌ تایبه‌تی‌ خۆیان ئه‌وه‌نده‌ بۆ به‌رژه‌وه‌ندی‌ گشتی‌ خه‌ڵكی‌ به‌شمه‌ینه‌تی‌ و زوڵم لێ‌ كراو هه‌وڵ ناده‌ن. 
 خه‌ڵكی‌ به‌رده‌وام له‌ هه‌وڵدان بۆ دۆزینه‌وه‌ی‌ ڕێگا چاره‌یه‌ك بۆ چاره‌سه‌ری‌ كێشه‌ی‌ سیاسی‌ و ئابووری‌ ناو كۆمه‌ڵگا كه‌ بووه‌ته‌ هۆی‌ قوربانیدان و ماڵویرانی‌ و ئاواره‌ بوون له‌ پێناو ئه‌وه‌ی‌ دادگه‌ری‌ به‌رپابێت و مافی‌ هه‌مووان ڕه‌چاو بكرێت. كه‌ به‌ ناو سیاسیه‌كان ده‌گه‌نه‌ شوێنی‌ مه‌به‌ستی‌ خۆیان هه‌میشه‌ له‌ خه‌می‌ ئه‌وه‌دان چۆن ڕێگاو هۆكارانه‌ بۆ قازانج و به‌رژه‌وه‌ندیی‌ خۆیان و گرووپ و لایه‌نگرانیان ئاراسته‌ بكه‌ن، به‌بێ گوێدانه‌ به‌رژه‌وه‌ندیی‌ گشتی‌. هه‌ر له‌به‌ر ئه‌وه‌یه‌ خه‌ڵكی‌ تا ڕاده‌یه‌كی‌ زۆر متمانه‌یان به‌ پارته‌ سیاسیه‌كان نه‌ماوه‌ و باوه‌ڕیشیان به‌ ده‌نگدان نه‌ماوه‌ و ده‌ڵێن ده‌نگ ناده‌ین و هه‌میشه‌ بوین به‌ پرد بۆ گواستنه‌وه‌ی‌ كه‌سه‌ سیاسیه‌كان بۆ په‌رله‌مان و ده‌سته‌لاَت ته‌نها بۆ به‌رژه‌وه‌ندی‌ و گیرفانی‌ خۆیان ده‌ڕۆنه‌ په‌رله‌مان، نه‌ك بۆ خۆشگوزه‌رانی‌ و به‌رژه‌وه‌ندی‌ گشتی‌. هێزو پارته‌ سیاسیه‌كان له‌ كاتی‌ بانگه‌شه‌ی‌ هه‌ڵبژاردندا گاڵته‌ به‌ هه‌ستی خه‌ڵك ده‌كه‌ن، ده‌بینن كاتێك چۆن به‌ڵێن به‌ خه‌ڵكی‌ ده‌ده‌ن و پاشان لێی‌ په‌شیمان ده‌بنه‌وه‌و هیچ ئه‌نجامێكی‌ نابینن ئیدی‌ چۆن متمانه‌یان به‌ ده‌سه‌لاَتی‌ سیاسی‌ ده‌مێنێت. 
 له‌ سیاسه‌تدا ئه‌گه‌ر ڕه‌وشت (ئه‌خلاق) وه‌ك پێویست نه‌بوو ئیتر ده‌سه‌لاَتداران به‌ ئاره‌زوی‌ خۆیان به‌ڵێن ده‌ده‌ن و جێبه‌جێی‌ ناكه‌ن، خه‌ڵكی‌ ده‌زانن كه‌ هیچ بنه‌مایه‌كی‌ سیاسی‌ له‌م پارته‌ سیاسیانه‌دا نیه‌، چونكه‌ سیاسه‌ت ته‌نها بۆ خزمه‌ت كردنی‌ خه‌ڵكی‌ و نیشتیمانه‌كه‌یه‌تی‌ كه‌ بتوانێت له‌ نیشتیمانی‌ گه‌لانی‌ كه‌ به‌هیزتربێت و خه‌ڵكه‌كه‌ی‌ له‌ خوشگوزه‌رانی‌ كه‌میان نه‌بێت. به‌لاَم له‌ كوردستان و عیراق خۆیان هه‌ڵواسیوه‌ به‌ تیوه‌ری‌ سیاسی‌ و ئابووری‌ ته‌نها بۆ پێگه‌ی‌ هێزی‌ ئابووری‌ و سیاسی‌ و سه‌ربازی‌ خۆیان وه‌ سامانی‌ نیشتیمان بۆ خویان به‌ تالاَن ده‌به‌ن. خه‌ڵك كه‌ سه‌رچاوه‌ی‌ پێگه‌یاندنی‌ پارته‌ سیاسیه‌كان و كه‌سه‌ سیاسیه‌كانه‌ وه‌ هه‌میشه‌ بونه‌ته‌ پرد بۆ ئه‌وه‌ی‌ گۆڕانكاری‌ له‌ به‌ڕیوه‌به‌ردنی‌ حكومه‌تدا بكه‌ن، به‌لاَم به‌ پێچه‌وانه‌وه‌ خه‌ڵكی‌ برسی‌ ده‌كرێت و بێكار ده‌بێت و خزمه‌تگوزاریه‌ سه‌ره‌تایه‌ كانیشی‌ لێ‌ په‌راوێز ده‌كرێت، باری‌ ده‌روونی‌ خه‌ڵكی‌ تێكچووه‌ به‌هۆی‌ ئه‌م كێشه‌ سیاسی‌ و ئابووری‌ و سه‌ربازیانه‌ كه‌ له‌ ناوچه‌كه‌دا ڕووده‌دات، وه‌ نه‌بوونی‌ خه‌مخۆرێكی‌ دڵسۆز بۆ خه‌ڵك و نیشتیمانه‌كه‌یان .
