کوردی           عربی
عادل عوسمان

نیگەرانیەکانی ئەردۆغان و ئازارەکانی گەلی کورد‌


لەم چەند ساڵەی دەسەڵاتدارەتی ئەکەپە_ ئاردۆغان گەلی کورد زۆرترین ئازارو کوشتارو خەڵەتاندنی لەبەرامبەرو لەدژ بەکارهێنراوە، ئەویش بەئامانجی سڕینەوەو لەناوبردنی گەلی کوردو تەمێکردنی تێکۆشانە ئازادیخوازانەکەی. ئەردۆغان کراوەتە ئەو دۆنکیشۆتەی کەوێنەی نیە لەدەستڕۆشتووی و گەورەیی وباشیدا.

کاتێک دێیتە باشوری کوردستان و حکومەتەکەی، حیزبەکانی، ڕاگەیاندنەکانی، شیکەرەوەکانی دەبینیت، سەرت ەگەمژەیی وبێپرەنسیپی وناسیاسی بوونی ئەم سیستەمە دەسەڵاتدارەتیە سوڕدەمێنێ.

کاتێک دێتە سەر شیکردنەوەو هەڵسەنگاندنی دەسکەوت وسەرکەوتنەکانی تێکۆشانی گەلی کورد لەڕوانگەی نیگەرانیەکانی ئەردۆغانەوە! هەڵسەنگاندن وشیکردنەوە دەکات!. لەکاتێکدا ئەردۆغان لەسەری سیستەمێک جێگەی گرتوە، توشی کێشەی بونیادی بوەو بەرەو هەڵوەشان وپارچەبون ولەناوچون دەچێت. کەچی ئەم دۆنکیشۆتە لەباشور هەربەهێزەو هێزیشی پێدەدرێت.

لەڕۆژئاوای کوردستان بەخۆی وهێزە دەمامکدارەکانیەوە تێکشکاوەو لەسوریاشدا بەهەمان دەردچوە، لەتورکیاو باکوری کوردستان، دۆڕاوەو چەندین شاری گەورەی لەدستداوەو بنکەی جەماوەریشی لەدابەزین ولەدەستداندایە. ناوخۆی حیزبەکەی پارچەبوەو خەریکە دوو حیزبی لێجیادەبێتەوە. لەناوخۆی تورکیادا بەرەی تێکۆشانی دیموکراتیک لەدژی کراوەتەوەو خەریکی لەناوبردن وهەڵوەشانەوەی دەسەڵاتی ئەکەپە مەهەپەن.گەلی تورک و گەلانی تر تەواو هەراسان بوون وبێزاریەکانیان لەئاستی تەقینەوەو هەڵگێڕانەوەی هەلومەرجەکەیە.  لەباکوری کوردستان گەلی کوردو پێکهاتە جیاوازەکان لەئاستی باڵای بەرخۆدان وتێکۆشانێکی بەڕومەتدان،  سوپای تورکیا سەرەڕای ئەو تەکنەلۆجیاگەورە سەربازیە تێکشکاوەو توانای بەدەستخستنی ئەنجامی نیەو بەرەکانی شەڕو چیاکان وپێدەشتەکانیش بەدەستی گەڕیلاو شەڕوانانی کوردو ئازادیخوازانی چەپ و پێکهاتەکانی تری تورکیاوەیە.

لەباشوری کوردستانیش ئەوەی پەیوەندی بەپەکەکەو شەڕوانان وگەڕیلاکانی هێزی پاراستنی گەلەوە هەیە، دوژمنی داگیرکەریان توشی تێکشکان وبێکاریگەرکردنی هێرشە داگیرکاریەکانی کردوەو هێرشەکانیان توشی بنبەست وڕاوەستان کردوە مەیدانی شەڕ بەدەستی گەڕیلاو شەڕوانانەوەیە.

لەشەنگاڵ، بێکاریگەرن وکۆمەڵگەی ئێزدی خەریکی خۆڕێکخستن وداڕشتنی پایەکانی سیستەمی ژیانێکی ئازادن. لەمەخمور سیستەمی ژیانێکی ئازاد بەڕێوەدەچێت و بۆژیانێکی ئازاد بەرخۆدانی گەورە دەکەن.

