کوردی           عربی
عادل عوسمان

سەرکەوتن و لەدەستدان‌


تێکۆشانی ئازادیی بەیەک کەس دەستی پێکرد، لەناو مەرگێکی تۆقێنەردا، کەتەنانەت پیرە پیاوەکانمان دەیانوت"ئەو کۆتەرەیە زیندوو دەبێتەوە" تاتۆ بتوانیت ئەم گەلە هەستێنیتەوە" بەڵام بەخۆبڕوابون وبەگەل بڕوابوون، وای کرد گەلی کورد لەگەلێکی مردوەوە ببێتە گەلێکی پێشەنگی ژیانەوەو پێکەوەژیان لەسەر هزری ئازادیی کۆمەڵگەی دیموکراتیک.
ئێستای تێکۆشانی ئازادیی لەپانتاییەکی فراوانی گەلەری و سیستەمیدا کارو فەرمانی هەیەو جیهانی خستوەتە ژێر کارتێکەری خۆی و وەک ئەکتەرێکی کاریگەری ناو کایەی سیاسی وهزری وڕێکخستنی وپاراستنی بونی خۆی سەلماندوە، بۆیە دوژمنانی گەلی کورد بەتایبەتی ودوژمنانی مرۆڤایەتی هێرشی دەکەنەسەرو دەیانەوێت ئەو ئیرادە ئازادە بشکێنن.
لەناوچەی ڕۆژهەڵاتی ناوەڕاستدا کەمنین ئەو هێزانەی بەدەستی دەوڵەتانی زلهێزو ناوچەییەوە بەکاردەهێنرێن و خوێنی گەلانی ناوچەی پێ دەڕێژرێت. لەپێناوی دەسکەوتی کاتی ومانەوەدا پەنا وەبەر زۆرو سەرکوت دەبەن بۆمانەوە.
ئەو هێزو ئیرادەیەی ئەمڕۆ ڕێبەری تێکۆشانی ئازادیی دەکات، نەک تەنیا گەلی کورد بەڵکو گەلانی جیهانیشی بەخۆدا هێناوەتەوە، کەژیانی سوک وهەرزان قبوڵ نەکەن، بۆیە هێزە جیهانی وناوچەییەکانی لەخۆی ڕاستکردۆتەوە، کە ئازادیی گەلان ومرۆڤایەتی بەسەرکەوتن، یان بەئاکام نەگات. بێدەنگی جیهان بەرامبەر عەفرین لێرەوەیە.
بەڵام ئەم تێکۆشانە بەخۆبڕوایە کەچەندی فشار زیاد بێت، ئەوەندە ئیسرار زیاد دەبێت، لەپێناوی سەرکەوتندا، خودی سەرکەوتن، ماناو جێگەی خۆی هەیە، هە رلەدەستدانێک بەمانای شکان وتەسلیم بوون نیە، بۆیە دەڵێین" لێدانێک ئەگەر نەتخات ئەوا بەهێزت دەکات" بۆیە هەرلێدان وهێرشێک بۆسەر تێکۆشانی ئازادیی نەک نامانخات، بەڵکو بەهێزمان دەکات، بەوهۆیەوەیە کە هێزە هەژموون پارێزەکان لەو تێکۆشانە دەترسن وپەلاماری دەدەن.
پەلاماری دوژمن تەنیا بەشەڕو لەناوبردنی جەسەدی کۆتایی نایەت، بەڵکو مەیدانەکانی هزرو دەرون وئابوری وکۆمەڵایەتیش دەگرێتەوە.
لەباری هزریەوە واوێنا دەکرێت کە کورد هەر " کورتە!" بۆیە هیچی بەهیچ نابێت! بەوە ئیرادەیەک لەتاکی کورددا دروست دەکات کەشکاوەو توانای ئاواکردنی ژیانێکی ئازادیی نیە، ئەو وێنەیە ئەوەندە دوژمن گەورە دەکات کە نەتوانیت بەرەنگاری ببیتەوە، نمونەی تێکشکانەکانی کوردیش کەمنین، کەکارتێکەری نەرێنیان لەسەر تاک وکۆمەڵگەی کوردی نەبێت، ئەمە لەکاتێکدا ئەو بزوتنەوانەی دروست بوون بزوتنەوەی خێڵەکی وشێخایەتی وبەگلەری بوون کە نەیتوانیوە تەواوی کۆمەڵگە لەخۆی بگرێت وژیانێکی ئازادو وەک یەک بەبنەمابگرێت.
لەباری کۆمەڵایەتیەوە، کۆمەڵگەی کوردی نەیتوانیوە خۆی لەدەسەڵاتداران وبەرژەوەندپەرستان وهێڵی داگیرکەر دابڕێت، بۆیە هەرچی کراوە بەشکست بۆگەلی کورد هاتۆتە ئەژمار، زەرەرمەندی دەستی پەلامارو شکستەکانیش کۆمەڵگەی ژێرین وخواری خەڵک بوەو دەسەڵاتداران هەڵهاتون ولەباوەشی داگیرکەراندا ژیانێکی ڕەزیلانەیان بەڕێکردوە. بۆیە جیاکردنەوەی کۆمەڵگە لە دەسەڵاتداران، بۆخۆی لایەنێکی چارەسەرکردنی شکستەکانەو چیدی دەسەڵات ناتوانێت هەژمونی خۆی بەسەر کۆمەڵگەدا بسەپێنێت وبەپێی ویستی داگیرکەر بجوڵێتەوە.