 پارته‌ سیاسیه‌كان و پارته‌ ده‌سه‌لاَتداره‌كان كه‌ بونه‌ته‌ هۆی‌ لاوازی‌ پێگه‌ی‌ كورد له‌ به‌غدادیش ڕۆژ له‌ دوای‌ ڕۆژ په‌یوه‌ندی‌ نیوان هه‌ریم و به‌غداد لاواز ده‌بێت و كێشه‌كان ئاڵۆزتر ده‌كه‌ن. خه‌ڵكی‌ پێیان سه‌یره‌ كه‌ سه‌ر له‌ نوێ داوا له‌ هاولاَتیان ده‌كرێت كه‌ متمانه‌یان پێ‌ بكه‌نه‌وه‌ بۆ سه‌ر سندوقه‌كانی‌ ده‌نگدان كه‌ به‌ڵێن و په‌یمان ده‌ده‌ن و دووباره‌و سه‌دباره‌ی‌ ده‌كه‌نه‌وه‌ به‌بێ‌ هێنانه‌دی‌ به‌ڵێن و په‌یمانه‌كانیان. ئه‌گه‌ر ئه‌م هه‌ڵبژاردنه‌ی‌ په‌رله‌مانی‌ عیراق ڕێژه‌یه‌ك متمانه‌ به‌ پارته‌ سیاسیه‌كان بكه‌نه‌وه‌ پێویسته‌ ده‌سه‌لاَتی‌ سیاسی‌ بایه‌خ و گرنگی‌ ته‌واو بدات به‌ سه‌رمایه‌ی‌ كۆمه‌لاَیه‌تی‌ وه‌ك سه‌رمایه‌ جۆراوجۆره‌كانی‌ تری‌ حكومه‌ت وه‌ خوشگوزه‌رانی‌. بۆ ئه‌وه‌ی‌ ڕووی‌ بێت بۆ هه‌ڵبژاردنێكی‌ تر بتوانێ‌ داوای‌ ده‌نگیان لێبكات و ببێته‌وه‌ جێی‌ متمانه‌ و گرنگی‌ پێدانیان. ئه‌گه‌ر به‌ڵێن و داواكاریه‌كانی‌ هاولاَتیان جێ‌ به‌جێ‌ نه‌كرێت، ئه‌وا هه‌ڵبژاردنێكی‌ كه‌ له‌ پێشه‌وه‌یه‌ بۆ په‌رله‌مانی‌ كوردستان وه‌ سه‌ر له‌ نوێ‌ داوا له‌ هاولاَتیان و ده‌نگده‌ران ده‌كه‌نه‌وه‌ بۆ متمانه‌ پێدانه‌وه‌یان، ئه‌و ڕێژه‌ كه‌مه‌ی‌ هاولاَتیانیش بێ‌ ئه‌مه‌ل ده‌بن له‌ متمانه‌ دانه‌وه‌ به‌ پارته‌ سیاسیه‌كان و هاولاَتیان باوه‌ڕیان به‌ هه‌لبژاردن نامێنێت جونكه‌ هه‌ڵبژاردن هیچ خواستێكی‌ هاولاَتیان ده‌سته‌به‌ر ناكات.


كه‌ش و هه‌وا

فەیسبووك