زوربەی چیاو پێدەشتەکانی باشوری کوردستان بەدەستی هێزەکانی پاراستنی گەل و هێڵی تێکۆشانی ئازادیەوەیە. ئەوەی دەمێنێتەوە لەباشوری کوردستان سێ شاری هەرێم و مەودایەکی زۆری خاکی بەنەوتە لەدەستی حکومەتی هەرێم وحیزبەکانی دەسەڵاتی باشوری کوردستانە. کەئەویش لەژێر پیلانی لێسەندنەوەو تەسلیم کردنەوەیەتی بەدەوڵەتی عیراق، کەلەئەساسدا ئەو ناوچانە تەسلیمی داگیرکەری تورک کراوەو ئەو بڕێوەی دەبات وبڕیاری لەسەر دەگرێت.

دۆسیەی نەوت وڕادەستکردنی ۲٥٠٠٠٠٠ بەرمیل نەوت لەبەرامبەر بەردەوامی بودجەی هەرێمدا ڕاست ودروستی ئەو بۆچونەمان دەسەلمێنێ.

ئەوەی ماوەتەوە بیڵێم ئەردۆغان ودەوڵەتەکەی بونەتە لەیستۆکێک ولەسیاسەتی بەرژەوەندی دەسکەوتی ئابوری زلهێزانی دونیادا بەکاردەهێنرێت وهەر زلهێزێک بەشێکی لێ دەپچڕێت، ئەویش لەبەرامبەر فۆبیای کورددا هەرشت دەدات وئەم دەسەڵاتدارانەی باشوریش بەنەوت وداهاتی باشوری کوردستان کەوتونەتە خزمەتی دەوڵەتە لەرزۆکەکەی ئەردۆغان ومەینەتێکی گەورەیان بۆگەلی کورد دروست کردوە.

بۆیە بۆهەرێمی کوردستان گرنگە نەک لەڕوانگەی نیگەرانیەکانی ئەردۆغان ودەوڵەتە فاشستیەکەیەوە سەیری ڕوداوەکان بکات وببێتە لایەن وپشتیوانی ئەو دەوڵەتە، بەڵکو لە ئێش وئازارەکانی گەلی کوردو ئەو شەڕ وتێکۆشانەی گەلی کورد بەڕێوەی دەبات ببینێت وببێتە بەشێک ولایەنێک لەچارەسەرکردنی پرسی کورددا.

ئەوە ڕاستیەکە پێویستە دانی ێدابنرێت وببینرێت کەپێگەی حکومەتی هەرێم وحیزبەکانی هەرێمی کوردستان شکاوەو وەک مرتەزەقە حسابیان بۆدەکرێت ودەیانەوێت ئەو پێگەی بەخوێن وئازاری گەل لەباشوری کوردستاندا بەدیهاتوە بسڕنەوەو لەناوی بەرن. بۆیە هەلومەرجی تێکۆشانی گەلی کورد بەهۆی ئەم حکومەت وحیزبانەوە بەدۆخێکی سەخت و پڕ ئازاردا تێدەپەڕێت، کەپێویست دەکات، حیزبەکان لەبری ئەوەی لەخایاڵدانی خۆیاندا بەشوێن خۆگەورە کردن و زل نیشاندانی خۆیانەوەن، بێنەوە ناو تێکۆشانی گەل و لەیەکیەتی نەتەوەیی گەلی کورددا بەشداربن. چونکە ئازارەکان گەورەن، تەحەمولی زیاتر ناکەن، ناوچەکەش لەناوباهۆزی ئاڵوگۆڕی گەورەدایە بەئاراستەی چارەسەری کێشەی کوردو دیموکراتیەت لەم ناوچەیەداو هاوکێشەی هێزی گەلی کوردیش تێری بەشداری لەبەدەستهێنانی پێگەی گەلی کورددا دەکات وئەوەی دژی ئەوباهۆزی ئاڵوگۆڕیە بوەستێت ڕایدەماڵێت.

حکومەتی هەرێم وحیزبەکانی دەسەڵات لەباشوری کوردستان ئەوەندەی دڵتان بە دەسەڵات و ئەردۆغان خۆشە دڵتان بە ئازادی خۆش نیە، پێویستە دڵتان بۆئازادی گەل لێبدات و بەشداربن لەنەخشاندنی دواگورزی لێدان لەدوژمن وسەرکەوتنی گەلی کورددا.  

لەکۆتاییدا پرسیارێک دەکەم؛  ئایا نیگەرانیەکانی ئەردۆغان گرنگە، یان ئازارەکانی گەلی کوردو تێکۆشانە ئازادیەکەی!.


چەند وتارێکی تر

كه‌ش و هه‌وا

فەیسبووك