لەباری ئابوریەوە، داگیرکەرانی کوردستان نەیانهێشتوە کۆمەڵگەی کوردی گەشەبکات وهەمیشە لەهەژاریدا ڕایانگرتوون، دەستیان بەسەر داهاتوو بژێوی خەڵکدا گرتوەو پیشەسازیەکانیان لەناوچەکانی ژێردەسەڵاتی خۆیان وخاکی نەتەوەی سەردەستدا دامەزراندوەو هەرچی سەرچاوەی سروشتی و وزەی کوردستانیش هەیە بۆخۆیان بردوەو ڕەفتاریان پێوە کردوەو ڕێگەیان لەئاوەدانی کوردستان وبوژانەوەی ژێربینای ئابوری وگوزەرانی گرتوە، بەوە کۆمەڵگەیەکی گرێدراو بەخواستی داگیرکەرانی دروستکردوە، کەهەمیشە چاوی لەدەستی داگیرکەر بێت.
بەهەموو ئەوانەی سەرەوەش، دەرونێکی کۆمەڵایەتی دروستکردوە، کە وتەوقسەی داگیرکەر برەودارتر بێت لەهەرکەسی تر، هۆکارەکەشی دەزگایەکی ڕاگەیاندن وشەڕی تایبەتی وەڕێخستوە کەهەرجوڵەیەکی کۆمەڵگەی کوردی خستوەتە ژێر کاریگەری خۆی وچۆنی بوێت ئاواڕەنگ ڕێژی دەکات، دامودەزگاو سازیەکانی شەڕی تایبەت بەپێی پێویستی شکانی ئیرادەی گەلی کورد کاردەکەن ولەهەوڵی شکانی کۆمەڵگەی کوردیدان.
بۆیە هێرشی سەرعەفرین، ئەگەر لێرەوە سەیری بکەین، بۆ تێکۆشانی ئازادیی سەرکەوتن وململانێی نێوان دوو تێڕوانین وجیهانبینیە کەچارەنوسی داگیرکەران و کوردستان بەئاکامێکی کە دەگەیەنێت.
پەیامی تێکۆشانی ئازادیی پەیامێکی ئانی نیە، پەیامێکی پەیامبەرانەیەو پانتاییەکی فراوانی جیهانی گرتوەتەوە، بۆیە لە کۆمەڵگەی کوردیشدا هێڵی داگیرکەرانی بەرتەسک و لەبەریەک هەڵوەشاندوە، داگیرکەران دەیانەوێت لەڕێی هێرش وفشارەوە ئەم تێکۆشانە بێکاریگەرو تێکشکاو بکەن وتەسلیمی بگرن، بەڵام تێکۆشانی ئێمە نەک هێرش وفشار قبوڵ ناکات بەرخۆدانێکی سەردەمیانەی نیشانداوە، کەجگە لەگەیاندنی پەیامە مرۆڤایەتیەکانی و کەمتر لەسەرکەوتن هیچی تر ناناسێت.
لەدەستدان لەشەڕێکی نابەرامبەری وەک هێرشی تورکیا بەپشتیوانی ناتۆو ڕوسیا بۆسەر عەفرین، ڕاستە ناخۆش وکردەیەکی سەربازیە، بەڵام بۆخۆی مێژوویەکی خوڵقاند لەبەرخۆدان وبەرگری کەماناکانی لە مێژوودا دەبێتە وانەو دەرخواردی مرۆڤایەتی دەدرێت، لەدەستدانی عەفرین ئیرادەیەک دەخوڵقێنێ، کەسەرکەوتن بەدوای خۆیدا دێنێت وتەسلیم بوون ناناسێت.
بۆیە وانەی پێکەوە ژیان وئازادیی وبەرخۆدانی گەلان وپێکهاتەکانی عەفرین وبەرخۆدانی گەلانی ناوچە بۆئازادیی پڕماناترین دەسکەوتە کە بۆ سەرکەوتن دەبێتە ئیرادەو هێز، بۆیە لەپاڵ ئەو هەموو هێزە سەربازیەدا داگیرکەری تورک ئەنجام بەدەست ناخات ولەڕێگەی هێرشی ڕاگەیاندنیەوە دەیەوێت دەرونی گەلی کوردو ئازادییخوازان بشێوێنێت. 
تێکۆشانی ئازادیی لەبەرزبونەوەی ئاستی هێرشەکانی داگیرکەراندا، بەڕێکخستن کردنی کۆمەڵگەو پەروەردەی لەسەر هێڵی تێکۆشانی ئازادیی پێ گرنگەو لەڕێی چارەسەری دیموکراتیکانەی کێشەکانی کۆمەڵگەدا ئاشتی وئازادیی وپێکەوەژیان بەبناغەدەگرێت.
خاکی کوردستان هەمووی داگیرکراوەو بەدەستهێنانی هەربستێکی دەسکەوت و بەرەوپێشچونە، لەدەستدانی هەربستێکیشی بەئازارە، چونکە ئەودەسکەوتانە بەقوربانی وخوێنی شەهیدان بەدەست هاتووە. بەڵام ئەو ئازارە ئێمە ناخات، بەڵکو بەهێزترو بەئیرادەترمان دەکات، سەرکەوتن لای ئێمە ڕێکخستن وپەروەردە بونە بەهزری دیموکراتی وچارەسەری کێشەکان. بۆیە گرنگە مرۆڤ لەڕاستای بەسەرکەوتن گەیشتنی ئازادیی وپێکەوە ژیاندا ئەنجام بگرێت، بۆیە شکستی عەفرین دەبێتە وانەی هەستانەوەو بەرخۆدان نەک تەسلیمیەت ومردن.


چەند وتارێکی تر

كه‌ش و هه‌وا

فەیسبووك